“Jelusalẹm Yọyọ” lọ, yèdọ hogbe de he sọawuhia whla awe to Biblu mẹ, yin tòdaho de he nọtena pipli hodotọ Jesu tọn lẹ tọn de to yẹhiadonu-liho he na dugán hẹ ewọ to Ahọluduta Jiwheyẹwhe tọn mẹ. (Osọhia 3:12; 21:2) Biblu dohia dọ pipli ehe gán sọ yin yiylọdọ asiyọyọ Klisti tọn.

1.   Jelusalẹm Yọyọ lọ tin to olọn mẹ. To whedepopenu he Biblu donù Jelusalẹm Yọyọ go, e nọ dohia dọ olọn mẹ wẹ e na wá sọn, yèdọ fihe angẹli lẹ nọ basi hihọ́na họngbo tòdaho lọ tọn lẹ te. (Osọhia 3:12; 21:2, 10, 12) Podọ kiklo tòdaho lọ tọn dohia dọ e ma sọgan nọ aigba ji. E tindo adà ẹnẹ bọ jiyiyi po gbigblo yetọn po sọzẹn, gbigblo etọn lẹdo pé sọ dite sọ “stade 12 000.” a (Osọhia 21:16; Odò.) Gbọnmọ dali, jiyiyi adà etọn lẹ tọn yin nudi kilomẹtlu 560 pànta jẹhọn mẹ.

2.   Jelusalẹm Yọyọ lọ bẹ pipli hodotọ Jesu tọn lẹ tọn de hẹn, enẹ wẹ asiyọyọ Klisti tọn. Jelusalẹm Yọyọ lọ yin yiylọdọ “asiyọyọ lọ, yèdọ asi Lẹngbọvu lọ tọn.” (Osọhia 21:9, 10) Sọgbe hẹ nuyijlẹdonugo ehe, Lẹngbọvu lọ nọtena Jesu Klisti. (Johanu 1:29; Osọhia 5:12) “Asi Lẹngbọvu lọ tọn,” enẹ wẹ asiyọyọ Klisti tọn, nọtena Klistiani he na kọnawudopọ hẹ Jesu to olọn mẹ lẹ. Biblu yí haṣinṣan he to ṣẹnṣẹn na Jesu po Klistiani enẹlẹ po jlẹdo haṣinṣan asu po asi po de tọn go. (2 Kọlintinu lẹ 11:2; Efesunu lẹ 5:23-25) Humọ, “oyín 12 apọsteli 12 Lẹngbọvu lọ tọn lẹ tọn yin kinkan do” zannu dodonu tọn Jelusalẹm Yọyọ lọ tọn lẹ go. (Osọhia 21:14) Nudọnamẹ ehe gọalọna mí nado yọ́n nuhe Jelusalẹm Yọyọ lọ yin taun, na Klistiani he yin yiylọ nado wá nọgbẹ̀ to olọn mẹ lẹ nọ “yin dido daga do dodonu apọsteli lẹ po yẹwhegán lẹ po tọn ji” wutu.—Efesunu lẹ 2:20.

3.   Jelusalẹm Yọyọ lọ yin apadewhe gandudu de tọn. Jelusalẹm hohowhenu tọn wẹ yin tatọ́-tònọ Islaeli tọn, yèdọ fihe Ahọlu Davidi, visunnu etọn Sọlomọni, po kúnkan yetọn lẹ po dugán te to “ofìn Jehovah tọn ji.” (1 Otànnugbo lẹ 29:23) Gbọnmọ dali, Jelusalẹm enẹ, he yin yiylọdọ “tòdaho wiwe lọ,” nọtena gandudu Jiwheyẹwhe tọn to hukan whẹndo tọn Davidi tọn mẹ. (Nẹhemia 11:1) Jelusalẹm Yọyọ lọ, he sọ nọ yin yiylọdọ “tòdaho wiwe lọ,” bẹ mẹhe na yì kọnawudopọ hẹ Jesu to olọn mẹ nado “duahọlu do aigba ji” lẹ hẹn.—Osọhia 5:9, 10; 21:2.

4.   Jelusalẹm Yọyọ lọ na hẹn dona lẹ wá na gbẹtọ lẹ to aigba ji. Zẹẹmẹ he yin bibasi dọ Jelusalẹm Yọyọ lọ “to tejẹ sọn olọn sọn Jiwheyẹwhe dè,” dohia dọ Jiwheyẹwhe na yí i zan nado vọ́ nulẹ jlado to gbonu olọn tọn. (Osọhia 21:2) Hogbe enẹlẹ dohia dọ kanṣiṣa de tin to Jelusalẹm Yọyọ lọ po Ahọluduta Jiwheyẹwhe tọn po ṣẹnṣẹn, yèdọ Ahọluduta he Jiwheyẹwhe na yizan nado hẹn ojlo etọn di “kẹdẹdi to olọn mẹ, mọdopolọ to aigba ji.” (Matiu 6:10) Nuhe Jiwheyẹwhe lẹn gando mẹhe to aigba ji lẹ go bẹ dona ehelẹ hẹn:

   •   Ylando didesẹ. “Tọ̀sisa osin ogbẹ̀ tọn de” nọ sà jẹgbonu sọn Jelusalẹm Yọyọ lọ mẹ bo nọ húsinna “atin ogbẹ̀ tọn lẹ” he tin “na azọ̀nhẹngbọ akọta lẹ tọn.” (Osọhia 22:1, 2) Azọ̀nhẹngbọ agbasa-liho po gbigbọ-liho po tọn ehe na de ylando sẹ̀ bo hẹn gbẹtọvi lẹ penugo nado jẹ pipé kọ̀n, dile Jiwheyẹwhe lẹn do to dowhenu.—Lomunu lẹ 8:21.

   •   Haṣinṣan dagbe de to Jiwheyẹwhe po gbẹtọvi lẹ po ṣẹnṣẹn. Ylando ko hẹn gbẹtọvi lẹ jẹla na Jiwheyẹwhe. (Isaia 59:2) Ylando lẹ didesẹ na zọ́n bọ dọdai ehe na mọ hẹndi to gigọ́ mẹ: “Gòhọ Jiwheyẹwhe tọn tin to gbẹtọvi lẹ dè, ewọ nasọ nọhẹ yé, yé nasọ yin omẹ etọn lẹ. Podọ Jiwheyẹwhe lọsu na tin po yé po.”—Osọhia 21:3.

   •   Opodo yajiji po okú po tọn. Jiwheyẹwhe na yí Ahọluduta etọn zan nado “súnsún dasin lẹpo sẹ̀ sọn nukun yetọn mẹ, okú ma nasọ tin ba, mọjanwẹ aluẹmẹninọ kavi avi kavi awufiẹsa ma nasọ tin ba.”—Osọhia 21:4.