1. Txawm Yehauvas yog tus Vajtswv loj dua ntais los, nws tseem cia lwm tus nrog nws ua dabtsi?

YEHAUVAS yog tus Vajtswv uas loj dua ntais. Nws yog tus tsim ib puas tsav yam, thiab nws yog tus muaj tswvyim thiab muaj zog loj zog nchav tshaj plaws. Tom qab Yehauvas qhia Yauj pom Nws lub hwjchim, Yauj thiaj hais tias: “Kuv paub tias koj ua tau txhua yam, thiab tej uas koj xav tseg lawd tsis muaj ib qhov yuav ua tsis tiav.” (Yauj 42:2) Yehauvas xav ua dabtsi los yeej ua tau kom tiav raws li nws lub ntsiab, tsis yuav leejtwg pab li. Tiamsis vim nws muaj kev hlub, nws thiaj cia lwm tus nrog nws ua haujlwm.

2. Yehauvas cia Yexus ua tes haujlwm tseem ceeb twg?

² Yehauvas xub tsim nws tus tub Yexus. Tom qab ntawd, nws cia Yexus pab nws tsim lwm yam tibsi. (Yauhas 1:1-3, 18) Tus tubtxib Povlauj tau sau li no txog Yexus: “Vim tus Tub ntawd, thiaj li tsim ib puas tsav yam tshwm los yog tej uas nyob saum nruab ntug, tej uas nyob hauv ntiajteb, tej uas qhov muag pom thiab tej uas qhov muag tsis pom . . . txhua yam puavleej tsim ntawm nws thiab tsim rau nws.” (Khaulauxi 1:15-17) Yehauvas tau muab tes haujlwm tseem ceeb no  rau nws tus tub thiab qhia lwm tus txog tej ntawd. Qhov no yog ib qho koob hmoov zoo heev, puas yog?

3. (1) Yehauvas cia Adas ua dabtsi? (2) Vim li cas Yehauvas thiaj cia Adas ua tej haujlwm ntawd?

³ Yehauvas kuj cia tibneeg nrog nws ua haujlwm thiab. Yehauvas cia Adas tis npe rau tej tsiaj txhu. (Chiv Keeb 2:19, 20) Ntshe qhov no ua rau Adas zoo siab xyiv fab kawg li! Thaum Adas tis npe rau cov tsiaj, nws ua tib zoo saib ib tug zuj zus seb tus tsiaj zoo li cas thiab coj li cas, ces nws mam tis lub npe uas phim tus tsiaj ntawd. Yog Yehauvas xav tis npe rau cov tsiaj los yeej tau, tiamsis nws cia Adas tis vim nws xav kom Adas paub tias nws hlub Adas heev. Tsis tas li ntawd xwb, Vajtswv kuj cia Adas tu lub ntiajteb kom ua ib lub vaj kaj siab thiab. (Chiv Keeb 1:27, 28) Tiamsis tsis ntev xwb, Adas txawm hloov siab tsis nrog Vajtswv ua haujlwm lawm. Vim li no, nws thiab nws cov xeeb ntxwv thiaj raug ntau yam kev nyuaj siab.​—Chiv Keeb 3:17-19, 23.

4. Ib co tau pab Vajtswv li cas kom muaj tiav raws li nws lub ntsiab?

⁴ Tom qab no, Vajtswv kuj cia lwm tus nrog nws ua haujlwm thiab. Nau-a tau ua ib lub nkoj uas cawm nws thiab nws tsev neeg thaum dej dag nyab ntiajteb. Mauxe tau cawm haiv neeg Yixayee dim ntawm cov Iyi. Yausua tau coj cov Yixayee mus rau hauv lub tebchaws uas Vajtswv cog tseg. Xalaumoo tau ua lub tuam tsev hauv Yeluxalees. Maivliag tau los ua Yexus niam. Tseem tshuav coob tus thiab, uas tau los nrog Yehauvas ua haujlwm kom muaj tiav raws li nws lub ntsiab.

