Nagatan-aw Sia sa Maayo nga Kinaiya
Mangin Suod sa Dios
Nagatan-aw Sia sa Maayo nga Kinaiya
“ANG GINOO nagausisa sang tanan nga tagiposoon, kag nagahangup sang tanan nga painoino sang mga hunahuna.” (1 Cronica 28:9) Ginapakita sining inspirado nga pinamulong nga interesado gid si Jehova sa aton. Ginatan-aw ni Jehova ang aton maayo nga mga kinaiya bisan indi kita perpekto. Ginapakita ini sa mga ginsiling niya kay Abias sa 1 Hari 14:13.
Nagdaku si Abias sa tama kalain nga pamilya. Ang iya amay nga si Jeroboam amo ang nanguna sa apostasya. * Gusto ni Jehova nga tinluan ang panimalay ni Jeroboam pareho sa “pagsilhig sang ipot.” (1 Hari 14:10) Pero nagsiling ang Dios nga isa lang ka miembro sang iya pamilya ang hatagan sing disente nga lubong. Ini amo si Abias nga may malala nga balatian. * Ngaa? Nagsiling ang Dios: “Sia lamang ang nahamut-an sang GINOO nga Dios sang Israel” sa panimalay ni Jeroboam. (1 Kings 14:1, 12, 13, MB) Anong ginapakita sining mga pinamulong parte kay Abias?
Wala nagasiling ang Biblia nga si Abias matutom nga alagad sang Dios. Pero may pila sia ka maayo nga kinaiya nga nakita ni Jehova, mahimo may kaangtanan sa iya pagsimba. Suno sa rabiniko nga mga manunulat, naglakbay si Abias pakadto sa templo sa Jerusalem ukon ginpahalin niya ang mga guardia nga ginbutang sang iya amay para indi makakadto ang mga Israelinhon sa Jerusalem.
Bisan wala kita nakahibalo kon ano gid ang iya maayo nga ginhimo, masiling naton nga talalupangdon gid ang iya kaayo. Una, matuodtuod ini kag tinagipusuon. Ikaduha, pinasahi gid ini. Ginpakita niya ini bisan pa ara sia sa “panimalay ni Jeroboam.” Ang isa ka iskolar nagsiling: “Dalayawon gid kon makapabilin ang isa nga maayo bisan ang iya pamilya kag palibot malain.” Ang isa pa ka iskolar nagsiling nga ang kaayo ni Abias, “talalupangdon gid . . . subong nga ang bituon pinakamasanag kon madulom ang kalangitan, kag ang mga sedro pinakamatahom kon napalibutan sing mga kahoy nga wala sing dahon.”
Ang pinamulong sang 1 Hari 14:13 may maayo nga ginatudlo sa aton parte kay Jehova kag kon ano ang ginatan-aw niya sa aton. Dumduma nga may maayo nga nakita ang Dios kay Abias. Mahimo nga gin-usisa ni Jehova ang tagipusuon ni Abias asta nga may nakita sia nga maayo. Kon ikumparar sia sa iya pamilya, nagsiling ang isa ka iskolar nga daw nagaisahanon sia nga perlas “sa nagatinumpok nga bato.” Ginpabaloran gid ni Jehova ang iya kaayo kag ginpadyaan sia sa sini. Ginkaluuyan sia ni Jehova bisan pa ang iya pamilya tama kalain.
Indi bala makalilipay nga ginatan-aw ni Jehova kag ginapabaloran ang aton maayo nga kinaiya bisan pa makasasala kita? (Salmo 130:3) Bangod nahibaluan naton nga ginausisa ni Jehova ang aton tagipusuon kag ginapangita bisan ang pinakagamay nga kaayo sa aton, indi bala nga magasuod pa gid kita sa iya?
[Mga Nota]
^ par. 2 Nagpatindog si Jeroboam sing tinday nga baka para simbahon sang naaminhan nga napulo ka tribo nga ginharian sang Israel para indi magkadto sa templo sa Jerusalem ang mga tawo.
^ par. 2 Sang panahon sang Biblia, kon ang isa indi paghatagan sing disente nga lubong, ginakabig ini nga naakig ang Dios sa iya.—Jeremias 25:32, 33.
