ZAJ KAWM 45
Lub Hwj Huam Dawb Huv Pab Peb Li Cas
“Kom sawvdaws thiaj pom lub hwjchim uas loj kawg nkaus uas yog Vajtswv lub, tsis yog peb lub.”—2 KAULEETHAUS 4:7.
ZAJ NKAUJ 33 Muab Koj Tej Kev Nyuaj Siab Tso Rau Yehauvas
ZAJ NO THAM TXOG DABTSI? *
1, 2. (1) Piav seb dabtsi thiaj pab tau peb thev taus tej kev nyuaj siab ib hnub dhau ib hnub. (2) Hauv zaj no peb yuav tham txog dabtsi?
THAUM koj xav txog koj tej kev nyuaj siab, koj puas tau xav li no: “Yog kuv ib leeg xwb, kuv yeej nyiaj tsis taus.” Coob tus kuj xav li no dua los lawm. Tej zaum koj yuav xav li ntawd thaum ib tug muaj mob lossis ib tug txheeb ze tau tas sim neej lawm. Thaum xav txog koj tej kev nyuaj siab, koj puas xav tias twb yog Yehauvas lub hwj huam dawb huv pub “lub hwjchim uas loj kawg nkaus” rau koj thev taus tej kev nyuaj siab ib hnub dhau ib hnub?—2 Kauleethaus 4:7-9.
2 Peb kuj yuav tsum muaj Vajtswv lub hwj huam dawb huv peb thiaj li tawm tsam yeej lub qab ntuj no tej kev haub ntxias thiab. (1 Yauhas 5:19) Tsis tas li ntawd xwb, peb tseem yuav tau “tawmtsam tej dab.” (Efexus 6:12) Cia peb tham txog 2 txoj hau kev uas Vajtswv lub hwj huam dawb huv yuav pab peb kov yeej tej teebmeem no. Tom qab ntawd peb mam li tham seb yuav tsum ua li cas Vajtswv lub hwj huam dawb huv thiaj pab tau peb.
LUB HWJ HUAM DAWB HUV PUB DAG ZOG
3. Yehauvas lub hwj huam dawb huv pab tau peb li cas?
3 Txawm peb muaj teebmeem ntau yam los Yehauvas lub hwj huam dawb huv pub lub dag lub zog kom ua taus peb tes haujlwm. Tus tubtxib Paulus ntsib ntau yam teebmeem tiamsis nws tseem ua tau nws tes haujlwm vim muaj “Khetos lub hwjchim” pab. (2 Kauleethaus 12:9) Thaum Paulus mus tshaj tawm txoj xov zoo zaum 2 tsis yog nws rau siab ntso mus tshaj tawm xwb tiamsis Paulus tseem mus ua haujlwm yug nws tus kheej. Lub sijhawm no, Paulus nrog Akilas thiab Paxilas nyob hauv lub nroog Kauleethaus. Lawv ua haujlwm xaws tsev ntaub, muaj tej hnub Paulus thiaj ua haujlwm nrog nkawd. (Tes Haujlwm 18:1-4) Lub hwj huam dawb huv pab Paulus ua haujlwm thiab mus tshaj tawm huv tibsi.
4. Raws li 2 Kauleethaus 12:7-9, Paulus muaj teebmeem zoo li cas?
4 Nyeem 2 Kauleethaus 12:7 hauv qab taw qhia, * 8 thiab 9. Hauv nqi no, Paulus qhia tias nws muaj tus ‘pos chob nws lub cev.’ Yog koj muaj ib tug pos chob koj, yeej yuav mob heev. Tiamsis tus pos uas chob Paulus yog dabtsi? Paulus qhia tias nws raug kev txomnyem heev. Nws txojkev txomnyem no zoo cuag li ‘Xatas tus tubtxib pheej nplawm nws.’ Txawm tias Xatas thiab nws cov dab tsis muab tus pos chob kiag Paulus los, thaum pom tus pos ntawd lawv yuav nias tus pos kom hajyam chob Paulus tob. Paulus ua li cas xwb?
