Sang Enero 1, 2020, ang pamilya Bethel sa Britain nagsugod na sa pagsaylo sa bag-o nga pasilidad malapit sa Chelmsford, Essex. Ginapaabot nga sa Marso 2020, ang tanan nga bug-os tion nga boluntaryo nagaistar na kag nagatrabaho sa bag-o nga branch office.

Sugod pa sang 1959, ang branch sa Britain ara sa Mill Hill, London. Samtang nagauswag ang pagbantala kag nagadamo ang hilikuton, nagbakal pa gid sang iban nga mga bilding sa sarisari nga bahin sang London. Bangod sini, madamo nga bilding ang kinahanglan mentinahon kag kinahanglan pa magbiyahe sang mga Bethelite para makakadto sa iban nga mga bilding. May tion man nga ini nga branch nagaimprinta sang mga publikasyon, kag nakaimprinta pa gani ini sang sobra 10 porsiento sang mga literatura para sa bilog nga kalibutan. Sang Marso 2018, pagkatapos sang 92 ka tuig nga pag-imprinta, gin-untat ini kag ginbaligya ang mga printing press. *

Naglawig sing lima ka tuig ang pagpatindog sang bag-o nga branch sa Britain. Subong nga ara na ang tanan nga departamento sang Bethel sa isa ka lugar, mapadasig na ang obra kag makakinot sa gasto. May ara ini duha ka production building, mga opisina, kag anom ka residence building nga puede istaran sang sobra 400 ka tawo. May isa man ini ka multifunction building nga puede himuon nga awditoryum, dining room, kag lugar para sa mga okasyon.

Ang branch sa Britain nagadumala sang pagbantala nga hilikuton sa madamo nga teritoryo, lakip ang Falkland Islands, Guernsey, Ireland, Isle of Man, Jersey, kag Malta. Ang bag-o nga branch magapokus sa pag-obra sang mga audio, video, kag digital publication. Padayon man nga suportahan sang branch ang espirituwal nga mga hilikuton sang sobra 150,000 ka manugbantala, nga nagaalagad sa sobra 1,800 ka kongregasyon.

Ang mga tour sa bag-o nga Bethel magasugod sa Abril 6, 2020. Makita sang mga bisita ang mga eksibit pareho sang kasaysayan sang Biblia sa Britain kag Ireland, kag ang nabulig sang Bethel sa madasig nga pag-uswag sang organisasyon ni Jehova.

Si Brother Stephen Hardy, nga miembro sang Komite sang Sanga sa Britain, nangin bahin sini nga proyekto halin sa umpisa. Ginhambal niya ang ginabatyag sang kalabanan: “Ginpahulag gid ni Jehova ang madamo nga kauturan halin sa Britain kag sa iban pa nga pungsod nga magbulig sa sini nga proyekto. Wala gid namon ginpaabot nga amo sini ang resulta, kag ang kadayawan para gid kay Jehova.”—Efeso 3:20.