IMPORTANTE gid ang maayo nga ngalan, ukon reputasyon, amo nga sa iban nga pungsod, may mga kasuguan nga nagaamlig sa sini. Nagalakip ini sang libel, (ang pagbalhag ukon pagpagua sa media sang impormasyon nga makaguba sa ngalan sang isa) kag pagpasipala (ang paghambal sing indi maayo parte sa isa ka tawo). Nagapahanumdom ini sa aton sang halambalanon sang una: “Ang maayo nga ngalan mas maayo nga pilion sangsa madamo nga manggad; ang pagtahod mas maayo sangsa pilak kag bulawan.” (Hulubaton 22:1) Paano naton matigayon ang maayo nga ngalan kag respeto sang iban? May maayo gid nga mga panugda ang Biblia.

Halimbawa, binagbinaga ang ginasiling sang Biblia sa Salmo 15. Sa pagsabat sang pamangkot nga “Sin-o ang makaduaw sa [tolda sang Dios]?” ang salmista nagsulat: “Ang isa nga . . . nagahimo sing matarong kag nagahambal sing kamatuoran sa iya tagipusuon. Sia nga wala nagapasipala, wala nagahimo sing malain sa iya isigkatawo, kag wala nagapakahuya sa iya mga abyan. Ginasikway niya ang mga talamayon . . . Ginatuman niya ang iya saad, bisan pa mabudlay ini tumanon. . . . Kag wala sia nagabaton sing hamham.” (Salmo 15:1-5) Indi bala nga respetuhon mo gid ang tawo nga nagaaplikar sining maayo nga mga prinsipio?

Ang isa pa ka kinaiya nga makabulig para matigayon ang respeto amo ang pagkamapainubuson. “Antes ang kadungganan yara ang pagkamapainubuson,” siling sang Hulubaton 15:33. Binagbinaga: Makita sang mga mapainubuson kon ano pa ang ila palauswagon kag ginatinguhaan nila nga himuon ini. Handa man sila sa pagpangayo sing pasaylo kon makasala sila sa iban. (Santiago 3:2) Ang mga bugalon indi amo sina, sa baylo madali sila maakig. “Ang bugal nagauna sa pagkapukan, kag ang matinaastaason nga espiritu sa pagkasandad,” siling sang Hulubaton 16:18.

Pero, paano kon mantsahan sang iban ang imo maayo nga ngalan? Maakig ka bala dayon? Pamangkuta ang imo kaugalingon, ‘Kon pangapinan ko ang akon ngalan, mapamatud-an ko gid bala sa tanan nga sala ang ginasiling sa akon?’ Ang pagpasaka sing kaso nagakaigo man kon kaisa, pero ang Biblia naglaygay: “Indi ka magpadasudaso sa pagkadto sa korte.” Sa baylo, “mag-areglahanay kamo.” (Hulubaton 25:8, 9, Maayong Balita nga Biblia) * Paagi sa sini, indi ka na magastuhan sa pagpasaka sing kaso sa korte.

Ang Biblia indi lang libro parte sa relihion. Masaligan gid ini nga giya sa pagkabuhi. Ang tanan nga nagaaplikar sang mga laygay sini may mga kinaiya nga nagabulig sa ila nga respetuhon sang iban kag mangin maayo ang ila ngalan.