Ang Biblia nagpromisa: “Ang nagatuman sang kabubut-on sang Dios nagakabuhi sa wala sing katapusan.” (1 Juan 2:17, Ang Pulong sang Dios) Ano ang gusto sang Dios nga himuon mo?

•   Magtuon parte sa Dios kag sa iya Anak nga si Jesus. Sa iya pangamuyo sa Dios, si Jesus nagsiling: “Ini nagakahulugan sang kabuhi nga wala sing katapusan, ang pagkilala nila sa imo, ang lamang matuod nga Dios, kag sa imo ginpadala, si Jesucristo.” (Juan 17:3) Ano ang nalakip sa “pagkilala” sa Dios kag kay Jesus? Makilala naton sia paagi sa pagtuon sa Biblia kag pagsunod sang mensahe sini sa aton kabuhi. a Ginapakita sang Biblia kon ano ang panghunahuna sang aton Manunuga, si Jehova nga Dios, nga amo ang Manughatag sang kabuhi. (Binuhatan 17:24, 25) Ginasugid man sa aton sang Biblia ang parte sa iya Anak, si Jesus, nga nagtudlo sang “pinamulong sang kabuhi nga wala sing katapusan.”—Juan 6:67-69.

•   Magtuo sa halad-gawad ni Jesus. Si Jesus nagkari sa duta “agod mag-alagad kag ihatag ang iya kabuhi nga gawad.” (Mateo 20:28) Paagi sa halad-gawad ni Jesus may kahigayunan ang mga tawo nga mabuhi sing wala katapusan sa Paraiso nga duta. b (Salmo 37:29) Si Jesus nagsiling: “Ginhigugma gid sang Dios ang kalibutan amo nga ginhatag niya ang iya bugtong nga Anak, agod ang tanan nga nagatuo sa iya indi malaglag kundi makatigayon sang kabuhi nga wala sing katapusan.” (Juan 3:16) Talupangda nga indi lang basta magtuo kay Jesus ang kinahanglan. Dapat kita ‘magtuo sa iya,’ buot silingon magkabuhi kita nahisuno sa iya mga panudlo kag sa kabubut-on sang iya Amay.—Mateo 7:21; Santiago 2:17.

•   Pabakura ang imo kaangtanan sa Dios. Gusto sang Dios nga mangin malapit kita sa iya kag mangin iya abyan. (Santiago 2:23; 4:8) Ang Dios wala sing katapusan. Indi sia mapatay, kag gusto niya nga ang iya mga abyan magkabuhi man sing wala katapusan. Paagi sa iya Pulong, ginsiling niya kon ano ang gusto niya sa tanan nga nagapangita sa iya: “Kabay nga magkabuhi kamo sing wala sing katubtuban.”—Salmo 22:26.

 Sala nga pagpati: Makatalaka ang kabuhi nga wala sing katapusan.

 Kamatuoran: Ang paglaum nga mabuhi sing wala katapusan naghalin sa Dios, nga nagapalangga sa aton kag gusto nga magmalipayon kita. (Santiago 1:17; 1 Juan 4:8) Nabal-an niya nga para mangin malipayon kita, dapat may ginahimo kita nga maayo. (Manugwali 3:12) Nagpromisa ang Dios sa mga mabuhi sing wala katapusan sa duta nga may ara sila sing makalilipay kag mapuslanon nga obra nga makahatag sa ila kag sa ila mga pinalangga sing benepisyo.—Isaias 65:22, 23.

 Isa pa, ang mga mabuhi sing wala katapusan padayon nga makatuon sing bag-o nga mga butang parte sa ila Manunuga kag sa iya madamo kaayo nga tinuga. Gintuga niya ang mga tawo nga may handum nga mabuhi sing wala katapusan kag magtuon parte sa iya, bisan pa “indi gid matungkad sang mga tawo ang binuhatan sang matuod nga Dios halin sa ginsuguran tubtob sa katapusan.” (Manugwali 3:10, 11) Gani ang mga tawo nga mabuhi sing wala katapusan pirme nga may makawiwili nga butang nga matun-an kag himuon.