Ginpamangkot ini sang iban sang nabasa nila ini nga kasaysayan. Pero ginsambit sa sini nga teksto ang duha ka tawo nga may pareho nga ngalan nga Mefiboset. May matun-an kita kon binagbinagon naton ang natabo sa ila.

May pito ka anak nga lalaki kag duha ka anak nga babayi si Saul nga hari sang Israel. Si Jonatan ang iya subang nga lalaki. Sang ulihi, nagbun-ag sing anak nga lalaki ang babayi ni Saul nga si Rizpa, kag ginngalanan nila sia nga Mefiboset. May anak man si Jonatan nga ginngalanan niya nga Mefiboset. Gani may anak kag apo si Hari Saul nga may pareho nga ngalan nga Mefiboset.

Gindumtan ni Hari Saul ang mga Gibeonhon nga kaupod sang mga Israelinhon. Ginpamatay niya sila kag gusto niya pamatyon sila tanan. Sala gid ini. Ngaa? Bangod sang panahon ni Josue, nakigkatipan ang mga pangulo sang Israel sa mga Gibeonhon nga indi sila pagpatyon.—Jos. 9:3-27.

Ginapatuman gihapon ini nga katipan sang panahon ni Hari Saul. Pero wala gintuman sang hari ini nga katipan kay gusto niya pamatyon ang tanan nga Gibeonhon. Bangod sini, “nakasala si Saul kag ang iya panimalay.” (2 Sam. 21:1) Sang nangin hari si David, nakighambal sa iya ang nabilin nga mga Gibeonhon parte sa sala nga ginhimo ni Saul. Ginpamangkot sila ni David kon ano ang gusto nila nga himuon niya para mabayaran ang malain gid nga ginhimo ni Saul kag para pakamaayuhon ni Jehova ang duta sang Israel. Wala nagpangayo sang kuarta ang mga Gibeonhon. Sa baylo, ginpangabay nila nga itugyan sa ila ang pito ka anak nga lalaki sang tawo nga “nagplano nga papason” sila, kag patyon nila ini nga mga lalaki. (Num. 35:30, 31) Nagsugot si David sa ila ginpangabay.—2 Sam. 21:2-6.

Patay na sadto si Saul kag si Jonatan kay napatay sila sa inaway. Pero buhi pa ang anak ni Jonatan nga si Mefiboset. Napiang sia sang bata pa sia kay nabuy-an sia sang iya yaya, kag inosente sia sa ginhimo sang iya lolo nga pagpatay sa mga Gibeonhon. Nangin suod nga mag-abyan si David kag si Jonatan kag nakigkatipan sila sa ila pag-abyanay. Nakabenepisyo sa sini nga katipan ang mga kaliwat ni Jonatan, lakip ang iya anak nga si Mefiboset. (1 Sam. 18:1; 20:42) Nagsiling ang Biblia: “Naluoy ang hari [nga si David] kay Mefiboset nga anak ni Jonatan nga anak ni Saul tungod sa ginpanumpa ni David kag ni Jonatan nga anak ni Saul sa ngalan ni Jehova.”—2 Sam. 21:7.

Gani ano ang ginhimo ni David? Gintugyan niya sa mga Gibeonhon ang duha ka anak nga lalaki ni Saul, nga ang ngalan sang isa amo si Mefiboset. Gintugyan man niya ang lima ka apo nga lalaki ni Saul. (2 Sam. 21:8, 9) Paagi sa ginhimo ni David, nadula ang malain nga epekto sa duta sang Israel nga resulta sang sala ni Saul.

May matun-an kita sa sini nga kasaysayan. Maathag ang ginsiling sang kasuguan sang Dios: “Indi pagpatyon ang mga anak tungod sa ginahimo sang ila amay.” (Deut. 24:16) Kon inosente ang duha ka anak kag lima ka apo ni Saul, indi gid pagtugutan ni Jehova ang ginhimo sa ila. Nagsiling pa ang kasuguan: “Ang isa ka tawo dapat patyon tungod sa iya kaugalingon nga sala.” Posible nga may ginhimo ang pito ka kaliwat ni Saul nga nagapakita nga ginsuportahan nila ang iya plano nga pamatyon ang tanan nga Gibeonhon. Gani ginpatay sila nga pito bangod sang ila ginhimo nga sala.

Ginapakita sini nga kasaysayan nga indi puede irason sang isa ka tawo nga indi sia dapat pagsilutan sa iya ginhimo nga sala kay nagsunod lang sia sa sugo. Dapat sia manabat sa iya ginhimo. Ang isa ka hulubaton nagasiling: “Tapana ang imo alagyan, kag mangin malig-on ang tanan mo nga dalanon. Indi ka magliso sa tuo ukon sa wala. Likawi ang malain.”—Hulu. 4:24-27; Efe. 5:15.