5. Yehauvas teb Paulus tej lus thov li cas?
5 Thaum thawj, Paulus yeej thov kom Yehauvas muab tus “pos” tshem tawm mus. Nws hais tias: “Kuv twb thov Vajtswv [Yehauvas] . . . peb zaug lawm,” txawm li ntawd los tus pos tseem nyob li qub. Ua li puas yog Yehauvas tsis teb nws tej lus thov? Tsis yog. Txawm tias Yehauvas tsis tshem nws qho teebmeem los, Yehauvas twb pub lub dag lub zog rau Paulus kom nws thev taus. Yehauvas hais tias: “Kuv yuav pub kuv lub hwjchim rau tus uas qaug zog.” (2 Kauleethaus 12:8, 9) Vim muaj Vajtswv pab Paulus, nws lub siab thiaj tus thiab muaj kev kaj siab.—Filipis 4:4-7.
6. (1) Yehauvas yuav teb peb tej lus thov li cas? (2) Hauv nqi no cov nqi Vajlugkub twg txhawb tau koj lub zog?
6 Zoo yam li Paulus, koj puas tau thov Yehauvas kom nws tshem koj tej teebmeem mus? Txawm koj thov npaum li cas los zoo li tej teebmeem yeej tsis ploj li, tseem loj tshaj qhov qub lawm thiab. Puas ua rau koj xav tias Yehauvas tsis txaus siab rau koj lawm? Yog muaj li ntawd, nco ntsoov tias Yehauvas twb teb Paulus ces nws yeej yuav teb koj tej lus thov thiab! Tej zaum Yehauvas yuav tsis tshem koj tej teebmeem mus, tiamsis nws yuav pub lub hwj huam pab koj nyiaj taus tej kev nyuaj siab. (Phau Ntawv Nkauj 61:3, 4) Txawm cuag li koj raug “ntaus ntog” lawm los Yehauvas yeej yuav tsis tso koj tseg.—2 Kauleethaus 4:8, 9; Filipis 4:13.
LUB HWJ HUAM DAWB HUV PAB PEB MUAJ SIAB TEEV TIAM YEHAUVAS
7, 8. (1) Lub hwj huam dawb huv zoo yam li nthwv cua li cas? (2) Petus piav tias lub hwj huam dawb huv ua haujlwm li cas?
7 Lub hwj huam dawb huv pab peb li cas ntxiv? Lub hwj huam dawb huv zoo yam li ib nthwv cua uas ntsawj lub nkoj kom mus txog chaw. Thaum lub nkoj nyob hauv dej hiavtxwv uas muaj cua daj cua dub hlob heev, nthwv cua ntawd yuav ntsawj tau lub nkoj kom mus txog chaw. Txawm peb muaj kev nyuaj siab heev los lub hwj huam dawb huv yuav pab peb muaj siab teev tiam Yehauvas kom mus txog ntua lub qab ntuj tshiab.
8 Petus yog neeg ntaus ntses, nws thiaj paub tias lub nkoj yuav tsum muaj daim ntaub rau cua ntsawj. Tej zaum vim li ntawd nws thiaj piav txog kev caij nkoj tias Vajtswv lub hwj huam dawb huv ua haujlwm li cas. Nws sau tais: “Rau qhov tej lus qhia tshwm ntawd tsis yog neeg qhia, tiamsis yog Vaj Ntsujplig tus Dawbhuv [lossis “lub hwj huam dawb huv,” NWT ] tshoov neeg lub siab kom lawv qhia Vajtswv txojlus xwb.” Lus Kilis kuj txhais lo lus “tshoov” tias “mus raws” lossis “ua raws” thiab.—2 Petus 1:21.
9. Thaum Petus sau tias cov neeg sau Vajtswv Txojlus “mus raws” li lub hwj huam dawb huv, nws xav kom tibneeg xav txog dabtsi?
