Sang Agosto 18, 2023, gin-release ni Brother Kenneth Cook, Jr., sang Nagadumala nga Hubon ang gin-revise nga Bag-ong Kalibutan nga Badbad sang Balaan nga Kasulatan sa Chichewa nga lenguahe. Gin-release ini nga Biblia sa una nga adlaw sang 2023 “Mangin Mapinasensiahon”! nga Rehiyonal nga Kombension nga ginhiwat sa Lilongwe Assembly Hall sa Lilongwe, Malawi. Ang mga nag-attend nakabaton sang naimprinta nga kopya sini nga Biblia kag puede man nila ma-download ang digital nga pormat paagi sa pag-connect sang ila mga gadyet sa JW Box.

Ang pamulongpulong sa pag-release gin-stream paagi sa JW satellite channel sa duha ka stadium sa central kag southern nga mga rehiyon sang pungsod, sa iban pa nga mga lugar sang asembleya, kag sa kalabanan nga mga Kingdom Hall sa Malawi. Dugang pa, ang programa gin-stream man sa pila ka Kingdom Hall sa mga lugar nga nagahambal sang Chichewa sa Mozambique. Nalipay ang 77,112 nga nag-attend sa pamulongpulong sa pag-release sini nga Biblia sa duha ka stadium kag sa iban pa nga mga lugar nga ginhiwatan sang asembleya. Linibo man ang naka-connect sa programa sa mga Kingdom Hall.

Ang Chichewa amo ang panguna nga lenguahe sang Malawi kag ginahambal sang sobra pulo ka milyon ka tawo sa pungsod. Ginahambal man ini sa pila ka lugar sa Mozambique, South Africa, Zambia, kag Zimbabwe. Ang Bag-ong Kalibutan nga Badbad Sang Cristianong Griegong Kasulatan sa Chichewa gin-release sang 2006, kag ang Bag-ong Kalibutan nga Badbad gin-release sang 2010. Nalipay gid ang mga kauturan nga may kompleto kag na-revise na sila nga Bag-ong Kalibutan nga Badbad sang Balaan nga Kasulatan sa Chichewa.

Ang isa ka utod nagsiling: “Madamo nga tawo nga nagahambal sang Chichewa nga mabantalaan namon ang may translation sang Biblia nga nagagamit sang daan na nga lenguahe. Kon pangabayon namon sila nga magbasa sang isa ka bersikulo sa ila Biblia, indi nila maintiendihan ang kahulugan sang bersikulo. Pero mahapos intiendihon ang Bag-ong Kalibutan nga Badbad. Gusto ko na gid gamiton ini sa ministeryo!”

Nagasalig kita nga ining gin-revise nga Bag-ong Kalibutan nga Badbad sang Balaan nga Kasulatan makabulig sa mga kauturan nga nagahambal sang Chichewa pati man sa mga interesado nga ‘magkalipay sa kasuguan ni Jehova.’—Salmo 1:2.