Madamo nga turista ang nagakadto sa sikat nga mga busay malapit sa banwa sang Pagsanjan sa Pilipinas. Didto nagdaku nga pigado ang akon amay nga si Nardo Leron. Nakita niya ang korapsion sa gobierno, sa mga pulis, kag sa iya ulubrahan, gani pirme lang sia naugot kag akig.

 Nangabudlay gid ang akon mga ginikanan para mapadaku ang ila walo ka kabataan. Madugay sila nga nagatener sa kabukiran para atipanon ang talamnan. Sa masami, kami lang sang akon magulang nga si Rodelio ang nagaatipan sang amon kaugalingon, kag pirme lang kami nagakagutman. Wala man kami sing tion nga maghampang. Mag-edad kami sing pito ka tuig, dapat na kami mag-obra sa kalubihan, nga nagapas-an sang mabug-at nga mga lubi sa tama ka taklaron nga dalan sa bukid. Kon indi namon masarangan pas-anon, ginaguyod na lang namon ini.

 Kinahanglan namon agwantahon ang bakol sang amon amay, pero mas nasakitan kami kon makita namon nga ginasakit niya ang amon iloy. Ginapunggan sia namon, pero wala kami sing mahimo. Ginplanuhan namon ni Rodelio nga patyon ang amon amay kon magdaku kami. Ginahandum ko gid ang amay nga nagapalangga sa amon!

 Naakig gid ako sa pagpanakit sang akon amay, gani naglayas ako sa balay sang 14 anyos ako. Nag-istar ako sa dalan, kag nagsugod sa pagsuyop sang marijuana. Sang ulihi, nangin bangkero ako sang mga turista nga nagalagaw sa mga busay.

 Pila ka tuig sang ulihi, nag-eskwela ako sa unibersidad sa Manila. Pero bangod nagapauli ako sa Pagsanjan kon Sabado kag Domingo para mag-obra, daw haluson na ako makatuon. Daw wala gid sing pulos kag katuyuan ang akon kabuhi, kag indi na mapahaganhagan sang marijuana ang akon kabalaka. Gani nagtesting man ako gamit sang cocaine, kag heroin. Ang paggamit sang droga, masami nga nagaresulta sa paghimo sing imoral. Pirme ko makita ang kapigaduhon, inhustisya, kag pag-antos. Akig ako sa gobierno, kag para sa akon sila ang balasulon. Ginpamangkot ko ang Dios, “Ngaa amo sini ang kabuhi?” Pero wala ini masabat sang lainlain nga relihion nga nasudlan ko. Gani para matago ang akon ginabatyag, mas madamo nga droga ang akon gingamit.

 Sang 1972, nag-organisar sing mga protesta ang mga estudyante sa Pilipinas kontra sa gobierno. Nag-entra ako sa sini, kag indi maayo ang natabo. Madamo sing gin-aresto, kag pagligad sang pila ka bulan, gindeklarar ang martial law sa bilog nga pungsod.

 Nag-istar ako liwat sa dalan, kay nahadlok ako sa mga awtoridad bangod nag-entra ako sa rebelyon. Para may ibakal ako sang droga nagapangawat ako, kag sang ulihi, nagahatag sing imoral nga serbisyo sa mga manggaranon kag sa mga halin sa iban nga pungsod. Wala ako sing labot kon mabuhi man ako ukon mapatay.

 Sa sini man nga tion, nagatuon sa Biblia ang akon iloy kag manghod nga lalaki upod sa mga Saksi ni Jehova. Naakig gid ang akon amay, kag ginsunog niya ang ila mga literatura sa Biblia. Pero nagpadayon sila kag nabawtismuhan bilang Saksi ni Jehova.

 Isa ka adlaw, gin-istorya sang isa ka Saksi sa akon amay ang promisa sang Biblia parte sa matuod nga hustisya nga matabo sa bilog nga duta. (Salmo 72:12-14) Interesado gid si Tatay amo nga gin-usisa niya ini. Indi lang ang promisa sang Dios parte sa maayo nga pagginahom ang nasapwan niya sa Biblia, kundi pati na kon paano mangin maayo nga bana kag amay. (Efeso 5:28; 6:4) Wala madugay, sia kag ang tanan ko nga utod nangin Saksi ni Jehova. Pero bangod malayo ako sa balay, wala ako makahibalo.

 Sang 1978, nagsaylo ako sa Australia. Pero bisan pa malinong kag manggaranon ini nga pungsod, wala ako gihapon sing kalinong sa hunahuna. Nagapahubog ako gihapon kag nagagamit sing droga. Sina nga tuig, may mga Saksi ni Jehova nga nagbisita sa akon. Nanamian ako sa ginpakita nila sa Biblia parte sa malinong nga kalibutan, pero nagduhaduha ako nga mag-upod sa ila.

