TOPIKO SA KOBER | KON PAANO ATUBANGON ANG KABALAKA
Ang Kabalaka Yara Bisan Diin!
“Mabakal ako tani sing pagkaon pero cookies lang ang akon nakita—kag 10,000 ka pilo ang bili sini sa kinaandan nga presyo! Pagkadason nga adlaw, wala na gid sing pagkaon sa mga balaligyaan.”—Paul, Zimbabwe.
“Gin-istorya ako sang akon bana kag nagsiling sia nga bayaan niya kami. Paano ko mabatas ini nga pagluib? Ano na lang ang matabo sa amon mga bata?”—Janet, Estados Unidos.
“Sang nag-uwang ang sirena, nagdalagan ako agod manago kag naghapa sa salog sang naglupok ang mga missile. Inoras na ang nagligad pero nagapalangurog gihapon ang akon mga kamot.”—Alona, Israel.
Nagakabuhi kita sa tion sang kabalaka, “ang makahalanguyos nga mga tion nga mabudlay atubangon.” (2 Timoteo 3:1) Madamo ang nagaproblema bangod sa krisis sa pinansial, pagkaguba sang pamilya, inaway, paglapnag sang makamamatay nga balatian, kag mga kalamidad. Dugangan pa ini sang personal nga pagkabalaka: ‘Kanser ayhan ining bukol nga nakita sa akon lawas?’ ‘Ano ang kahimtangan sang kalibutan kon magdaku na ang akon mga apo?’
Indi tanan nga kabalaka malain. Normal lang nga mabalaka antes sang eksaminasyon, presentasyon, ukon interbyu para sa obra. Kag ang kahadlok sa katalagman nagabulig sa aton nga malikawan ang halit. Apang ang sobra kag wala untat nga kabalaka makahalit. Ginapakita sang mga pagtuon sining karon lang sa kapin sa 68,000 ka adulto nga bisan ang haganhagan nga kabalaka nagadugang sa risgo nga mapatay sing temprano. Gani nagakaigo gid ang pagpamangkot ni Jesus: “Sin-o sa inyo ang makadugang sa iya kabuhi sing bisan isa lang ka maniko paagi sa pagkabalaka?” Ang kabalaka indi makapalawig sa kabuhi sang isa. Si Jesus naglaygay: “Untati ninyo ang pagkabalaka.” (Mateo 6:25, 27) Apang posible bala ini?
Ang sabat nagadalahig sa pag-aplikar sang praktikal nga kaalam, pagpalambo sing matuod nga pagtuo sa Dios, kag pagpabakod sang masaligan nga paglaum sa palaabuton. Bisan wala kita nagaatubang sang mabudlay nga mga kahimtangan subong, mahimo kita makaatubang sini sa palaabuton. Gani tan-awon naton kon paano ini nga mga tikang nakabulig kanday Paul, Janet, kag Alona nga atubangon ang kabalaka.
Basi Manamian Ka Man
IBAN PA NGA TOPIKO
Pagkabalaka sang mga Lalaki—Kon Paano Makabulig ang Biblia
Ang kabalaka isa sa nagalapnag nga problema sa sining makahalanguyos nga mga tion. Kon may ginakabalak-an ka, makabulig bala sa imo ang Biblia?