5. Peb koom nrog Yehauvas ua txoj haujlwm twg, thiab nws puas cheem tsum peb pab nws? (Saib daim duab ntawm sab 28.)

⁵ Niaj hnub no, Yehauvas cia peb ua npaum li peb ua tau los txhawb nqa Nws lub Nceeg Vaj. Tej haujlwm uas peb ua tau rau Vajtswv mas ntau heev. Txawm peb nyias muaj nyias ib txoj haujlwm ua rau Vajtswv los, txoj uas peb sawvdaws ua tau yog mus tshaj tawm txog lub Nceeg Vaj. Yog Yehauvas xav ua, nws cia li hais saum ntuj tuaj rau tibneeg xwb los yeej tau. Thiab Yexus hais tias yog Yehauvas xav ua, nws yeej ua tau kom tej pob zeb txawj qhia tibneeg txog lub Nceeg Vaj. (Luka 19:37-40) Tiamsis Yehauvas tsis ua li ntawd, nws xav kom “peb koom nrog [nws] ua haujlwm.” (1 Khaulee 3:9) Tus tubtxib Povlauj tau sau tias: “Vim peb nrog Vajtswv ua haujlwm peb thov kom nej tsis txhob txais Vajtswv txojkev hlub los ua yam uas tsis muaj qabhau.” (2 Khaulee 6:1) Yog ib qho koob hmoov zoo heev uas Vajtswv cia peb koom nrog nws ua haujlwm, puas yog? Cia peb mus tham seb yog vim li cas txoj haujlwm no ho ua rau peb muaj kev zoo siab xyiv fab ua luaj!

6. Vajtswv tus tub hlob xav li cas xwb thaum nws nrog nws Leej Txiv ua haujlwm?

⁶ Thaum Yehauvas cov tub qhe nrog nws ua haujlwm, lawv yeej zoo siab xyiv fab heev. Ua ntej Vajtswv tus tub hlob los rau hauv ntiajteb, nws tau hais tias: “Thawj txog haujlwm uas [Yehauvas] ua yog nws tau tsim kuv . . . kuv nyob ntawm [Yehauvas] ib sab, ib yam nkaus li tus Kws ua tsev kuv ua rau nws muaj kev zoo siab txhua hnub, kuv xyiv fab rau ntawm nws xubntiag tsis tu li.” (Paj Lug 8:22, 30) Thaum Yexus nrog nws Txiv ua haujlwm, nws yeej zoo siab heev rau qhov nws ua tau ntau yam tiav thiab nws yeej paub tias Yehauvas hlub nws. Yog li, peb puas zoo siab thiab?

7. Vim li cas peb ho zoo siab thaum peb mus tshaj tawm?

⁷ Yexus hais tias thaum peb pub rau luag thiab tau txais luag li, ua rau peb zoo siab heev. (Tubtxib Tes Haujlwm 20:35) Peb zoo siab thaum peb los paub qhov tseeb, tiamsis vim li cas peb ho zoo siab thiab thaum peb qhia qhov tseeb rau lwm tus? Peb zoo siab rau qhov peb pom lawv zoo siab thaum lawv kawm tau qhov tseeb thiab muaj kev sib raug zoo nrog Vajtswv. Peb kuj zoo siab thaum peb pom lawv hloov lawv tej kev xav thiab lawv lub neej. Tes haujlwm tshaj tawm yog ib txoj haujlwm tseem ceeb thiab txaus siab tshaj plaws li. Tes  haujlwm no qheb kev rau cov uas los ua Vajtswv cov phoojywg kom tau txojsia nyob mus ib txhis.​—2 Khaulee 5:20.

8. Ob tug kwvtij tau hais li cas txog qhov uas nrog Vajtswv ua haujlwm?

⁸ Peb paub tias thaum peb pab lwm tus kawm txog Vajtswv, nws yeej txaus siab rau peb thiab saib peb tes haujlwm muaj nqes. Qhov no ua rau peb zoo siab xyiv fab kawg li. (Nyeem 1 Khaulee 15:58.) Marco [ma·kaus] uas nyob tebchaws Ithali tau hais li no: “Kuv zoo siab tias tes haujlwm uas kuv siv zog ua, yog ua rau Yehauvas, tsis yog ua rau cov uas tsis ris kuv txiaj ntsig.” Franco [fa·lee·kaus] kuj nyob tebchaws Ithali thiab tau hais li no: “Vajtswv Txojlus thiab tej uas Vajtswv tau npaj los txhawb peb txojkev ntseeg qhia tias nws hlub peb thiab nws saib tej uas peb ua rau nqe heev, txawm peb xav tias tej ntawd tsis tseem ceeb ua luaj twg. Twb yog vim li no, thaum kuv nrog Vajtswv ua haujlwm ua rau kuv zoo siab heev thiab ua rau kuv lub neej muaj hauv paus hauv ntsis.”

