Si Maud nagaistar sa France kag nagaobra sa isa ka eskwelahan bilang assistant para sa dis-ebol nga mga bata. Sining karon lang, ginatun-an sang mga estudyante sa isa ka klase ang parte sa Holocaust kag mga concentration camp sang Nazi. Ang mga priso nagasuksok sang mga uniporme nga gintahian sang de-kolor nga mga tela. Mabal-an sa kolor kag korte sang tela nga gintahi sa uniporme kon ngaa ginpriso ang isa ka tawo.

 Sang ginaistoryahan sa klase ang purple triangle nga ara sa uniporme sang pila ka priso, ang maestro nagsiling: “Sa banta ko mga homoseksuwal ’ni sila.” Pagkatapos sang klase, gin-istorya ni Maud ang maestro kag ginpaathag nga gingamit sang mga Nazi ang purple triangle para sa mga Saksi ni Jehova. a Nagsiling si Maud nga madala sia sang pila ka impormasyon parte sa sini nga topiko. Nagpasugot ang maestro kag ginpangabay niya si Maud nga ipresentar ini nga impormasyon sa mga estudyante.

 Sang ginaistoryahan sa isa pa gid ka klase ang amo gihapon nga topiko, gingamit sang isa ka maestra ang isa ka tsart nga nagapakita sang sarisari nga simbulo nga ginbutang sa uniporme sang mga priso. Makita sa tsart nga ang purple triangle nagapakilala sa mga Saksi ni Jehova. Pagkatapos sang klase, ginsilingan ni Maud ang maestra nga may ara sia impormasyon parte sa sina nga topiko. Nagustuhan ini sang maestra kag ginsilingan si Maud nga ipresentar ini sa klase.

 Naghanda si Maud sang 15-minutos nga presentasyon para sa una nga klase sang maestra, pero antes sia magsugod, ginsilingan sia sang maestra: “Tagaan ta ka isa ka oras para sa imo presentasyon.” Nagsugod si Maud paagi sa pagpatan-aw sang isa ka documentary video parte sa paghingabot sang mga Nazi sa mga Saksi ni Jehova. Suno sa video, ginkuha sang mga Nazi sa ila ginikanan ang 800 ka Saksi nga mga bata. Ginpapundo anay ni Maud ang video kag ginbasa ang eksperiensia sang tatlo sa sini nga mga bata. Pagkatapos sang video, gintapos ni Maud ang iya presentasyon paagi sa pagbasa sang isa ka sulat nga ginhimo sang 1940 sang isa ka Saksi sa Austria, ang 19 anyos nga si Gerhard Steinacher. Ginsulat niya ini para sa iya mga ginikanan pila lang ka oras antes sia ginpatay sang mga Nazi. b

 Ginpresentar ini liwat ni Maud sa ikaduha nga klase. Maayo gid kay maisog si Maud, gani subong ginasugid na sining duha ka manunudlo sa ila mga klase ang parte sa mga Saksi ni Jehova kon nagatudlo sila parte sa mga biktima sang mga concentration camp sang Nazi.