Duha ka importante nga anibersaryo para sa mga Saksi ni Jehova sa Greece ang natabo sang 2022: 100 ka tuig na sugod sang may una nga mga rekord sang mga Saksi nga nangindi sa pagsoldado bangod sa konsiensia, kag 25 ka tuig na sugod sang ginpatuman ang alternative civilian service.

Sang mga 1900, madamo sang inaway nga natabo sa Greece. Bangod sini, sulitsulit nga nag-atubang ang aton mga kauturan sa isyu sang neutralidad. Sanday Brother Nikos Abatzis kag Brother Nikolaos Rebebos amo ang una nga duha ka Saksi ni Jehova (ginatawag sadto nga mga Estudyante sang Biblia) sa Greece nga nangindi sa pag-entra sa inaway bangod sa ila nahanas sa Biblia nga konsiensia.

Si Brother Abatzis wala nag-entra sa Greco-Turkish War sang 1919-1922. Parte sa sina nga tion, si Brother Abatzis nagsiling: “Ginpadala ako sa military barracks [sa Asia Minor] . . . Didto, nagpakaisog ako kag nag-preaching ako [sa mga soldado] kag nagsiling nga ang inaway wala nagasanto sa ginatudlo sang Ebanghelyo, kay nagasiling ini nga dapat naton higugmaon ang aton mga kaaway.” Sang natapos ang inaway, si Brother Abatzis nagpadayon sa pag-preaching sang mensahe sang Biblia sa madamo nga lugar sa Greece.

Si Nikolaos Rebebos isa ka soldado sa Greco-Turkish War. Pero sang nabasa niya ang Biblia kag ang isa ka tract nga ginhatag sang mga Estudyante sang Biblia, nagbag-o ang iya pagtan-aw sa inaway. Sang ulihi, ginsilingan niya ang iya mga superyor nga indi na sia magpakig-away, bisan pa nabal-an niya nga puede sia patyon paagi sa firing squad. Maisog nga nagsiling si Nikolaos nga ‘wala sing bisan isa ka buhok sa iya ulo ang madula kon indi ini pag-itugot sang Dios.’ Pagkatapos sang inaway, ginpangita niya ang mga Estudyante sang Biblia kag nabawtismuhan sia sang 1925.

Si Brothers Abatzis kag si Brother Rebebos amo ang una sa madamo nga brother sa Greece nga nagpabilin nga neutral bisan pa sa grabe nga paghingabot para magsoldado sila. Sang World War II kag sang Greek Civil War nga natabo sang 1946-1949, ang aton mga brother padayon nga nagpanindugan nga indi mag-entra sa militar ukon sa mga gerilya, amo nga ginpatay ang iban sa ila. Wala gid sila nagkompromiso, kundi padayon nila nga ginsugid ang mensahe sang Biblia parte sa paghidait, kag ang kadamuon sang mga Saksi sa Greece nagdugang halin sa 178 sang 1940 asta sa 2,808 sang 1949.

Ginpangpriso ang mga nangindi nga magsoldado bangod sa ila konsiensia. Kon totalon, 3,788 tanan ka brother ang ginpriso bangod sa ila neutralidad. Sang ulihi, sang 1997, gin-aprobahan gid man sang Greece ang kasuguan nga nagatugot sang alternative civilian service. Subong, mga 100 ka brother sa Greece ang nagahimo sang alternative civilian service.

Sang 2022 nga tuig sang pag-alagad, ang Greece may 27,995 ka manugbantala kag 420 ang nabawtismuhan.

Sang nagligad nga 100 ka tuig, maathag gid nga ginabuligan ni Jehova ang aton mga kauturan sa Greece bangod sa ila pagtuo sa iya kag malig-on nga determinasyon nga indi magtuon sa pagpakig-away.—Isaias 2:4.