9 Thaum Petus sau tias cov neeg sau Vajtswv Txojlus “mus raws” li lub hwj huam dawb huv, nws xav kom tibneeg xav txog dabtsi? Muaj ib tug neeg tshawb fawb Vajlugkub hais tias cov lus uas Petus sau ntawd ua rau tibneeg xav txog thaum lub nkoj raug cua ntsawj. Lukas kuj hais ib lo lus Kilis uas muaj ntsis zoo li cov lus uas Petus sau ntawd thiab. Lukas piav tias thaum muaj cua hlob heev ntsawj lub nkoj, lub nkoj txawm tig ‘mus raws’ yam li cov cua lawm. (Tes Haujlwm 27:15) Petus qhia tias zoo ib yam li cua ntsawj lub nkoj mus kom txog chaw, cov sau Vajtswv Txojlus tsuas sau raws li lub hwj huam dawb huv tshoov lawv xwb. Tus neeg tshawb fawb Vajlugkub hais ntxiv tias ib yam li lub nkoj uas tau muab daim ntaub nthuav tos cua ntsawj, cov sau Vajtswv Txojlus tos Vajtswv lub hwj huam dawb huv coj lawv hau kev. Yog li ntawd, Yehauvas twb pub lub hwj huam dawb huv rau cov sau nws Txojlus lawm. Lawv tsuas sau raws li lub hwj huam dawb huv tshoov kom lawv sau xwb.
QHOV 1: Ua tej yam uas Yehauvas xav kom peb ua
QHOV 2: Ua Yehauvas tes haujlwm npaum li koj ua tau (Saib nqi 11) *
10, 11. Peb yuav tsum ua 2 yam twg, lub hwj huam dawb huv thiaj pab tau peb? Muab ua piv txwv.
10 Niaj hnub nimno Yehauvas tsis siv nws lub hwj huam dawb huv los tshoov tibneeg sau Vajlugkub lawm. Tiamsis Yehauvas tseem siv nws lub hwj huam dawb huv los coj nws cov neeg. Yog li ntawd peb yuav tsum ua li cas lub hwj huam thiaj pab tau peb?
11 Muab ua piv txwv li no. Yuav kom cua ntsawj tau lub nkoj, muaj 2 yam uas tus tsav nkoj yuav tsum tau ua. Thawj yam, nws yuav tsum xyuas seb cua ntsawj sab twg tuaj thiab ntsawj lub nkoj mus rau qhov chaw twg. Yog lub nkoj tsuas nyob ntawm qhov chaw nres nkoj xwb ces lub nkoj yuav mus tsis tau qhovtwg vim tsis muaj cua ntsawj. Yam 2, nws yuav tsum nthuav daim ntaub nkoj rau cua ntsawj. Txawm muaj cua los, daim ntaub yuav tsum raug cua mas lub nkoj thiab txav. Zoo ib yam li ntawd yuav kom peb muaj siab teev tiam Yehauvas, yuav tsum muaj lub hwj huam dawb huv pab. Yuav kom peb tau lub hwj huam dawb huv, muaj 2 yam uas peb yuav tsum tau ua. Thawj yam, peb yuav tsum ua tej yam uas Yehauvas xav kom peb ua, peb thiaj tau lub hwj huam dawb huv. Yam 2, peb yuav tsum rau siab ua tej ntawd npaum li peb ua tau. (Phau Ntawv Nkauj 119:32) Yog ua li no lub hwj huam dawb huv yuav pab peb nyiaj dhau peb tej kev sim siab thiab pab kom peb muaj siab teev tiam Yehauvas mus txog ntua nws lub qab ntuj tshiab.
12. Peb yuav tham txog dabtsi?
12 Peb tau tham txog 2 yam uas lub hwj huam dawb huv pab peb. Lub hwj huam dawb huv pub dag zog thiab pab kom peb teev tiam Yehauvas thaum muaj kev nyuaj siab. Lub hwj huam dawb huv kuj pab kom peb muaj siab ua Yehauvas tes haujlwm uas yuav coj peb mus tau txojsia ib txhis tsis kawg. Tamsim no peb yuav tham txog 4 yam uas peb yuav tsum ua peb thiaj tau lub hwj huam dawb huv.
PEB YUAV TSUM UA DABTSI THIAJ TAU LUB HWJ HUAM DAWB HUV
13. (1) Raws li 2 Timautes 3:16, 17, Vajtswv Txojlus pab tau peb li cas? (2) Tiamsis peb yuav tsum ua li cas?
