Ang musika isa ka matahom nga regalo halin kay Jehova. May maayo ini nga epekto sa aton hunahuna, sarang sini mabag-o ang aton balatyagon, kag mapalig-on kita sini. Amo gid sini ang epekto sa aton sang aton orihinal nga mga kanta. Pero ang pinakaimportante, ini nga mga kanta nagabulig sa aton para mangin suod pa gid kita kay Jehova.

 Sugod sang 2014, sobra na 70 ka orihinal nga mga kanta ang nahimo, kag isa sa sina nga mga kanta ang na-translate sa sobra 500 ka lenguahe! Pero mahimo mamangkot ka, ‘Sin-o ang nagahimo sini nga mga kanta, kag ano ang nalakip sa ila trabaho para mahimo ini nga mga kanta?’

 Sa Audio/Video Services, may ara isa ka music team nga amo ang responsable sa paghimo sang orihinal nga mga kanta. Ginadumalahan sila sang Teaching Committee sang Nagadumala nga Hubon. May ara 13 ka utod sa sini nga music team. Ang iban sa ila nagabulig sa pagkomposo sang kanta, ang iban mga music engineer, kag ang iban amo ang nagahimo sang iskedyul kag sang dugang pa nga mga ulubrahon. Dugang pa, gin-aprobahan man sang Teaching Committee nga magbulig sa sini nga proyekto ang mga remote volunteer sa bilog nga kalibutan. Ang iban sa ila mga composer, musician, kag mga singer. Mapainubuson nga ginagamit sining mga kauturan ang ila talento kag indi nila gusto nga sila ang dayawon sa ila ginahimo.

 Paano ginahimo ang orihinal nga mga kanta? Una, ginapili sang Teaching Committee kon sa ano nga teksto ibase ang kanta kag kon ano ang dapat mabatyagan sang nagapamati sa sini. Dayon, ang music team maasayn sang makomposo sang kanta kag masulat sang lyrics. Pagkatapos, mahimo sila sang sampol nga rekording para pamatian sang Teaching Committee. Rebyuhon ini sing maayo sang Teaching Committee kag magahatag sila sing dugang nga panugda. I-adjust dayon sang music team ang kanta kag irekord ang final version sini. Ini nga mga kanta ginarekord sa sarisari nga lugar, ang iban sa mga branch facility kag ang iban sa mga studio sa balay.

 Para makomposo kag marekord ang orihinal nga mga kanta, ang aton mga kauturan nagagamit sing sarisari nga mga program sa kompyuter. Nalakip sa sini ang mga digital audio workstation, music notation program, kag mga audio library. Kinahanglan man nila maggamit sing mga equipment pareho sang mga musical instrument, mixing console, amplifier, speaker, kag mga microphone. Ang kada microphone nagabili sing $100 asta sa sobra $1,000 (U.S.). Sang 2020, naggasto kita sing $116,000 (U.S.) para sa mga music-recording equipment.

 Ano nga mga panikasog ang ginahimo para makakinot sang pondo? Bangod madamo nga remote volunteer ang ginagamit, indi na kinahanglan sang madamo nga miembro sa music team sa Bethel. Dugang pa, sa baylo nga mag-updanay ang madamo nga musician para magrekord, masami nga nagagamit na lang ang aton kauturan sang isa ka computer program nga makahimo sang tunog sang sarisari nga instrument.

 Nanamian gid ang mga kauturan nga mamati sa orihinal nga mga kanta. Si Tara, nga taga-Germany, nagsiling: “Nakabulig gid sa akon ang pagpamati sang mga kanta para mangin relaks ako kon nagakabalaka ako. Kon ginapamatian ko ini sa akon mismo lenguahe, pamatyag ko daw ginahakos ako ni Jehova.” Si Dmitry nga isa ka brother sa Kazakhstan, nagsiling: “Nanamian gid ako mamati sa mga kanta kay wala na ako nagakabalaka nga basi may ginasiling ang mga lyrics sini nga kontra sa mga prinsipio sa Biblia. Isa pa, nakabulig sa akon ang mga kanta nga magpokus sa akon relasyon kay Jehova.”

 Ginsugid ni Delia nga taga-South Africa ang iya ginabatyag parte sa orihinal nga mga kanta: “Nagbakod gid ang akon pagtuo bangod sa sini nga mga kanta. Kon nasubuan gani ako ukon indi gani kon may problema ako, may ara gid kanta nga bagay gid sa akon sitwasyon. Bisan ang tono pa lang gani sang isa ka kanta bastante na para maumpawan ako!”

 Ang iban may paborito nga orihinal nga mga kanta. Si Lerato nga taga-South Africa man, nagsiling: “Ang kanta nga ‘Dali Na Lang Katama’ kag ‘Sa Bag-o nga Duta’ nakabulig sa akon nga maimadyin ang tion nga makita ko liwat ang akon pinalangga nga iloy. Sa kada tion nga ginapamatian ko ini nga mga kanta, ginaimadyin ko nga nagadalagan sia pakadto sa akon kag nagahana nga hakson ako.”

 Nakabulig gid ang isa ka orihinal nga kanta sa isa ka tin-edyer sa Sri Lanka. Nagsiling sia: “Ginpakalain ako sang akon maestra sa science sa atubangan sang akon mga klasmeyt kay isa ako sa mga Saksi ni Jehova. Ginkulbaan ako, kag indi ako kabalo kon ano ang ihambal ko. Pag-abot ko sa balay, ginsilingan ako ni Nanay nga pamatian ang kanta nga ‘Study Makes You Strong.’ Sang ginpamatian ko ini, na-realize ko nga kinahanglan ko mag-research kag maghanda kon ano ang akon isabat. Pagkasunod nga adlaw, gin-istorya ko ang akon maestra. Ginpamatian niya ako sing maayo kag nagsiling sia nga naintiendihan na niya subong ang mga ginapatihan sang mga Saksi ni Jehova. Nagapasalamat gid ako sa organisasyon ni Jehova kay naghimo sila sang makapalig-on nga mga kanta.”

 Paano ginasuportahan ang gasto sa paghimo sini nga mga kanta? Paagi sa mga donasyon sa worlwide work nga ginahimo gamit ang sarisari nga paagi sang pag-donate sa donate.dan124.com. Madamo gid nga salamat sa imo maalwan nga mga donasyon.