Ayihaawe ma tin dọ gbẹtọvi lẹ na to nukọnyi to lẹnunnuyọnẹn-liho. Ṣigba, be yé na penugo nado wleawuna aihọn de he mẹ gbẹtọvi lẹ na nọ hò ode awetọ tọn pọ́n te ya? Lala. To egbehe, nukunkẹn po ṣejannabi po wẹ gọ́ aihọn lọ mẹ. Ṣigba, lẹndai Jiwheyẹwhe tọn wẹ yindọ gbẹtọvi lẹ ni nọgbẹ̀ to ninọmẹ dagbe mẹ.—Hia 2 Pita 3:13.

Ohó Jiwheyẹwhe tọn basi zẹẹmẹ aihọn yọyọ sọgodo tọn de tọn ehe mẹ gbẹtọvi lẹpo na nọ yiwanna ode awetọ te. Yé na nọ jijọho mẹ, podọ mẹde ma na wà nuylankan do yé.—Hia Mika 4:3, 4.

Jiwheyẹwhe ma dá gbẹtọ po ayilinlẹn ṣejannabi tọn po. Ṣigba, to whenue sunnu tintan lọ vẹtolina Jiwheyẹwhe, e lẹzun mapenọ. Ewọ dè wẹ mí dugu ayilinlẹn ṣejannabi tọn sọn. Etomọṣo, Jiwheyẹwhe na yí Jesu zan nado diọ gbẹtọ lẹ zun mẹpipe.—Hia Lomunu lẹ 7:21, 24, 25.

To kọndopọ mẹ hẹ ojlo Jiwheyẹwhe tọn, Jesu yí ogbẹ̀ etọn do sanvọ́ bo de nuyiwadomẹji tolivivẹ sunnu tintan lọ tọn sẹ̀. (Lomunu lẹ 5:19) Gbọnmọ dali, Jesu hùn dotẹnmẹ sọgodo jiawu de tọn dote na gbẹtọvi lẹ bọ yé ma nasọ tindo ayilinlẹn ṣejannabi tọn nado wà nuylankan ba.—Hia Psalm 37:9-11.