Sang nasayasat ka nga may scoliosis, nabuligan ka bala sang mga doktor?

Sa sulod sang mga tatlo ka tuig, ginaobserbahan ako sang duha ka doktor, pero padayon nga nagalala ang kurba sang akon taludtod. Ang matuod, nangin malubha gid ini amo nga ginaipit sang akon taludtod ang akon tagipusuon kag mga baga, gani nabudlayan ako magginhawa. Kinahanglan gid ako operahan.

Nagpasugot ka bala nga operahan?

Huo. Pero ginsilingan ako nga mabudlay gid ang operasyon. Sa sina nga tion, 116 degree na ang kurba sang akon taludtod, kag grabe na gid ini. Apang sa akon kahimtangan, may isa pa ka pinasahi nga kabudlayan. Bangod sang akon relihioso nga pagtuluuhan, nga nabase sa Biblia, indi ako magpatughong sing dugo. *

Nakakita bala kamo sing doktor nga magpasugot sa pag-opera?

Nakakita kami ni Nanay sing espesyalista sa amon lugar sa Florida, U.S.A. Apang sang ginsilingan ko sia nga indi ako magpatughong sang dugo, nagsiling sia nga wala sing doktor nga magaopera sa sinang komplikado nga operasyon. Isa pa, nagsiling sia nga mahimo indi na ako makalab-ot sing 20 anyos kon indi ako maoperahan. Katorse anyos lang ako sadto.

Ginpaathag mo bala sa iya ang rason sang imo pagtuluuhan?

Huo. Ginsugiran ko sia nga nabase sa Biblia ang akon pagtuluuhan, nga ginsiling sang Dios nga ang dugo sagrado, dugo man ini sang tawo ukon sapat. * Kamatayon ang silot sa mga Israelinhon sadto kon magkaon sila sing dugo! * Ginpakita ko man sa iya ang Binuhatan 15:19, 20. Sa bahin, ginsilingan ang mga Cristiano: “Maglikaw sila sa dugo.” Nagakahulugan ini nga indi ini dapat pag-ipasulod sa lawas sa bisan ano nga paagi—kaunon man ini ukon itughong.

Ano ang reaksion sang doktor?

Nagpamilit gihapon sia nga tughungan ako sang dugo. Kag nakibot ako kay ginsilingan ako sang ospital nga wala gid ako sing bayaran sa operasyon kon magpatughong ako sing dugo.

Maayo gid ina nga tanyag! Ano ang ginhimo ninyo sang imo nanay?

Bisan daw wala sing doktor nga gusto mag-opera nga indi  maggamit sing dugo, nanindugan kami sa amon pagtuluuhan. Dayon nangin komplikado pa gid ang sitwasyon. Suno sa kasuguan, menor-de-edad pa ako. Gani bangod naggrabe ang akon kahimtangan, gindala sa korte ang akon kaso. Maayo na lang kay ginhatagan kami sing 30 ka adlaw nga plaso sang abogado sang gobierno sang Florida nga mangita sing doktor nga magatahod sang akon panindugan.

Nakakita bala kamo?

Huo! Ginkontak sang Hospital Liaison Committee sang mga Saksi ni Jehova sa amon lugar ang isa ka espesyalista sa scoliosis sa New York nga komporme parte sa operasyon nga indi maggamit sing dugo, kag nagpasugot sia nga makigkita sa akon. Gani nakakita kami sing doktor antes matapos ang plaso nga ginhatag sang korte. *

Ti, kamusta ang operasyon?

Madinalag-on gid ini! Agod matadlong ang akon taludtod, ginsal-utan ni Dr. Robert M. Bernstein sing ma-adjust nga asero ang akon likod. Ginhimo niya ang operasyon sa duha ka hugna nga may bal-ot nga duha ka semana.

Ngaa duha gid ka hugna?

Kon sa una nga operasyon madamo sing dugo nga madula, ang bal-ot nga panahon magahatag sa akon lawas sing tion nga makapatubas sing dugang nga pula nga selula sang dugo para sa masunod nga operasyon. Apang sa duha ka operasyon, diutay lang nga dugo ang nadula bangod sa maayo nga pagplano, ikasarang, kag mauti nga pag-opera sang mga doktor. Madasig man ako nga nag-ayo, kay wala sing komplikasyon nga resulta kuntani sa pagpatughong sing dugo. *

Ano ang ginbatyag sang imo doktor?

Nalipay gid sia! “Ang pagbulong,” siling niya “indi lamang pag-opera.” Para sa iya, dapat hatagan sing konsiderasyon sang mga doktor ang pasyente, pati na ang iya pagtuluuhan kag mga prinsipio. Madamo nga tawo luwas sa mga Saksi ni Jehova ang may amo man sina nga pagtamod.