MAY butang bala nga nagustuhan mo gid?— * Kon amo, pareho ka man sa madamo. Pero mabinutig ka bala para makuha ang imo gusto?— Indi. Sakon ang tawo nga nagahimo sina. Hibaluon naton kon paano napahamak si Gehazi sang iya pagkasakon. Alagad sia ni Eliseo nga propeta sang matuod nga Dios nga si Jehova.

Sanday Eliseo kag Gehazi nagkabuhi sang una, mga isa ka libo ka tuig antes natawo ang Anak sang Dios nga si Jesus. Gingamit ni Jehova si Eliseo sa paghimo sang mga milagro! Halimbawa, ang Biblia nagasugid parte sa pangulo sang mga soldado sang Siria nga may aro. Wala sing makabulong sa iya, magluwas kay Eliseo.

Kon nagapang-ayo si Eliseo paagi sa bulig sang Dios, wala sia nagapabayad. Nakahibalo ka bala kon ngaa?— Kay nahibaluan ni Eliseo nga ang mga milagro naghalin kay Jehova—indi sa iya kaugalingon. Sang nag-ayo si Naaman, nalipay gid sia amo nga gusto niya regaluhan si Eliseo sang bulawan, pilak, kag malahalon nga mga bayo. Wala ini ginbaton ni Eliseo, pero gusto gid ini ni Gehazi.

Sang nakahalin na si Naaman, ginlagas sia ni Gehazi nga wala naglisensia kay Eliseo. Sang naabtan niya si Naaman, kabalo ka bala kon ano ang ginsiling ni Gehazi?— ‘Ginpadala ako ni Eliseo para silingon ka nga may nag-abot sia nga duha ka bisita. Gusto niya pangayuon ang duha ka bayo para ihatag ini sa ila.’

 Pero binutig ina! Ginhimuhimo lang ini ni Gehazi. Ginsiling niya ini kay gusto niya ang mga bayo nga ihatag tani ni Naaman kay Eliseo. Siempre, wala sing hinalung-ong si Naaman parte sa sini. Gani nalipay sia nga ihatag kay Gehazi ang mga regalo. Sobra pa ang ginhatag ni Naaman kay Gehazi. Kabalo ka bala kon ano ang masunod nga natabo?—

Pagpauli ni Gehazi, ginpamangkot sia ni Eliseo: ‘Diin ka naghalin?’

‘Wala ako sing ginkadtuan,’ sabat ni Gehazi. Pero ginpahibalo ni Jehova si Eliseo sang ginhimo si Gehazi. Gani nagsiling si Eliseo: ‘Indi ini tion sa pagbaton sang kuarta kag mga bayo!’

Ginkuha ni Gehazi ang kuarta kag mga bayo nga indi iya. Gani ginsaylo sang Dios ang aro ni Naaman kay Gehazi. Ano ang matun-an naton sa sini?— Indi kita dapat maghimuhimo sang istorya.

Ngaa nagbinutig si Gehazi?— Bangod sakon sia. Gusto niya angkunon ang indi iya, kag ginhimo niya ini paagi sa pagbinutig. Bangod sini nag-antos sia sing grabe nga balatian sa bilog niya nga kabuhi.

Sobra pa sa aro ang gin-antos ni Gehazi. Nahibaluan mo bala kon ano?— Nadula niya ang pabor kag gugma sang Dios. Kabay nga indi naton paghimuon ang bisan ano nga makadula sang pabor kag gugma sang Dios sa aton! Kundi, mangin mainayuhon kita kag mahinatagon.