SIN-O sa aton ang wala nakaeksperiensia sang kabudlayan kag nagabatyag nga mangayo sing bulig? Depende sa ginhalinan sang kabudlayan, mahimo pilion naton ang aton abyan nga nagaulikid kag may eksperiensia sa kabudlayan nga aton ginaatubang. Maayo gid nga abyan ang isa nga maluluy-on kag eksperiensiado.

Amo man sini ang ginabatyag sang iban parte sa pangamuyo. Sa baylo nga magpalapit sa Dios—nga sa ila pamatyag daw tuman gid ka halangdon kag makahalawhaw—mas komportable sila sa pagpangayo sing bulig sa mga santos. Para sa ila, mas mahinangpanon ang mga santos kay nakaeksperiensia sila sing mga pagtilaw kag mga kabudlayan nga kinaandan sa mga tawo. Halimbawa, ang nadulaan sang importante nga mga butang mahimo magpalapit kay “Saint” Anthony of Padua—ang tradisyunal nga patron sang nadula ukon ginkawat nga mga butang. Kon nagapangamuyo para sa nagabalatian nga sapat, mahimo pilion nila si “Saint” Francis of Assisi ukon si “Saint” Jude Thaddeus naman kon daw mangampo na sila.

Pero nahisanto bala sa Kasulatan ang pagpangamuyo sa mga santos? Bangod ang aton mga pangamuyo pagpakighambal sa Dios, luyag gid naton mahibaluan: Ginapamatian bala niya ang aton mga pangamuyo? Kag indi man bala kita mamangkot: Ano ang ginabatyag sang Dios kon mangamuyo kita sa mga santos?

Ang pagpangamuyo sa mga santos ginbase sa doktrina sang pagpatunga sang mga santos, nga gintudlo sang Iglesia Katolika. Ang katuyuan amo nga “ang isa ka santos magapakitluoy sa Dios para sa isa nga nagakinahanglan,” suno sa New Catholic Encyclopedia. Gani, ang isa nga nagapangamuyo sa mga santos nagalaum nga mahatagan sia sing espesyal nga pabor paagi sa ila kay ginapaboran sang Dios ang mga santos.

Amo bala sina ang ginatudlo sang Biblia? Ang pila nagasiling nga suno sa mga sinulatan ni apostol Pablo, nagpahamtang sia sing sadsaran nga dapat mangamuyo sa mga santos. Halimbawa, nagsulat sia sa mga Cristiano sa Roma: “Karon ginalaygayan ko kamo, mga kauturan, paagi sa aton Ginuong Jesucristo kag paagi sa gugma gikan sa espiritu, nga magpanikasog kamo upod sa akon sa pagpangamuyo sa Dios para sa akon.” (Roma 15:30) Nagapangabay bala si Pablo sa iya mga masigka-Cristiano nga magpatunga sila sa Dios para sa iya? Wala. Kon binagbinagon, si Pablo nga isa ka apostol ni Cristo, ang dapat nga pangabayon nila nga magpatunga para sa ila. Ginpakita ni Pablo nga nagakaigo nga mangabay sa masigka-Cristiano nga mangamuyo sa Dios para sa aton. Pero tuhay gid kon mangamuyo sa isa nga yara kuno sa langit para ipahibalo niya ang aton pangabay sa Dios. Ngaa?

 Sa Ebanghelyo ni apostol Juan, si Jesus nagsiling: “Ako amo ang dalan kag ang kamatuoran kag ang kabuhi. Wala sing makakadto sa Amay kon indi paagi sa akon.” (Juan 14:6) Nagsiling man sia: “Ang Amay magahatag sa inyo sang bisan ano nga inyo pangayuon sa akon ngalan.” (Juan 15:16, Maayong Balita nga Biblia, HPV) Wala magsiling si Jesus nga sia ang pangamuyuan kag sia na ang mapatunga sa Dios kag sa aton. Sa baylo, para mapamatian ang aton mga pangamuyo, dapat ang Dios ang aton pangamuyuan paagi kay Jesus kag wala na sing iban pa.

