LEKSION 44
Ang Tanan Bala nga Selebrasyon Nagapalipay sa Dios?
Gusto ni Jehova nga malipay kita kag magselebrar man kon kaisa. Pero ang tanan bala nga selebrasyon kag holiday nagapalipay sa iya? Paano naton mapakita nga palangga naton si Jehova kon may mga okasyon?
1. Ngaa madamo nga selebrasyon ang wala nagapalipay kay Jehova?
Mahimo makibot ka gid nga madamo nga selebrasyon ang wala nabase sa Biblia ukon naghalin sa mga pagano. Ini nga mga selebrasyon mahimo may labot sa butig nga relihion. Mahimo may labot man ini sa espiritismo ukon sa pagpati nga ang kalag indi mapatay. Ang pila ka selebrasyon naghalin sa disparatis ukon pagpati sa suerte. (Isaias 65:11) Ginpaandaman ni Jehova ang iya mga sumilimba: “Magbulag kamo . . . kag untati ninyo ang pagtandog sa indi matinlo nga butang.”—2 Corinto 6:17. a
2. Ano ang ginabatyag ni Jehova sa mga selebrasyon nga nagapadungog sing sobra sa mga tawo?
Nagpaandam si Jehova nga indi kita ‘magsalig sa mga tawo lang.’ (Basaha ang Jeremias 17:5.) Ang iban nga selebrasyon nagapadungog sa mga manuggahom ukon sa mga soldado. Ginaselebrar sang iban ang mga simbulo ukon kahilwayan sang pungsod. (1 Juan 5:21) Ginapadunggan pa gani sang iban ang pulitikal ukon sosyal nga mga organisasyon. Ano ang batyagon ni Jehova kon padunggan naton sing sobra ang isa ka tawo ukon organisasyon, labi na kon ang ila ginapatihan wala nagahisanto sa Iya kabubut-on?
3. Ngaa nangin malain ang iban nga selebrasyon?
Ang Biblia nagasiling nga malain ang “sobra nga pag-inom, magansal nga kinalipay, [kag] paindisanay sa pag-inom.” (1 Pedro 4:3) Sa iban nga selebrasyon, ang mga tawo nagapinagusto lang kag nagahimo sang imoral. Para padayon nga mangin abyan ni Jehova, dapat naton likawan ining malain nga mga butang.
USISAA PA GID
Hibaluon naton kon paano ka makahimo sing husto nga mga desisyon parte sa mga selebrasyon para mapalipay mo si Jehova.
4. Likawi ang mga selebrasyon nga wala nagapalipay kay Jehova
Basaha ang Efeso 5:10, dayon binagbinaga ini nga mga pamangkot:
-
Ano ang dapat naton hibaluon kon maselebrar kita sang isa ka okasyon?
-
Ano nga mga selebrasyon ukon holiday ang ginahimo sa inyo lugar?
-
Sa banta mo, ina bala nga mga selebrasyon nagapalipay kay Jehova?
Halimbawa, nakapamensar ka bala kon ano ang pagtamod sang Dios sa birthday? Wala nagsiling ang Biblia nga may sumilimba si Jehova nga nagselebrar sang birthday, pero nagasugid ini sang duha ka birthday nga ginselebrar sang mga wala nagaalagad sa Iya. Basaha ang Genesis 40:20-22 kag Mateo 14:6-10. Dayon, binagbinaga ini nga mga pamangkot:
-
Ano ang pareho nga natabo sa sining duha ka birthday?
-
Base sa sini nga mga rekord sang Biblia, ano sa banta mo ang ginabatyag ni Jehova parte sa birthday?
Pero mahimo mamangkot ka, ‘Maakig bala si Jehova kon magpartisipar ako sa birthday ukon sa iban nga selebrasyon nga wala nabase sa Biblia?’ Basaha ang Exodo 32:1-8. Dayon tan-awa ang VIDEO, kag binagbinaga ang masunod nga mga pamangkot.
-
Ngaa dapat naton hibaluon kon ano ang makapalipay kay Jehova?
-
Paano naton mahimo ina?
Paano naton mahibaluan kon ang isa ka selebrasyon wala nagapalipay sa Dios?
-
Nabase bala ini sa mga panudlo nga wala sa Biblia? Para mahibaluan mo, usisaa ang ginhalinan sini.
-
Nagapadungog bala ini sing sobra sa mga tawo, organisasyon, ukon pungsod? Si Jehova ang dapat gid naton padunggan kag saligan nga magasolbar sang mga problema sang kalibutan.
