Si Alberto nangin soldado sa sulod sang mga napulo ka tuig. Nadumduman pa niya: “Ginbendisyunan kami sang amon pari, nga nagasiling, ‘Ang Dios kaupod ninyo.’ Pero nagapalibog ako, ‘Magalakat ako para magpatay, pero ang Biblia nagasiling nga “indi ka magpatay.”’”

Si Ray isa anay ka navy sang Bug-os Kalibutan nga Inaway II. Isa ka bes, ginpamangkot niya ang pari: “Nagakadto ka sa barko kag nagapangamuyo para sa mga soldado kag sa kadalag-an. Indi bala nga amo man sina ang ginahimo sang mga kontra?” Ang pari nagsabat nga ang Ginuo nagapanghikot sing misteryoso.

Kon indi ka kumbinsido sa sina nga sabat, amo man ang iban.

Si Jesus nagsiling nga ang isa sa labing daku nga sugo sang Dios amo nga “higugmaon mo ang imo isigkatawo subong sang imo kaugalingon.” (Marcos 12:31) Buot bala silingon ni Jesus nga ang paghigugma naton sa aton isigkatawo nabase sa kon diin sia nagaistar ukon sa iya nasyonalidad? Indi. Ginsilingan niya ang iya mga disipulo: “Paagi sa sini ang tanan makahibalo nga kamo mga disipulo ko, kon nagahigugmaanay kamo.” (Juan 13:34, 35) Dapat pinasahi gid ang ila gugma sa isa kag isa kay amo ini ang ila tanda. Mas luyag pa nila nga ihatag ang ila kabuhi sangsa kuhaon ang kabuhi sang iban.

Ang mga Cristiano sang una nagkabuhi suno sa ginsiling ni Jesus. Ang The Encyclopedia of Religion nagsiling: “Ang mga amay sang simbahan sang una, lakip sanday Tertullian kag Origen, nagpamatuod nga ang mga Cristiano gindumilian sa pagpatay, ang prinsipio nga nagpugong sa ila nga mangin soldado sang Roma.”

Bangod ang mga Saksi ni Jehova nagapuyo sa halos tanan nga pungsod, ang mga tawo sa palibot nila may ginadampigan parte sa mga problema sa tunga sang mga pungsod. Pero, ginahimo nila ang ila labing masarangan nga mahuptan ang gugma bilang tanda.

Halimbawa, sang 1994 nga inaway sa tunga sang Hutu kag Tutsi sa Rwanda, ang mga Saksi ni Jehova wala nag-entra sa sini. Ginpaistar sang mga Saksi sa isa ka tribo ang mga Saksi nga halin sa pihak nga tribo, nga pirme ginarisgo ang ila kabuhi. Sang nadakpan nga ginpaistar sang duha ka Hutu nga Saksi sa ila balay ang ila Tutsi nga mga utod, ang soldado sang Hutu Interahamwe nagsiling: “Dapat kamo mapatay kay ginbuligan ninyo ang mga Tutsi nga makapalagyo.” Sing makapasubo, ginpatay sila.—Juan 15:13.

Ano sa banta mo: Ang mga ginahimo bala sang mga Saksi ni Jehova nahisanto sa ginsiling ni Jesus parte sa gugma nga nagasakripisyo?