Ang tawo nga indi makalakat nagapungko kag nagapakilimos sa puertahan sang templo kada adlaw. Isa ka hapon, nakita niya si Pedro kag si Juan nga nagapasulod sa templo. Nagsiling sia sa ila: ‘Palihug, limusi man ninyo ako.’ Si Pedro nagsiling: ‘May ihatag ako sa imo nga mas maayo pa sangsa kuarta. Sa ngalan ni Jesus, maglakat ka!’ Dayon ginbuligan sia ni Pedro nga magtindog, kag ang tawo naglakat! Nalipay gid ang mga tawo sa sini nga milagro amo nga madamo pa ang nangin tumuluo.

Pero naakig ang mga saserdote kag ang mga Saduceo. Gindakop nila ang mga apostoles, gindala sa korte, kag nagsiling: ‘Sin-o ang naghatag sa inyo sing gahom nga ayuhon ini nga tawo?’ Si Pedro nagsabat: ‘Nabaton namon ang gahom halin kay Jesucristo nga ginpatay ninyo.’ Ang mga lider sang relihion nagsinggit: ‘Untati na ninyo ang pag-istorya parte kay Jesus!’ Pero ang mga apostoles nagsiling: ‘Dapat namon iistorya ang parte sa iya. Indi kami mag-untat.’

Sa tapos mahilway si Pedro kag si Juan, nagkadto sila sa iban nga disipulo kag ginsugid ang natabo. Tingob sila nga nangamuyo, nga nagapangabay kay Jehova: ‘Palihug, buligi kami nga mangin maisog para mapadayon namon ang imo hilikuton.’ Ginhatag sa ila ni Jehova ang iya balaan nga espiritu, kag padayon sila nga nagbantala kag nagpang-ayo. Nagadamo na gid ang tumuluo. Nahisa gid ang mga Saduceo amo nga gindakop nila ang mga apostoles kag ginpapriso. Pero pagkagab-i, nagpadala si Jehova sing anghel nga nagbukas sang mga puertahan sang prisuhan kag nagsiling sa mga apostoles: ‘Balik kamo sa templo kag magpanudlo didto.’

Pagkaaga, ginpahibalo ang Sanhedrin, ang korte sang mga lider sang relihion: ‘Nakandaduhan pa ang prisuhan, pero ang mga lalaki nga gindakop ninyo wala na! Ara sila sa templo kag nagatudlo sa mga tawo!’ Gindakop liwat ang mga apostoles kag  gindala sa Sanhedrin. Ang mataas nga saserdote nagsiling: ‘Ginsugo namon kamo nga untatan na ang pag-istorya parte kay Jesus!’ Pero nagsabat si Pedro: “Dapat namon tumanon ang Dios subong manuggahom sa baylo sang mga tawo.”

Naakig na gid ang mga lider sang relihion amo nga gusto nila patyon ang mga apostoles. Pero ang Fariseo nga si Gamaliel nagtindog kag nagsiling: ‘Mag-andam kamo! Posible nga kaupod sini nga mga tawo ang Dios. Gusto gid bala ninyo makig-away sa Dios?’ Namati sila sa iya. Sa tapos nila mabunal ang mga apostoles, ginsugo nila sila liwat nga untatan ang pagbantala kag dayon ginpalakat sila. Pero wala ini makapauntat sa mga apostoles. Padayon sila nga nagbantala sang maayong balita sing maisugon, sa templo kag sa mga balay.