-
Ang mga kustombre kag ginahimo bala sa sini wala nagahisanto sa ginasiling sang Biblia? Dapat padayon kita nga mangin matinlo sa moral.
5. Buligi ang iban nga respetuhon ang imo pagpati
Mabudlay mangindi kon ginapilit ka sang iban nga mag-entra sa mga selebrasyon nga wala nagapalipay kay Jehova. Mangin mapinasensiahon kag may pagrespeto nga ipaathag sa ila ang imo desisyon. Para mabal-an mo kon paano ini himuon, tan-awa ang VIDEO.
Basaha ang Mateo 7:12, dayon binagbinaga ini nga mga pamangkot:
-
Base sa sini nga bersikulo, dapat mo bala hambalan ang imo indi Saksi nga pamilya nga indi sila magselebrar sang holiday?
-
Ano ang puede mo himuon para mapasalig ang imo pamilya nga palangga mo gihapon sila bisan wala ka nagaentra sa ila selebrasyon?
6. Gusto ni Jehova nga malipay kita
Gusto ni Jehova nga malipay kita upod sa aton pamilya kag mga abyan. Basaha ang Manugwali 8:15, dayon binagbinaga ini nga pamangkot:
-
Paano ini nga bersikulo nagapakita nga gusto ni Jehova nga malipay kita?
Gusto ni Jehova nga malipayon ang iya katawhan sing ululupod. Tan-awa ang VIDEO para makita mo nga amo sini ang nagakatabo sa amon internasyonal nga mga kombension.
Basaha ang Galacia 6:10, dayon binagbinaga ini nga mga pamangkot:
-
Kinahanglan bala nga may okasyon gid para makahimo ka sing “maayo” sa iban?
-
Ano nga klase sang paghatag ang mas makapalipay sa imo—obligado ka sa paghatag kay may okasyon ukon kinabubut-on ka nga nagahatag?
-
Madamo nga Saksi ang nagaplano kon kaisa sang okasyon para sa ila kabataan kag ginahatagan sila sang mga regalo. Kon may bata ka, ano ang puede mo himuon para malipay sia?
KON MAGSILING ANG IBAN: “Indi man importante ang ginhalinan sang okasyon. Ang importante malipayon kamo sang imo pamilya kag mga abyan.”
-
Ano ang isabat mo?
SUMARYO
Gusto ni Jehova nga malipay kita upod sa aton pamilya kag mga abyan. Pero gusto niya nga likawan naton ang mga selebrasyon nga wala nagapalipay sa iya.
Rebyu
-
Ano ang puede naton ipamangkot para mahibaluan kon ang isa ka selebrasyon wala nagapalipay kay Jehova?
-
Ano ang puede naton himuon para maintiendihan sang aton pamilya kag mga abyan ang aton desisyon parte sa mga selebrasyon?
-
Ngaa makasiling ka nga gusto ni Jehova nga mangin malipayon kita?
DUGANG NGA IMPORMASYON
Hibalua ang pila ka okasyon nga wala ginaselebrar sang mga Cristiano.
“Ngaa ang mga Saksi ni Jehova Wala Nagasaulog sang Pila ka Selebrasyon?” (Artikulo sa website)
Basaha ang apat ka rason kon ngaa nagapati kami nga ang pagselebrar sang birthday wala nagapalipay sa Dios.
“Ngaa Wala Nagaselebrar sang Birthday ang mga Saksi ni Jehova?” (Artikulo sa website)
Tan-awa kon paano mapahalipay sang mga bata si Jehova sa tion sang mga holiday.
Minilyon ka Cristiano ang wala nagaselebrar sang Krismas. Ano ang ila nabatyagan sa ila desisyon?
“Nakita Nila ang Mas Maayo Pa Sangsa Krismas” (Ang Lalantawan, Disiembre 1, 2012)
Basi Manamian Ka Man
MGA PIRME GINAPAMANGKOT
Ano ang Pagtuon sa Biblia nga Ginatanyag sang mga Saksi ni Jehova?
Ang interactive nga programa nga ginatanyag sang mga Saksi ni Jehova libre lang, kag puede mo gamiton ang bisan ano nga translation sang Biblia nga gusto mo. Mahimo mo man hagaron ang imo bilog nga pamilya ukon ang bisan sin-o nimo nga abyan nga mag-upod sa imo.
