TOPIKO SA KOBER | ANO ANG PAGTAMOD SANG DIOS SA INAWAY?
Ang Pagtamod sang Dios sa Inaway sang Dumaan nga Tion
Ang katawhan ginapigos. Padayon sila nga nagapangamuyo sa Dios nga buligan sila, pero wala dayon ini ginsabat. Sila amo ang mga Israelinhon, ang katawhan sang Dios sang dumaan nga tion. Ang nagapigos sa ila amo ang gamhanan nga pungsod sang Egipto. (Exodo 1:13, 14) Tinuig nga naghulat ang mga Israelinhon nga luwason sila sang Dios gikan sa pagpigos sang Egipto. Sang ulihi, nag-abot gid man ang gintalana nga tion sang Dios nga luwason sila. (Exodo 3:7-10) Ginasugid sang Biblia nga ang Dios mismo nakig-away sa mga Egiptohanon. Ginpaantos niya ang Egipto sang sunodsunod nga kalalat-an, dayon ginlaglag niya ang hari sang Egipto kag ang iya mga kasuldadusan sa Pula nga Dagat. (Salmo 136:15) Ginpamatud-an ni Jehova nga sia “isa ka gamhanan nga hangaway” para sa iya katawhan.—Exodo 15:3, 4.
Ang pagpakig-away sang Dios sa mga Egiptohanon pamatuod nga wala niya ginapamatukan ang tanan nga inaway. May mga tion nga ginsugo niya ang iya katawhan nga Israel nga makig-away. Halimbawa, ginsugo niya sila nga makig-away sa mga Canaanhon, nga tama gid kalain. (Deuteronomio 9:5; 20:17, 18) Ginsugo niya si Hari David sang Israel nga makig-away sa mapiguson nga mga Filistinhon. Gintudluan pa gani niya si David sing estratehiya agod magdaug sa inaway.—2 Samuel 5:17-25.
Ginapakita sini nga mga rekord sa Biblia nga kon mabutang sa katalagman ang mga Israelinhon bangod sa kalautan kag pagpigos, nagasugo ang Dios nga makig-away agod amligan ang iya katawhan kag tipigan ang matuod nga pagsimba. Apang talupangda ang tatlo ka importante nga punto parte sa mga inaway nga ginsugo sang Dios.
-
ANG DIOS ANG NAGDESISYON KON SIN-O ANG MAGAPAKIG-AWAY. Isa ka bes, ginsilingan sang Dios ang mga Israelinhon: “Indi kamo kinahanglan magpakig-away sa sini nga inaway.” Ngaa? Ang Dios mismo ang magpakig-away para sa ila. (2 Cronica 20:17; 32:7, 8) Madamo nga beses na niya ini nga ginhimo, subong sang ginsambit sa umpisa sini nga artikulo. Sa iban nga tion, ginsugo sang Dios ang dumaan nga Israel nga makig-away agod panag-iyahan kag pangapinan ang Ginsaad nga Duta.—Deuteronomio 7:1, 2; Josue 10:40.
