Sang Agosto 2022, ginpahibalo nga puede na makapamalaybalay sa Ukraine kon safe na ini nga himuon. Eksayted gid ang mga kauturan nga mag-preaching. Madamo sila sang naistorya nga nagpamati gid sa mensahe sang Biblia. Ang isa ka tawo nga nagpasugot nga mag-Bible study nagsiling: “Sang makita ko ang kahadlok kag pag-antos bangod sa nagapadayon gihapon nga inaway, nangin maathag sa akon nga ang Dios lang ang makasolbar sang mga problema sang tawo.” Ari ang mga eksperiensia sa pagpamalaybalay didto.

Si Ruslan nga halin sa Lanivtsi Congregation medyo ginakulbaan sang nagpamalaybalay sila liwat. Sia kag ang iya asawa nagpangamuyo kay Jehova nga hatagan sila sang kaisog kag buligan sila nga makita ang mga tawo nga interesado nga makabati parte sa paglaum nga mas matahom nga palaabuton. Daw indi makapati ini nga mag-asawa kay sa sulod lang sang una nga duha ka oras sang ila pag-preaching, nakaistorya sila sa walo ka tawo kag tanan sila nagpasugot nga mag-Bible study.

Samtang naga-preaching si Olha, nga halin sa Kremenets Congregation, may lalaki nga nagpalapit sa iya kag sa iya upod kag ginpamangkot sila kon bala nagaistorya sila sa mga tawo parte sa Pulong sang Dios. Dayon nagsiling ang lalaki: “Nagapanigarilyo ako kag palainom. Bal-an ko nga sa ulihi hukman ako sang Dios. Antes mag-abot ina nga tion, gusto ko nga magbag-o.” May mga brother sa sina nga lugar nga naghimo sang iskedyul para ma-Bible study ini nga lalaki.

Samtang naga-preaching upod sa iya grupo sa isa ka village, nakita ni Vasyl nga halin sa Lviv-Riasne-Skhidnyi Congregation, ang balay sang isa ka babayi nga naistorya niya sadto pila ka tuig na ang nagligad. Nadumduman niya nga akig sadto ang babayi kag indi mag-istorya sa mga Saksi ni Jehova. Nanuktok gihapon si Vasyl kag nagtanyag sang Bible study. Nakibot sia nga amo gihapon nga babayi ang nagbukas sang puertahan kag nagsiling ini nga gusto niya maintiendihan ang Balaan nga Kasulatan. Nagpasugot ang babayi nga mag-Bible study kag gin-iskedyul nga balikan sia.

Si Serhii, nga halin sa Illintsi Congregation, nabawtismuhan sang 2021 kag wala pa kaagi pamalaybalay. Nakulbaan sia gani naghanda sia sing maayo. Si Serhii nagsiling: “Pila ka beses ko nga gintan-aw ang mga video sa sampol nga pag-istoryahanay. Dayon, kinahanglan ko na lang magpakaisog.” Nagsiling sia nga ang iya kulba ginbuslan sang grabe nga kalipay bangod may kahigayunan sia nga isugid ang maayong balita sa iban.

Amo man sini ang eksperiensia ni Nikol, nga halin sa Rozdil Congregation. Nangin unbaptized publisher sia sang Agosto 2022. Sia nagsiling: “Ginakulbaan ako kag nahadlok ako magpamalaybalay. Pero sang nahimo ko na ini, naeksperiensiahan ko nga kanami gali magpamalaybalay kag mag-istorya sa mga tawo parte kay Jehova!”

Ang masunod amo ang report halin sa Ukraine nga natipon asta sang Nobiembre 11, 2022. Ini nga mga numero base sa kompirmado nga mga report sang mga kauturan. Pero mahimo nga indi lang amo sini ang aktual nga mga report bangod indi pirme makontak ang tanan nga rehiyon sa pungsod.

• 46 ka kauturan ang napatay

• 97 ka kauturan ang nasamaran

• 12,569 ka kauturan ang nagbakwit

• 590 ka balay ang nawasak

• 645 ka balay ang may daku nga guba

• 1,722 ka balay ang may gamay nga guba

• 6 ka Kingdom Hall ang nawasak

• 19 ka Kingdom Hall ang may daku nga guba

• 63 ka Kingdom ang may gamay nga guba

• 27 ka Disaster Relief Committee (DRC) ang nagapanghikot sa Ukraine

• 53,948 ka kauturan ang direkta nga ginbuligan sang DRC para makakita sang safe nga dalayunan

• 25,983 ka kauturan ang nagpalagyo pakadto sa iban nga pungsod kag ginabuligan subong sang ila Cristianong mga kauturan sa sina nga mga pungsod