Sang gin-aresto si Jesus sa hardin sang Getsemane, ginbiyaan sia sang mga apostoles kag nalagyo sila bangod sa kahadlok. Pero, ang duha sa ila nag-untat sa pagpalagyo. Sila amo si Pedro “kag ang isa pa ka disipulo,” nga mahimo gid nga si apostol Juan. (Juan 18:15; 19:35; 21:24) Mahimo maabtan pa nila si Jesus samtang ginadala sia sa balay ni Anas. Sang ginpadala ni Anas si Jesus sa Mataas nga Saserdote nga si Caifas, nagsunod sanday Pedro kag Juan sa malayo. Nagalalain sila kon bala unahon nila ang ila kabuhi ukon mabalaka sila sa matabo sa ila Agalon.

Kilala si Juan sang mataas nga saserdote, gani nakasulod sia sa luwang sa balay ni Caifas. Nagpabilin si Pedro sa gua sa may puertahan asta nga nagbalik si Juan kag gin-istorya ang alagad nga babayi nga manugbantay sa puertahan. Dayon ginpasulod man si Pedro.

Matugnaw sadto nga gab-i, gani ang mga ara sa luwang mahimo may dabok. Nagpungko si Pedro upod sa ila para magpainit-init samtang ginahulat niya “agod tan-awon ang matabo” sa bista ni Jesus. (Mateo 26:58) Samtang ara sa palibot sang dabok, nahimutaran sang manugbantay sa puertahan si Pedro. “Indi bala isa ka man sa mga disipulo sini nga tawo?” pamangkot niya. (Juan 18:17) Kag indi lang sia ang nakakilala kay Pedro kag nagsiling nga kaupod niya si Jesus.—Mateo 26:69, 71-73; Marcos 14:70.

Naakig gid si Pedro. Indi niya gusto nga matalupangdan, amo nga nagpalayo sia sa alagyan. Gani ginpanghiwala ni Pedro nga kaupod niya si Jesus, kag nakasiling sia: “Wala ako makakilala sa iya kag wala ako makahangop sang imo ginasiling.” (Marcos 14:67, 68) “Nagpanumpa” pa gani sia nga matuod ang iya ginhambal kag handa sia nga silutan kon indi ini matuod.—Mateo 26:74.

Sa amo man nga tion, padayon nga ginabista si Jesus nga mahimo gid nga sa balay ni Caifas sa ibabaw sang luwang. Mahimo makita ni Pedro kag sang iban pa nga nagahulat sa idalom ang nagapasulod-pagua nga mga saksi nga ginadala didto.

Ang tono sang panghambal ni Pedro nga taga-Galilea nagapakita nga nagabutig sia. Dugang pa, ang isa nga ara sa grupo paryente ni Malco, nga ang dulunggan sini gin-utas ni Pedro. Gani ginsilingan niya si Pedro: “Indi bala nakita ko ikaw sa hardin kaupod niya?” Sang ginpanghiwala ini ni Pedro sa ikatlo nga tion, nagpamalo ang manok, subong sang gintagna.—Juan 13:38; 18:26, 27.

Mahimo gid nga sadto nga tion ara si Jesus sa balkonahe kag makita niya ang luwang. Nagbalikid ang Ginuo kag nagtulok kay Pedro, kag mahimo natandog gid si Pedro. Nadumduman niya ang ginsiling ni Jesus mga pila pa lang ka oras ang nagligad sa kuarto sa ibabaw. Hunahunaa ang ginabatyag ni Pedro sang narealisar niya ang iya ginhimo! Naggua si Pedro kag naghilibion gid.—Lucas 22:61, 62.

Ngaa natabo ini? Ngaa napanghiwala ni Pedro—nga kompiansa gid sa iya kalig-on sa espirituwal kag pagkamainunungon—ang iya Agalon? Ginpatiko ang kamatuoran, kag ginpagua nga si Jesus isa ka kriminal. Sa tion nga pangapinan kuntani ni Pedro ang inosente nga tawo, gintalikdan niya ang Isa nga “may pinamulong sang kabuhi nga wala sing katapusan.”—Juan 6:68.

Ang masubo nga natabo kay Pedro nagapakita nga bisan ang tawo nga may pagtuo kag debosyon mahimo madulaan sing balanse kon indi gid sia handa sa wala ginapaabot nga mga pagtilaw ukon pagsulay. Kabay pa nga ang natabo kay Pedro mangin paandam sa tanan nga alagad sang Dios!