13 Peb yuav tsum kawm Vajtswv Txojlus. (Nyeem 2 Timautes 3:16, 17.) “Vajtswv tshoov neeg lub siab” li cas? Nws siv nws lub hwj huam los tshoov neeg sau nws txojkev xav cia rau hauv phau Vajlugkub. Yog peb ua tib zoo xav txog tej uas peb nyeem hauv phau Vajlugkub peb yuav totaub Vajtswv txojkev xav. Yog peb totaub nws txojkev xav lawd ces peb yuav hloov peb lub neej raws li Yehauvas lub siab nyiam. (Henplais 4:12) Tiamsis yuav kom tau lub hwj huam dawb huv pab peb tiag, peb yuav tsum tseg sijhawm los kawm Vajlugkub thiab ua tib zoo xav txog tej ntawd. Yog ua li no ces peb thiaj yuav coj tau raws li Vajtswv Txojlus.
14. (1) Ua cas thiaj hais tau tias Yehauvas lub hwj huam dawb huv nrog peb thaum peb tuaj sib txoos ua ke? (2) Peb yuav tsum ua dabtsi thiaj tau lub hwj huam dawb huv pab tom kev sib txoos?
14 Peb yuav tsum pe hawm Vajtswv ua ke. (Phau Ntawv Nkauj 22:22) Yehauvas lub hwj huam dawb huv nrog peb thaum peb tuaj sib txoos. (Tshwmsim 2:29) Thaum peb tuaj sib txoos nrog cov kwvtij nkauj muam, peb thov kom lub hwj huam dawb huv nrog nraim txhua tus, peb hu cov nkauj uas rho los ntawm Vajtswv Txojlus los, thiab peb mloog cov kwvtij uas lub hwj huam dawb huv tau tsa los cev zaj lus qhuab qhia. Lub hwj huam dawb huv kuj pab cov muam cev lawv tej zaj kawm thiab. Tiamsis yuav kom peb tau lub hwj huam dawb huv pab peb tiag, peb yuav tsum kawm ua ntej thiab npaj mus teb tom kev sib txoos. Yog ua li no ces peb yuav tau lub hwj huam dawb huv pab peb ib yam li lub nkoj raug cua vim nws daim ntaub nthuav dav.
15. Lub hwj huam dawb huv pab peb thaum peb mus tshaj tawm li cas?
15 Peb yuav tsum mus qhia Vajlugkub. Peb cia lub hwj huam dawb huv pab peb thaum peb siv phau Vajlugkub mus tshaj tawm thiab mus qhia lwm tus. (Loos 15:18, 19) Tiamsis yuav kom peb tau lub hwj huam dawb huv pab tiag, peb yuav tsum nquag mus tshaj tawm thiab nco ntsoov siv phau Vajlugkub. Yog xav txawj nrog neeg tham ntxiv ces xyaum siv cov qauv hauv phau Lub Neej Thiab Tes Haujlwm Khixatia—Phau Kawm.
16. Yog xav tau Vajtswv lub hwj huam dawb huv ces peb yuav tsum ua li cas?
16 Thov Yehauvas. (Mathais 7:7-11; Lukas 11:13) Yog tias koj xav tau lub hwj huam dawb huv thaum twg ces thov kom Yehauvas muab rau koj thaum ntawd. Yeej tsis muaj ib yam dabtsi uas yuav cheem tau Yehauvas kom nws tsis hnov peb tej lus thov lossis pub tsis tau lub hwj huam dawb huv. Txawm yog peb raug kaw hauv nkuaj los lub hwj huam dawb huv yeej tseem pab tau peb, thiab Xatas yeej ua tsis tau dabtsi los txwv lub hwj huam dawb huv. (Yakaunpaus 1:17) Peb yuav thov Vajtswv li cas peb thiaj tau lub hwj huam dawb huv? Cia peb tham txog ib zaj lus piv txwv hauv phau Lukas uas yuav qhia seb peb yuav tsum thov Vajtswv li cas. Zaj lub piv txwv no tsuas muaj nyob hauv phau Lukas xwb. *
