Ang mga Saksi ni Jehova nagahimo sang importante nga hilikuton para buligan ang mga tawo sa masobra 200 ka kadutaan. Pero mga 35 lang ka kadutaan ang may bastante nga donasyon para masuportahan ang ila kaugalingon nga mga kagastuhanan. Paano ginasuportahan ang mga pungsod nga pigado?

 Ang Nagadumala nga Hubon sang mga Saksi ni Jehova nagabinagbinag sang espirituwal nga mga kinahanglanon kag sang mga hilikuton sang pareho nila nga mga Saksi sa bilog nga kalibutan. Ginabadyet kag ginagamit sing maayo ang mga pondo. Kon ang isa ka branch may sobra nga pondo, ginapadala nila ang sobra sa mga pungsod nga indi bastante ang pondo. Ini nga kahimusan ginasunod sa halimbawa sang mga Cristiano sadto, nga nagabuligay “agod may pag-alalangay.” (2 Corinto 8:14) Ginagamit nila ang ila sobra para mapun-an ang kakulangan sang iban nga Cristiano.

 Ano ang ginabatyag sang mga utod nga nakabaton sining sobra nga mga pondo halin sa iban nga branch? Halimbawa sa Tanzania, nga ang katunga sang populasyon wala kalab-ot 100 ka pesos ang kita sa isa ka adlaw, ini nga mga pondo gingamit sa pag-renovate sang Kingdom Hall para sa Mafinga Congregation. Ang kongregasyon nagsulat: “Nagdamo ang nagtambong sa amon sang na-renovate ang amon Kingdom Hall! Nagapasalamat gid kami sa kaalwan sang organisasyon ni Jehova kag sang bug-os kalibutan nga paghiliutod, kay nakatigayon kami sang amo sina katahom nga tilipunan para sa pagsimba.”

 Ang pila sang aton utod sa Sri Lanka nakaeksperiensia sang gutom bangod sang COVID-19 nga pandemic. Lakip sa ila amo si Imara Fernando kag ang iya gamay nga bata nga lalaki nga si Enosh. Pero, bangod sa mga donasyon halin sa iban nga pungsod, nakabaton sila sang kinahanglanon gid nila nga bulig. Nagpadala sila sing kard nga nagasiling: “Nagapasalamat kami sa mga kauturan nga nagpalangga sa amon sa sining mabudlay nga mga tion. Nalipay gid kami kay bahin kami sini nga pamilya, kag pirme kami nagapangamuyo nga buligan ni Jehova ang tanan naton nga kauturan sa sining katapusan nga mga adlaw.”

 Bisan diin man nagaistar ang aton mga kauturan, maalwan gid sila. Halimbawa, si Enosh naghimo sang gamay nga contribution box nga butangan niya sang iya amot para buligan ang iban nga pamilya. Amo man sini nga kaalwan ang ginpakita ni Guadalupe Álvarez. Nagaistar sia sa Mexico nga pila lang ang nagasueldo sang minimum ukon wala gani sing regular nga income. Pero nagaamot sia gihapon sa organisasyon. Nagsulat sia: “Nalipay ako sa kaayo kag mainunungon nga gugma ni Jehova. Nakahibalo ako nga ang akon mga donasyon idugang sa donasyon sang iban para ihatag sa akon mga utod nga nagakinahanglan.”

 Nalipay man ang mga branch nga nagapadala sang kuarta sa mga nagakinahanglan. “Sa sulod sang madamo nga tinuig, ang hilikuton sa amon pungsod nagakinahanglan sing pinansial nga suporta halin sa iban nga pungsod,” siling ni Anthony Carvalho, nga miembro sang Komite sang Sanga sa Brazil. “Bangod sini nga suporta, nakita namon ang tumalagsahon nga pag-uswag. Subong, nagbag-o na ang amon kahimtangan sa pinansial, kag pribilehiyo naman namon nga buligan ang iban. Ginatan-aw sang mga utod sa Brazil kon ano ang puede nila mahimo para makasuportar sa pagbantala nga hilikuton sa bilog nga kalibutan.”

 Paano masuportahan sing maayo sang mga Saksi ni Jehova ang ila bululigan nga mga kauturan? Indi paagi sa pagpadala sing direkta sang ila kuarta sa mga branch sa iban nga pungsod kundi paagi sa pagdonar sa worldwide work. Puede ini himuon paagi sa contribution box sang kongregasyon nga may ngalan nga “Worldwide Work” ukon paagi sa donate.dan124.com. Ginapasalamatan gid ini nga mga donasyon.