 Wala madugay pagkatapos sini, nagpauli ako sa Pilipinas sing pila ka semana. Ginsugiran ako sang akon mga utod nga nagatinguha gid ang akon amay nga mangin maayo nga tawo, pero daw indi ako magpati amo nga ginlikawan ko nga makigkita sa iya.

 Ginpaathag sa akon sang akon manghod nga babayi paagi sa Biblia kon ngaa ang kabuhi puno sang pag-antos kag inhustisya. Nagdayaw gid ako kay ang isa ka tin-edyer nga diutay pa lang ang eksperiensia amo pa ang nakasabat sa akon mga pamangkot. Antes ako maghalin, ginhatagan ako sang akon amay sang libro nga Mahimo Ka Mabuhi sing Dayon sa Paraiso nga Duta. a Nagsiling sia: “Untati na ang imo ginahimo. Paagi sa sini nga libro makita mo ang imo ginapangita.” Ginpangabay niya ako nga mangita sang Saksi ni Jehova sa Australia.

 Ginsunod ko ang ginsiling ni Tatay kag nakakita ako sing Kingdom Hall sang mga Saksi ni Jehova malapit sa akon balay sa Brisbane. Nagtuon ako sing regular sa Biblia. Nakita ko sa mga tagna sa Biblia pareho sang kapitulo 7 sang Daniel kag kapitulo 9 sang Isaias nga ang gobierno sang Dios, nga wala gid sing korapsion, magagahom sa aton sa ulihi. Natun-an ko nga magakabuhi kita sa Paraiso sa duta. Gusto ko magkabuhi nga nagapalipay sa Dios, pero para mahimo ko ini kinahanglan ko kontrolon ang akon balatyagon, untatan ang paggamit sang droga, pagpahubog, kag ang akon imoral nga pagkabuhi. Ginbulagan ko ang ginaupod-upod ko nga babayi, kag gin-untatan ko ang akon mga bisyo. Samtang mas nagabakod ang akon pagsalig kay Jehova, nagapangamuyo ako sa iya nga buligan niya ako nga maghimo sing dugang nga pagbag-o.

 Amat-amat ko nga narealisar nga ang akon ginatun-an makapabag-o gid sang tawo. Ang Biblia nagasiling nga kon panikasugan naton, masuksok naton ang “bag-o nga personalidad.” (Colosas 3:9, 10) Samtang ginatinguhaan ko ini, narealisar ko nga matuod ang akon nabatian parte sa pagbag-o ni Tatay. Sa baylo nga maakig kag maghinakit, gusto ko nga mag-ayuhay kami. Sang ulihi, napatawad ko si Tatay kag nadula na ang kaakig nga nabatyagan ko halin pa sang bata ako.

 Sang pamatan-on ako, pirme ko ginasunod ang indi maayo nga ginahimo sang iban. Husto gid ang paandam sang Biblia, malain gid ang resulta sang indi maayo nga kaupdanan. (1 Corinto 15:33) Pero nakakita ako sang masaligan nga mga abyan sa mga Saksi ni Jehova, kag ginbuligan nila ako nga mangin maayo nga tawo. Kag isa sa ila amo ang akon matahom nga asawa, si Loretta. Upod kami nga nagatudlo sa iban kon paano ang Biblia makabulig sa ila.

  Nagapasalamat gid ako sa Biblia kay nakita ko ang akon amay bilang isa ka maayo nga bana sa akon iloy kag subong man mapainubuson kag mahidaiton nga Cristiano, nga abi ko imposible nga matabo. Sang nagkitaay kami pagkatapos ko mabawtismuhan bilang isa sa mga Saksi ni Jehova sang 1987, sa una nga tion sa akon kabuhi, ginhakos ako ni Tatay!

 Sa masobra 35 ka tuig, padayon nga ginpaambit ni Tatay kag ni Nanay sa iban ang paglaum nga base sa Biblia. Nangin mapisan sia kag mapinalanggaon kag kilala gid sia nga nagabulig sa mga tawo. Sadto nga tion, natun-an ko nga respetuhon sia kag palanggaon. Ginapabugal ko nga sia ang akon amay! Napatay sia sang 2016, pero nalipay ako sa paghinumdom sa iya, kay pareho kami nga duha nga naghimo sang daku nga pagbag-o sa amon personalidad paagi sa pag-aplikar sang mga panudlo sang Biblia. Nadula na ang akon kaakig sa iya. Kag nagapasalamat gid ako kay nasapwan ko ang akon langitnon nga Amay, si Jehova nga Dios, nga nagpromisa nga dulaon niya ang tanan nga ginabangdan sang problema sang mga pamilya.