THOV VAJTSWV TSIS TSEG TSIS TU
17. Yexus zaj lus piv txwv hauv Lukas 11:5-9, 13 qhia li cas txog kev thov Vajtswv?
17 Nyeem Lukas 11:5-9, 13. Yexus zaj lus piv txwv qhia tias peb yuav tsum thov Vajtswv li cas thiaj tau lub hwj huam dawb huv. Txawm twb ib tag hmo lawm los tus txivneej hauv zaj lus piv txwv no tsis ntshai mus thov nws tus phoojywg pab. Vim nws “pheej thov tsis paub txajmuag li,” nws tus phoojywg thiaj pab nws. Yexus muab zaj lus piv txwv no piv rau kev thov Vajtswv li cas? Yexus hais tias: “Nej thov, nej thiaj yuav tau; nej nrhiav, nej thiaj yuav ntsib thiab nej khob, luag thiaj yuav qhib qhovrooj rau nej.” Yog li ntawd, peb yuav tsum thov Vajtswv tsis tseg tsis tu lub hwj huam dawb huv thiaj pab tau peb.
18. Raws li Yexus zaj lus piv txwv, ua cas peb thiaj tso siab tau tias Yehauvas yuav pub lub hwj huam dawb huv rau peb?
18 Yexus zaj lus piv txwv kuj qhia tias vim li cas Yehauvas thiaj li pub lub hwj huam dawb huv rau peb. Tus txivneej hauv zaj lus piv txwv no xav tiam qhua tiamsis tsis muaj dabtsi noj hauv tsev. Nws thiaj mus nrhiav zaub mov rau tus qhuas noj. Yexus hais tias tus txivneej ntawd tus phoojywg thiaj muab tau 3 lub ncuav rau nws vim nws pheej taij thov tsis tseg li. Lub ntsiab ntawm Yexus zaj lus piv txwv no yog dabtsi? Yog tias ib tug neeg txhaum twb paub pab nws tus phoojywg uas pheej taij thov nws tsis tseg ces peb Leej Txiv uas nyob saum ntuj hajyam yuav pub nws lub hwj huam dawb huv los pab cov uas taij thov nws. Cia li tso siab tias thaum peb thov Yehauvas, nws yeej yuav pub nws lub hwj huam dawb huv rau peb.—Phau Ntawv Nkauj 10:17; 66:19.
19. Vim li cas peb thiaj yuav ua taus siab ntev thev
19 Txawm Xatas yuav tawm tsam tsis tseg li los, peb yeej yuav ua tau siab ntev thev. Yog vim li cas? Vim lub hwj huam dawb huv pub dag zog kom peb thiaj nyiaj taus tej teebmeem. Tsis tas li ntawd xwb, lub hwj huam dawb huv pab kom peb muaj siab teev tiam Yehauvas mus txog ntua lub qab ntuj tshiab. Cia li rau siab kam tiag kom peb tau txais Vajtswv lub hwj huam dawb huv.
ZAJ NKAUJ 42 Vajtswv Cov Tub Qhe Tej Lus Thov
^ nqe 5 Zaj no yuav qhia seb Vajtswv lub hwj huam dawb huv pab peb thev tej teebmeem li cas. Peb kuj yuav kawm seb peb yuav tsum ua li cas Vajtswv lub hwj huam thiaj pab tau peb.
^ nqe 4 2 Kauleethaus 12:7, TT: “Xwv thiaj tsis pub kuv tsab ua loj vim tej uas Vajtswv qhia tshwm rau kuv pom ntau kawg ntawd, thiaj ua kom muaj pos chob kuv lub cev, yog Xatas tus tubtxib uas pheej nplawm kuv kom kuv thiaj tsis tsab ua loj dhau.”
^ nqe 60 COV DUAB: QHOV 1: Ib tug kwvtij thiab ib tug muam tuaj txog ntawm lub Tsev Nceeg Vaj. Vim nkawd tuaj koom nrog cov kwvtij nkauj muam nkawd thiaj tau Yehauvas lub hwj huam dawb huv. QHOV 2: Nkawd tau npaj ua ntej mus kev sib txoos. Yog peb ua 2 qho no, yuav pab tau peb thaum kawm Vajtswv Txojlus, mus tshaj tawm, thiab thov Yehauvas.
