Dugay na nga nagapangita ang mga doktor nga nagapang-opera sing papilit nga magamit nila sa pag-opera kag pagpapali sang mga pilas. Madamo sa ginagamit nga mga papilit subong ang indi safe gamiton sa sulod sang lawas. Ini nga mga papilit makahililo kag matig-a kon magmala, kag indi ini magtapik sa basa nga mga tisyu sang lawas. Sang gintun-an sang mga scientist ang likido sang igod-igod, a may nadiskobrehan sila nga solusyon sa sini nga problema.

 Binagbinaga: Kon mabatyagan sang igod-igod nga may katalagman, nagapagua ini sang mapilit katama nga likido para magtapik ini bisan sa basa nga dahon. Ginahimo ini sang igod-igod para proteksionan ang iya kaugalingon. Pero bisan pa nagatapik ini, makahulaghulag ini gihapon.

 Gintun-an sang mga researcher ini nga likido kag nadiskobrehan nila kon ngaa grabe ini kapilit. Halimbawa, ini nga likido nagatapik bangod sang chemical bonding kag electrostatic attraction. Nagapanalupsop ini sa ginatapikan sang igod-igod pero nagaunat ini kon butungon. Gintestingan sang mga researcher nga sundon ang likido nga ginapagua sini nga igod-igod, kag nakahimo sila sang papilit nga mas mahunit sangsa bisan ano nga medical adhesive nga ginagamit subong kay makatapik ini sa mga organ sang tawo. Siling nila makatapik ini sing “maayo sa mga organ pareho sa kon paano ang labotlabot nagatapik sa tul-an.”

 Nagapati ang mga eksperto nga sa ulihi ini nga papilit mangin isa sa importante nga mga gamit sang mga doktor nga nagapang-opera, kag indi na kinahanglan nga tahion ang mga pilas ukon maggamit sang medical staple. Mahimo ini gamiton para kay-uhon ang mga labotlabot ukon itakod ang isa ka medical device sa bahin sang lawas diin ini kinahanglanon. Napamatud-an na sang mga eksperimento nga epektibo ini sa pagkapol sa buho sa tagipusuon sang baboy kag pagtabon sang buho sa atay sang mga ilaga.

 Masami nga ang mga scientist makakita sing maayo nga solusyon sa kinaandan nga mga problema kon tun-an nila ang kinaugali. “Dapat kabalo ka lang kon diin ka magtan-aw kag tun-an ang maayo nga mga ideya nga imo makita,” siling ni Donald Ingber, direktor sang isa ka institusyon nga nakahimo sining artipisyal nga papilit.

 Ano sa banta mo? Ang mapilit nga likido nga ginapagua sang igod-igod resulta bala sang ebolusyon? Ukon gindesinyo ini?