HOSỌ HE JẸNUKỌN: BE A SỌGAN DEJIDO SINSẸ̀N GO YA?

Naegbọn A Dona Lẹnnupọn Gando Sinsẹ̀n He mẹ A Te Go?

Mí ni dọ dọ yè dona zẹ̀ we, na a to awutu he ze ogbẹ̀ towe do owù mẹ de jẹ wutu. A na jlo dọ doto he na zẹ̀ we lọ ni yin mẹhe go a sọgan dejido taun, na ogbẹ̀ towe na tin to alọ etọn mẹ wutu. Be e ma na yin nuyọnẹnnu dọ hiẹ ni vọ́ dodinna obá he mẹ ewọ yọ́n azọ́n jẹ ya?

Mọdopolọ, alenu wẹ e nọ yin nado yí sọwhiwhe do lẹnnupọn gando sinsẹ̀n go. Eyin a tin to sinsẹ̀n de mẹ, yọnẹn dọ ogbẹ̀ gbigbọmẹ tọn towe wẹ a to zizedo alọ etọn mẹ. Podọ, enẹ na yinuwado whlẹngán towe ji.

Jesu dọ ohia he na gọalọna mí nado yọ́n sinsẹ̀n nugbo lọ. E dọmọ: “Atin dopodopo wẹ nọ yin yinyọnẹn gbọn sinsẹ́n etọn titi dali.” (Luku 6:44) Di apajlẹ, eyin a lẹnnupọndo sinsẹ̀n tangan de ji, sinsẹ́n tẹlẹ wẹ e nọ detọ́n? Be nukọntọ etọn lẹ nọ zinnudo akuẹ ji zẹjlẹgo wẹ ya? Be hagbẹ sinsẹ̀n lọ tọn lẹ nọ setonuna nudọnamẹ Biblu tọn lẹ gando awhànfunfun po walọ dagbe po go ya? To popolẹpo mẹ, be sinsẹ̀n de tin he go yè sọgan dejido ya? Mí to tudohomẹna we nado gbadopọnna hosọ he bọdego lẹ.

[Nudọnamẹ tangan lẹ to weda 3]

“Atin dopodopo wẹ nọ yin yinyọnẹn gbọn sinsẹ́n etọn titi dali.”—Luku 6:44