Sa semana sang Oktubre 29, 2012, manubo katama ang kadamuon sang pagpatay kag pagpanghold-ap sa New York City kon ikumparar sa amo man sini nga mga inadlaw sang 2011. Ang rason? Ang tuman kabaskog nga bagyo nga Sandy nga nagwaswas sa East Coast sang Estados Unidos, nga gintunaan sang pagbrown-out sa madamo nga lugar. “Kada may natural nga kalamidad ukon daku nga trahedya pareho [sang pag-atake sang mga terorista sang Septiembre 11, 2001], natalupangdan namon nga naganubo dayon ang kadamuon sang krimen,” siling ni Paul Browne sang New York Police Department. Pero, wala man makibot si Browne nga mas madamo ang ginransak nga mga balay ukon bilding. “Madamo nga lugar ang wala sing suga,” siling niya.

Nagakabalaka ang mga sientipiko nga sa Antarctica ang ekolohiya yara sa katalagman bangod sa pagdamo sang espesyi sang mga tanom nga halin sa iban nga lugar. Linibo ang nagabisita sa sining kontinente kada tuig. Ginabulubanta nga ang kada isa sa ila indi hungod nga nagadala sing mga 9.5 ka binhi sa ila sapatos ukon mga bag. Madamo sining espesyi ang makita na sa Western Antarctic Peninsula.

Isa ka 83 anyos nga tigulang nga babayi ang una nga natakdan sang titanium nga sag-ang nga ginhimo paagi sa 3-D laser printer. Naguba ang sag-ang sining pasyente bangod sa impeksion sa tul-an. Pero subong, normal na ang iya pagkaon, pagginhawa, kag paghambal. Ining titanium nga sag-ang amat-amat nga ginporma sang laser printer kag gintakod sa pasyente paagi sa operasyon.

Sa sulod sang isa ka tuig nga pagdumili sang pagpanigarilyo sa pila ka pangpubliko nga lugar sa Germany, nakita sa pagtuon sa isa ka grupo nga nagnubo sing mga 13.3 porsiento ang mga nagakaospital bangod sa angina pectoris, isa ka sahi sang balatian sa tagipusuon, kag nagnubo sing mga 8.6 porsiento ang mga gin-atake sa tagipusuon.