Sang ginpangabay si Jesus sang iya mga disipulo nga tudluan sila sa pagpangamuyo, sia nagsabat: “Kon magpangamuyo kamo, magsiling, ‘Amay, pakabalaanon ang imo ngalan.’” (Lucas 11:2) Huo, “kon magpangamuyo” kita, dapat naton ipatuhoy ini sa Dios mismo, indi kay Jesus ukon kay bisan sin-o. Bangod sining maathag nga mga panudlo ni Jesus, indi bala makatarunganon maghinakop nga ang aton mga pangamuyo dapat idiretso sa Dios paagi kay Jesucristo kag indi sa mga manugpatunga ukon sa “mga santos”?

Ang pangamuyo importante gid nga bahin sang aton pagsimba, kag ang pagsimba magluwas sa Dios maathag nga wala nagahisanto sa panudlo sang Biblia. (Juan 4:23, 24; Bugna 19:9, 10) Amo kon ngaa nga ipatuhoy lamang naton ang aton mga pangamuyo sa Dios.

Sa iya Sermon sa Bukid, naghatag si Jesus sang halimbawa sang isa ka bata nga nagapangayo sing makaon sa iya amay. Hatagan bala sang amay ang iya bata sang bato sa baylo sang tinapay? Ukon sang dalitan nga man-ug sa baylo sang isda? (Mateo 7:9, 10) Indi gid ina paghimuon sang mahigugmaon nga ginikanan!

Hunahunaa man ang kaanggid nga ilustrasyon gikan sa pagtamod sang ginikanan. Imadyina nga may ginapangayo gid ang imo bata. Suod kamo, kag mahapos ka lang niya palapitan. Pero bangod sang iya wala basihan nga kahadlok sa imo reaksion, ginpangabay niya ang isa nga amo ang mangayo sa imo. Ano ang batyagon mo? Ano abi kon maanad na sia nga suguon ini nga tawo kag daw amo na sini pirme ang iya himuon? Malipay ka bala sa sini? Siempre indi! Gusto sang mahigugmaon nga mga ginikanan nga palapitan sila mismo sang ila kabataan kag gusto nila nga hilway sila sa pagpangayo sang ila kinahanglanon.

Sa pag-aplikar sang iya ilustrasyon sa bata nga nagapangayo sing pagkaon, si Jesus nagsiling sa kadam-an: “Busa, kon kamo bisan pa malaut makahibalo maghatag sang maayo nga mga dulot sa inyo mga anak, labi pa gid nga ang inyo Amay sa langit magahatag sang maayo nga mga butang sa mga nagapangayo sa iya!” (Mateo 7:11) Wala sing duhaduha, gusto gid sang ginikanan nga hatagan sing maayo nga mga butang ang iya bata. Labi pa gid ang aton Amay sa langit, handum gid niya nga pamatian kag sabton ang aton mga pangamuyo.

Gusto sang Dios nga direkta kita nga mangamuyo sa iya bisan pa nga ginakonsiensia kita sa aton mga sala. Wala niya gintugyan sa iban ang pagpamati sang aton mga pangamuyo. Ang Biblia nagapalig-on sa aton: “Itungtung sa GINOO ang imo lulan, kag sia magaalay-ay sa imo.” (Salmo 55:22) Sa baylo nga magsalig sa pagpatunga sang mga santos ukon sang iban pa, dapat palambuon naton ang positibo nga pagtamod kay Jehova nga Dios.

Nagaulikid ang aton Amay sa langit sa kada isa sa aton. Gusto niya nga buligan kita sa aton mga problema kag ginaagda niya kita nga mangin suod sa iya. (Santiago 4:8) Malipayon kita bangod may kahigayunan kita nga makapalapit sa aton Dios kag Amay nga “nagapamati sang pangamuyo”!—Salmo 65:2.