“Nagdesisyon ang Nagadumala nga Hubon nga puede na ibalik ang face-to-face nga mga miting sugod sa semana sang Abril 1, luwas lang kon may mga restriksion pa ang gobierno sa inyo lugar.” Nalipay gid ang mga Saksi ni Jehova sa bilog nga kalibutan sang gin-post ini nga pahibalo sa jw.org sang Marso 2022. Pero wala pa natapos ang COVID-19 nga pandemic. a Ano nga mga pagbag-o, suplay, kag mga kagamitan ang kinahanglan para maproteksionan sa virus ang mga tumalambong sa miting? Mga duha ka tuig na nga wala ginagamit ang aton mga Kingdom Hall, gani paano ini mahanda?

 Ang matuod, pila ka bulan na nga nagahanda ang aton mga kauturan para sa pagbalik sang mga miting sa mga Kingdom Hall.

 Mga isa ka bulan pa lang nga gin-untat ang mga miting sang 2020, gintun-an na sang Worldwide Design/Construction Department (WDC), sa Warwick, New York, kon ano ang mangin epekto sang COVID-19 sa aton paggamit sang mga Kingdom Hall kag ano ang aton himuon para mangin safe gihapon ang paggamit sini.

 Sarisari ang kinahanglan sa sarisari nga bahin sang kalibutan. Si Matthew De Sanctis, nga nagaobra sa WDC, nagpaathag: “Sa pila ka lugar, wala sing hilinawan sing kamot ang mga Kingdom Hall. Kon wala sing linya sang tubig ang Kingdom Hall, kinahanglan magbakal sing tubig ukon magsag-ub sa suba ukon sa bubon. Sa iban naman nga mga pungsod, nagbag-o ang ginapatuman sang gobierno parte sa paggamit sang aircon, mga air-exchange unit, kag mga sign parte sa health kag katinlo.”

 Ano ang ginhimo sang aton mga kauturan? Nakita nila nga epektibo sa madamo nga Kingdom Hall “ang praktikal kag barato nga mga solusyon,” siling ni Matthew. Halimbawa sa Papua New Guinea, naghimo sila sang mga hilinawan sang kamot paagi sa pagbutang sang tubig sa 20 ka litro nga container kag gintakdan ini sang gripo. Gani $40 (U.S.) lang ang nagasto nila sa kada Kingdom Hall. Para naman sa mga Kingdom Hall sa Africa, sobra 6,000 ka de-kalidad nga handwashing station ang ginbakal sa isa ka supplier sa Asia.

 Ang iban nga pagbag-o nga ginhimo nila amo ang pag-install ukon pag-ilis sang mga fan kag mga air-exchange unit para magnami pa gid ang bentilasyon sa mga Kingdom Hall. Madamo nga kongregasyon ang nagbakal sang mga boom pole para indi na pag-uyatan sang mga nagasabat ang ila mga roving microphone. Regular man nga gina-sanitize ang mga butang nga pirme ginatandog ukon ginauyatan nga puede makapalapta sang virus, pareho sang mga handle sang puertahan kag mga gripo. Ang iban nga kongregasyon, nagbutang sang mga sensor sa mga gripo sa ila CR para indi na ini pag-uyatan kon gamiton. Sa Chile, mga $1,400 (U.S.) ang nagasto sa kada Kingdom Hall sa paghimo sang kinahanglanon nga mga pagbag-o.

 Bisan pa importante nga mangin safe ang mga Kingdom Hall, gintinguhaan man sang mga kauturan nga makakinot sa paggamit sang gindonar nga mga pondo. Halimbawa, sa pila ka lugar, ginpanginpuslan sang mga kauturan ang bulig sang gobierno sa pagbakal sang mga handwashing station kag mga boom pole. Nagbuligay ang mga branch office para makakinot sang pondo paagi sa pagbakal sang mas madamo nga suplay. Ang mga branch kag ang Global Purchasing Department direkta nga nagbakal sa mga manufacturer, para makabarato kag mas madasig ang pagdeliber.

 Ang mga ginhimo para mangin safe ang mga Kingdom Hall nakabulig para maproteksionan kag mahim-os ang buot sang mga naga-attend sing face-to-face sa mga miting. Si Dulcine, isa ka sister sa Peru, nagsiling nga “medyo hinadlukan” sia sang nabal-an niya nga magamiting kita liwat sa Kingdom Hall. “Sa umpisa pa lang sang pandemic, na-COVID ako,” siling niya. “Gani nagaduhaduha ako nga magkadto sa Kingdom Hall, kay basi malatnan ako liwat. Pero pag-abot ko sa Kingdom Hall, natalupangdan ko nga damo gid sang ginhimo ang mga elder para mangin safe sa miting, pareho sang mga hand-sanitizing station kag mga microphone boom pole. May kahimusan man nga i-sanitize ang Kingdom Hall antes kag pagkatapos sang kada miting. Gani nabatyagan ko gid nga safe ako.” b

 Lain naman nga kabudlayan ang gin-atubang ni Sara, isa ka sister sa Zambia. Sia nagsiling: “Pila pa lang ka bulan ang nagligad, napatay ang akon bana bangod sa COVID. First time ko nga mag-attend nga ako na lang gani nabalaka ako kon ano ang akon batyagon kon mag-attend na ako sa miting.” Ano ang natabo sang nag-attend sia? Sia nagsiling: “Bangod sa face-to-face nga mga miting nabatyagan ko gid nga wala kita ginapabay-an ni Jehova sa sining katapusan nga mga adlaw. Nabatyagan ko gid ilabi na subong ang pagpalig-on, pagpalangga, kag suporta sang mga elder kag sang akon mga kauturan.”

 Nalipay gid ang aton pinalangga nga mga kauturan sa bilog nga kalibutan kay nagbalik na kita sa aton mga Kingdom Hall. Salamat sa imo mga donasyon, nga ang kalabanan sini ginahimo paagi sa donate.dan124.com. Nagabulig ini para masigurado nga ang mga lugar sang putli nga pagsimba komportable kag safe para hiwatan sang miting.