9. (1) Yehauvas thiab Yexus sib raug zoo npaum li cas? (2) Yog vim li cas nkawd thiaj sib raug zoo ua luaj?

⁹ Thaum peb nrog cov uas peb hlub tshua ua haujlwm, peb yeej txav ze rau lawv. Peb kuj paub lawv tus cwj pwm thiab lawv tej yeeb yam zoo dua. Kuj ua rau peb paub tej uas lawv npaj siab yuav ua thiab seb lawv yuav ua li cas thiaj ncav cuag tej ntawd. Yexus nrog Yehauvas ua haujlwm tau tsheej plhom xyoo. Nkawd txojkev sib hlub sib tshua thiaj ruaj khov heev, yeej tsis muaj ib yam dabtsi los txiav tau nkawd txojkev sib raug zoo li. Yexus tau hais li no txog nkawd txojkev sib raug zoo: “Kuv thiab leej Txiv yog ib tug xwb.” (Yauhas 10:30) Thaum nkawd ua haujlwm ua ke nkawd thooj siab koom ntsws tiag tiag li.

10. Vim li cas thaum peb mus tshaj tawm ho ua rau peb txav ze rau Vajtswv thiab lwm tus?

¹⁰ Yexus tau thov kom Yehauvas tiv thaiv nws cov thwjtim. Yog vim li cas? Yexus thov tias: “Kom lawv thiaj koom ib lub siab ib yam li koj thiab kuv.” (Yauhas 17:11) Yog peb ua peb lub neej raws li Vajtswv tej kevcai thiab mus tshaj tawm txoj xov zoo, ces peb yuav yimhuab paub Vajtswv tej yeeb yam zoo. Peb kawm tias zoo rau peb tso siab plhuav rau Yehauvas thiab mloog nws lus. Yog peb txav ze rau Vajtswv, ces nws yuav txav los ze peb. (Nyeem Yakaunpau 4:8.) Peb kuj txav ze rau peb cov kwvtij nkauj muam rau qhov peb sawvdaws yeej raug tib co teeb meem, koom tib txojkev zoo siab xyiv fab, thiab peb muaj tib lub hom phiaj. Peb ua Yehauvas tes haujlwm ua ke, zoo siab xyiv fab ua ke, thiab thev kev tsim txom ua ke. Octavia [a·te·vi·yas] uas nyob tebchaws Britain tau hais tias: “Thaum kuv nrog Yehauvas ua haujlwm, ua rau kuv txav ze rau lwm tus.” Nws hais li no rau qhov nws thiab nws cov phoojywg muaj tib lub hom phiaj thiab coj tib yam nkaus. Peb kuj xav ib yam li ntawd thiab. Thaum peb pom peb cov kwvtij siv zog ua tej yam uas Yehauvas nyiam, ua rau peb yimhuab txav ze rau lawv.

11. Vim li cas peb yuav yimhuab txav ze rau Yehauvas thiab peb cov kwvtij thaum nyob hauv lub ntiajteb tshiab?

¹¹ Niaj hnub no peb yeej hlub Vajtswv thiab  peb cov kwvtij heev, tiamsis hauv lub ntiajteb tshiab peb yuav yimhuab hlub lawv. Xav txog tej haujlwm uas peb yuav ua yav tom hauv ntej. Peb yuav zoo siab tos txais cov uas ciaj sawv rov los thiab qhia lawv txog Yehauvas. Peb kuj yuav muab lub ntiajteb kho ua ib lub vaj kaj siab thiab. Thaum Khetos kav, peb yuav zoo siab xyiv fab ua haujlwm ua ke thiab peb tej kev txhaum yuav ploj zuj zus mus txog thaum peb zoo tiav log. Thaum ntawd, ib leeg yuav hajyam txav ze rau ib leeg thiab txav ze rau Yehauvas, tus uas pub rau txhua tus muaj txaus nkaus thiab txaus siab rau tej uas lawv muaj.​—Phau Ntawv Nkauj (Ntawv Nkauj) 145:16, TMZ.

