Sa Enero 27, 2023, madamo nga tawo ang magahiwat sang International Holocaust Remembrance Day. Bangod sa grabe kapintas nga pagpamatay nga natabo sobra 75 ka tuig na ang nagligad, mahimo nagapamensar ka kon ngaa ginpasugtan sang Dios nga matabo ang Holocaust.

•   Para mabal-an mo kon ano ang ginasiling sang Biblia, basaha ang artikulo nga “Ngaa Natabo ang Holocaust? Ngaa Wala Ini Ginpunggan sang Dios?”

 Grabe gid ang pag-antos sang mga Judiyo nga biktima sang Holocaust. Minilyon ka tawo ang hungod nga ginpatay sa organisado nga paagi. May iban pa gid nga grupo nga ginhingabot man kag ginpatay sang panahon sang Holocaust. Lakip sa ila ang mga Saksi ni Jehova nga ginhingabot bangod sang ila base sa Biblia nga mga pagpati.

•   Para sa dugang nga impormasyon, basaha ang artikulo nga “Ano ang Natabo sa mga Saksi ni Jehova sang Tion sang Holocaust?”

 Madamo nga tawo ang nahadlok nga ang mga hitabo pareho sang Holocaust basi matabo liwat. Pero nagpromisa ang Biblia nga sa palaabuton ini nga mga trahedya indi na masulit.

•   “‘Kay nahibaluan ko kon ano ang himuon ko sa inyo,’ siling ni Jehova, ‘hatagan ko kamo sing paghidait kag indi sing kalaglagan, agod may maayo kamo nga palaabuton kag paglaum.”—Jeremias 29:11. a

 Ini nga paglaum matuman kon dulaon na ni Jehova nga Dios ang tanan nga kalainan kag ang masakit nga mga epekto sini. Sa indi madugay:

•   Dulaon niya ang malain nga mga tawo nga nagahalit sa iban.—Hulubaton 2:22.

•   Paumpawan niya ang tanan nga nagaantos.—Bugna 21:4.

•   Banhawon niya ang mga napatay diri sa duta.—Juan 5:28, 29.

 Masaligan mo gid ining makapaumpaw nga paglaum nga ginapromisa sang Biblia. Para mabal-an mo kon ngaa, ginaagda ka namon nga testingan ang amon libre nga pagtuon sa Biblia nga may instruktor.