Madamo ang nagapensar nga wala na gid sang solusyon ang ila mga problema sa 2024. Pero, makakita kita sang paglaum sa palaabuton. Sa diin?

 Nagapromisa ang Biblia nga solbaron sang Dios ang mga problema nga nagapabudlay sa aton kabuhi subong. Sa indi madugay, “pahiran [sang Dios] ang tagsa ka luha sa [aton] mga mata, kag wala na sing kamatayon, ukon paglalaw ukon paghibi ukon kasakit pa.”—Bugna 21:4.

•   Para sa dugang nga impormasyon parte sa mga promisa sang Biblia sa palaabuton, basaha ang artikulo nga “Makalaum Kita nga Mangin Maayo ang Aton Sitwasyon sa Palaabuton.”

 Nagahatag ang Biblia sang paglaum para sa palaabuton nga makabulig sa imo para mabatuan ang negatibo nga mga balatyagon kag para mangin mas positibo ka. (Roma 15:13) Ang praktikal nga laygay sang Biblia makabulig man sa imo nga maatubang ang imo mga problema subong, pareho sang kapigaduhon, inhustisya, kag pagbalatian.

•   Hibalua kon paano nakabulig ang paglaum sa Biblia sa isa ka lalaki nga makita ang kalinong kag kalipay bisan pa nagdaku sia nga pigado gid ang ila pangabuhi. Tan-awa ang video nga Juan Pablo Zermeño: Ginhatagan Ako ni Jehova sang Kabuhi nga Puno sing Kahulugan.

•   Hibalua kon paano ang Biblia makabulig sa imo kon ginakonsiensia ka, ginasubuan, nabalaka, kag kon napatyan ka sang pinalangga. Basaha ang artikulo nga “May Makita Bala Ako nga Makapaumpaw nga mga Tinaga sa Biblia?”

•   Hibalua kon paano ang isa ka soldado sang una nga nagsiling nga ‘malain sia kag wala sing balatyagon’ nakakita sang paglaum sa iya natun-an sa Biblia. Tan-awa ang video nga Ginbiyaan Ko ang Pagkasoldado.

 Himua ang 2024 nga isa ka maayo nga tuig para sa imo kag sa imo pamilya. Tun-i sing dugang kon paano ang Biblia makabulig sa imo. Testingi ang amon libre kag interactive nga pagtuon sa Biblia nga may instruktor. Hibalua kon paano ang Dios makahatag sa imo “sing paghidait” subong kag sang ‘maayo nga palaabuton kag paglaum.’—Jeremias 29:11.