-
ANG DIOS ANG NAGDESISYON KON SAN-O MAGAPAKIG-AWAY. Ang mga alagad sang Dios magahulat sing mapinasensiahon sa gintalana nga tion sang Dios agod makig-away sa mga nagapamigos kag mga malauton sa palibot nila. Indi sila magpakig-away tubtob sa sina nga tion. Kon makig-away sila, madula nila ang kahamuot sang Dios. Ang matuod, ginapakita sang Biblia nga sang nakig-away ang mga Israelinhon nga wala ginsugo sang Dios, ang resulta indi gid maayo. *
-
Bisan pa nakig-away ang Dios batok sa mga Canaanhon, ginluwas niya ang pila sa ila lakip na si Rahab kag ang iya pamilya
WALA NALIPAY ANG DIOS NGA MAPATAY ANG MGA TAWO, LAKIP NA ANG MGA MALAUTON. Si Jehova nga Dios ang Tuburan sang kabuhi kag ang Manunuga sang katawhan. (Salmo 36:9) Gani indi niya luyag nga mapatay ang mga tawo. Apang, makapasubo nga may mga tawo nga nagapahito sa pagpigos kag pagpatay pa gani sa iban. (Salmo 37:12, 14) Agod matapos ini nga kalautan, kon kaisa ang Dios nagasugo nga makig-away sa mga malauton. Apang sa sulod sang mga tinuig nga ginsugo niya ang mga Israelinhon nga makig-away, nangin “maluluy-on” gihapon sia kag “indi dali maakig” sa mga nagapigos sa Israel. (Salmo 86:15) Halimbawa, nagsugo sia nga antes makig-away ang mga Israelinhon sa isa ka siudad, ‘ipahibalo anay nila kon ano ang ila mga kondisyon para sa paghidait,’ agod may kahigayunan ang mga pumuluyo nga magbag-o kag malikawan ang inaway. (Deuteronomio 20:10-13) Ginapakita sini nga ang Dios ‘wala nalipay nga mapatay ang malauton, kundi luyag niya nga magbag-o sia sang iya dalanon kag padayon nga magakabuhi.’—Ezequiel 33:11, 14-16. *
Nakita naton nga sang dumaan nga tion, ginatamod sang Dios ang inaway nga makatarunganon nga paagi agod tapuson ang lainlain nga pagpamigos kag kalautan. Apang ang Dios—indi ang tawo—ang nagdesisyon kon san-o makig-away kag kon sin-o ang makig-away. Nalipay gid bala ang Dios nga makig-away sa masingki nga paagi? Wala gid. Ginadumtan gid niya ang kasingki. (Salmo 11:5) Nagbag-o bala ang pagtamod sang Dios sa inaway sang ginsugdan sang iya Anak nga si Jesucristo ang pagministeryo sang unang siglo?
^ par. 7 Halimbawa, isa ka bes, napierde ang mga Israelinhon sang nakig-away sila sa mga Amaleknon kag Canaanhon sang ginsilingan sila sang Dios nga indi makig-away. (Numeros 14:41-45) Pagligad sang madamo nga tuig, ang matutom nga si Hari Josias nakig-away nga wala sing pahanugot sang Dios, kag ining padasudaso nga desisyon nagresulta sa iya kamatayon.—2 Cronica 35:20-24.
^ par. 8 Wala ginpahibalo sang mga Israelinhon ang mga kondisyon para sa paghidait antes sila makig-away sa mga Canaanhon. Ngaa? Bangod ang mga Canaanhon ginhatagan sing 400 ka tuig agod tadlungon ang ila malain nga paggawi. Sang nakig-away ang mga Israelinhon batok sa ila, ang mga Canaanhon tama na gid kalain. (Genesis 15:13-16) Gani, tanan sila dapat pamatyon. Apang may pila ka Canaanhon nga nagbag-o kag naluwas.—Josue 6:25; 9:3-27.
Basi Manamian Ka Man
ANG BIBLIA—ANO ANG MENSAHE SINI?
Nagsulod sa Canaan ang mga Israelinhon
Sang nagsulod sa Canaan ang mga Israelinhon, ngaa wala ginpatay ni Jehova si Rahab kag ang iya pamilya sa Jerico?
ANG LALANTAWAN
Ginpahayag Sia nga “Matarong Paagi sa mga Buhat”
Ang istorya ni Rahab nagapakita nga tanan kita importante kay Jehova! Kag ano ang matun-an naton sa iya pagtuo?
ANG LALANTAWAN
Mga Paghukom sang Dios—Mapintas Bala Ini?
Para masabat ini nga pamangkot, binagbinaga ang duha ka halimbawa sang paghukom sang Dios sa Biblia—ang Anaw sang panahon ni Noe kag ang paglaglag sang mga taga-Canaan.
