“Ang malala nga sitwasyon sa klima nagahatag sang madamo nga problema sa mga tawo, mga siudad kag sa tanan nga nagakabuhi sa aton planeta. Ang mga bagyo nagabaskog pa gid bangod sang nagabag-o nga klima, kag ginaguba sini ang mga balay kag mga palangabuhian sa bilog nga kalibutan. Ang dagat padayon nga nagainit kag posible bangod sini madamo nga specie ang maubos kalamatay.”—Inger Andersen, under-secretary-general sang United Nations kag executive director sang UN Environment Programme, Hulyo 25, 2023.

 Magabuligay bala ang mga gobierno para masolbar ini nga mga problema nga nagaapekto sa bilog nga duta? Masarangan bala nila hatagan sang permanente nga solusyon ini nga mga problema?

 Ginasugid sang Biblia ang isa ka gobierno nga makasarang kag gusto gid magsolbar sang tanan nga problema sa palibot sini nga kalibutan. Nagasiling ini nga “ang Dios sang langit magatukod sing isa ka ginharian,” isa ka gobierno nga magagahom kag magasolbar sang tanan nga problema sa duta. (Daniel 2:44) Kon maggahom na ina nga gobierno, ang mga tawo ‘indi na manghalit ukon mangguba’ sa isa kag isa ukon sa duta.—Isaias 11:9.