Madamo sang nakaobserbar ang nagadayaw gid sa mga boluntaryo bangod sa ila kinabubut-on nga pag-obra sa proyekto sa Warwick. Ang direktor sang isa ka kompanya nga nagtakod sang mga elebeytor nagsiling sa isa ka boluntaryo: “Makatilingala gid ang nahimo sang inyo grupo. Kalabanan sang tawo subong indi mag-obra kon wala sing sueldo.”

Sang nabatian niya kag sang iban pa nga ang mga nagapatindog sang world headquarters sang mga Saksi ni Jehova sa Warwick, New York, halos mga boluntaryo, abi nila ang mga Saksi nagaboluntaryo lang kon Sabado kag Domingo. Pero nagdayaw gid sila sang nakilala nila ang mga tawo nga nagresayn sa ila obra kag naghalin pa sa lainlain nga bahin sang pungsod para mag-obra sa proyekto indi lang sing binulan kundi sing tinuig pa gani.

Sang hingapusan sang 2015, mga 23,000 na ka Saksi ang nagboluntaryo sa Warwick upod sa mga miembro sang pamilya Bethel sa United States. Mga 750 ka trabahador nga indi mga Saksi ni Jehova ang nag-obra man sa proyekto. Ang ila pag-obra upod sa mga Saksi ni Jehova may maayo nga epekto sa ila kag indi gid nila ini malipatan.

Ang manedyer sang isa ka kompanya nga nagapanghimo sang mga bintana kag dingding nagsulat: “Nagadayaw gid ang tanan nga trabahador sang amon kompanya nga nag-obra sa sini nga proyekto sa batasan sang mga tawo nga nakaupod nila sa pag-obra. Bangod sini, madamo sa amon ang gusto mag-obra sa sini nga proyekto.”

Isa pa ka kompanya ang nagpadala sang ila mga tinawo para magbulig sa pag-obra sang mga superstructure sang mga residence building. Sang natapos na ang kontrata sang kompanya, tatlo sa ila mga empleyado ang gusto magpabilin sa Warwick. Nagresayn sila sa ila obra kag nagsaylo sa isa ka kompanya nga nagaobra pa sa site.

Ang Cristiano nga mga kinaiya nga ginpakita sang mga Saksi may maayo gid nga epekto sa pila nga nagaobra. May isa ka tawo nga nagaobra sa kompanya nga nagahimo sang pundasyon sang bilding. Pagkatapos sang pila ka bulan nga pag-obra niya sa Warwick, natalupangdan sang iya asawa ang daku nga pagbag-o sa iya batasan kag panghambal. Nagsiling ang iya asawa, “Daw indi ko na sia kilala!”

Madamo nga Saksi nga nagaboluntaryo sa site mga babayi. Magluwas nga nagadrayb sila sang mga bus, nagatinlo sang mga kuarto, kag nagaobra sa opisina, nagakontrol man sila sang trapiko, nagadrayb sang heavy equipment, nagapang-angot sang fiber-optic cable, nagaputos sang mga tubo, nagatakod kag naga-finishing sang drywall, nagatakod sang mga tubo, kag nagabuhos. Kapisan gid sa ila.

Natalupangdan sang isa nga indi Saksi nga nagatakod sang mga atop nga pagpanaug sang mga mag-asawa sa bus, ang pila sa ila nagauyatay samtang nagalakat pakadto sa ulubrahan. Nanamian sia sa pagtan-aw sa ila. Nagdayaw man sia sa kapisan sang mga babayi sa pag-obra. “Abi ko ang mga asawa upod-upod lang sa ila bana,” siling niya. “Pero nagaobra gid sila! Damo na ko naobrahan nga construction site sa New York City, pero subong lang ko nakakita sing amo sini.”

Sang tion sang tigtulugnaw sang 2014/2015 grabe gid ang katugnaw, kag kanami nga magtener sa balay sa baylo nga mag-obra sing bilog nga adlaw sa gua. Si Jeremy, nga isa ka Saksi nga nagadumala sa konstruksion, nagsiling: “Sa mga adlaw nga grabe gid ang katugnaw, ang isa ka foreman sang kompanya nga nagahimo sang pundasyon nagapamangkot sa akon kon kaisa, ‘Maobra man buas ang mga babayi?’

Sobra 35 ka drayber sang bus ang gin-hire para magsugat-dul-ong sa mga boluntaryo halin sa ila dalayunan pakadto sa Warwick.

Isa ka bes, antes sila maglakat, ang drayber nagtindog kag nag-atubang sa mga pasahero. “Nanamian ako magdrayb sa inyo nga mga Saksi,” siling niya. “Palihug e-mail sang akon boss para hambalon sia nga ako lang gihapon ang madrayb sa inyo. Damo gid ko sang natun-an sa inyo parte sa Biblia. Sang wala ko pa kamo makilala, wala ako kabalo sang ngalan sang Dios kag wala man ko kabalo nga may paraiso sa duta. Wala na ako nahadlok sa kamatayon. Makalilipay gid ini nga eksperiensia sa akon. Matambong ako sa inyo Kingdom Hall sa sunod ko nga day off.”

Si Damiana, isa ka Saksi nga nagaboluntaryo sa Warwick nagsiling: “Isa ka bes, sang nakasakay na kami sa amon bus, ang amon drayber nagsiling nga may ihambal sia kuno sa amon. Nagsiling sia nga 4,000 na ka Saksi ang iya ginsugat-dul-ong sa sarisari namon nga mga site sa New York. ‘Sarisari ang batasan sang mga tawo,’ siling sang drayber, ‘pero ginatun-an ninyo nga makigbagay sa isa kag isa, kag magbuligay. Kanami gid sang inyo ginahimo.’ Nagsiling man sia nga nanamian sia mag-istorya sa amon.

“Sang nakatapos sia hambal, ang isa ka Saksi sa bus namangkot, ‘OK lang sa imo kon magkanta kami?’

“Nagkadlaw sia kag nagsiling, ‘Sige! Ti, unahon ta kanta ang 134?’” *