12. Kev tshaj tawm tiv thaiv tau peb li cas?

¹² Peb yuav tsum tiv thaiv peb txojkev sib raug zoo nrog Yehauvas. Peb nyob hauv Xatas lub qab ntuj thiab peb yog neeg txhaum, vim li no peb pheej xav thiab coj li lub qab ntuj. Qhov no kuj zoo li thaum peb ua luam dej hla ib tug dej uas ceev heev es pheej muab peb ntsawj mus rau qhov uas peb tsis xav mus xwb. Thaum zoo li no, peb yuav tsum peem tas zog peb thiaj hla dhau. Ib yam li ntawd, peb yuav tsum siv zog peem tiag peb thiaj zam dhau Xatas lub qab ntuj tej kev haub ntxias. Kev tshaj tawm txoj xov zoo yuav tiv thaiv tau peb ntawm tej kev haub ntxias li cas? Thaum peb qhia Vajlugkub thiab tham txog Yehauvas, ua rau peb xav txog tej yam zoo thiab tseem ceeb xwb, tsis xav txog tej uas yuav txo peb txojkev ntseeg. (Filipi 4:8) Thaum peb mus tshaj tawm, ua rau peb xav txog Vajtswv tej lus cog tseg thiab nws tej kevcai. Qhov no ua rau peb txojkev ntseeg ruaj khov. Tsis tas li ntawd xwb, qhov no kuj pab tau peb muaj tej yeeb yam zoo uas yuav tiv thaiv tau peb ntawm Xatas thiab nws lub qab ntuj.​—Nyeem Efexau 6:14-17.

13. Ib tug Timkhawv hauv tebchaws Australia tau hais li cas txog tes haujlwm mus tshaj tawm txoj xov zoo?

¹³ Yog peb rau siab ntso mus tshaj tawm, kawm Vajlugkub, thiab pab cov hauv lub koom txoos, peb yuav tsis muaj sijhawm txhawj txog peb tej teeb meem. Joel [ntsau] uas nyob tebchaws Australia [au·xi·ta·lia] tau hais tias: “Thaum kuv mus tshaj tawm txoj xov zoo ua rau kuv pom tias tibneeg muaj ntau yam kev nyuaj siab. Thiab kuv pom tias coj raws li Vajtswv tej hauv paus ntsiab lus yeej pab tau kuv tiag tiag li. Tsis tas li ntawd xwb, thaum kuv mus tshaj tawm pab tau kuv txo hwjchim thiab tso siab rau Yehauvas thiab kuv cov kwvtij nkauj muam.”

14. Ib xyoo tas ib xyoo tuaj peb rau siab ntso tshaj tawm tsis tseg. Qhov no qhia li cas rau peb?

¹⁴ Tes haujlwm tshaj tawm pab peb pom tias Vajtswv lub hwj huam dawb huv yeej nrog nraim peb. Ua piv txwv tias koj tes haujlwm yog nqa zaub nqa mov mus rau tej kwvtij zej zog noj. Koj ua tes haujlwm no dawb xwb thiab yog muaj nqe dabtsi los koj yog tus them huvsi. Tiamsis coob tus tsis kam txais tej zaub mov uas koj nqa mus, ib txhia tseem ntxub koj thiab. Ua li, koj puas yuav ua taus tes haujlwm no ntev mus? Ua tsis taus ntev, koj yuav pib qaug zog ces koj yuav muab tso tseg. Thaum mus tshaj tawm txoj xov zoo los, peb kuj siv peb lub sijhawm thiab peb tej nyiaj txiag mus ua tes haujlwm no, thiab kuj muaj coob tus thuam thiab cem peb. Txawm li ntawd los, ib xyoo tas ib xyoo tuaj peb tseem rau siab ntso mus tshaj tawm tsis tseg. Qhov no qhia tias Vajtswv lub hwj huam dawb huv yeej nrog nraim peb tiag.

15. Tes haujlwm tshaj tawm txoj xov zoo thiab Yehauvas lub ntsiab rau noob neej ho sib dhos li cas?

¹⁵ Tes haujlwm tshaj tawm thiab Yehauvas lub ntsiab rau noob neej ho sib dhos li cas? Vajtswv lub ntsiab yog kom tibneeg nyob mus ib txhis. Txawm Adas ua txhaum lawm los, Vajtswv lub ntsiab tseem nyob li qub. (Yaxaya 55:11) Vajtswv tau npaj ib txojkev los pab kom peb dim ntawm kev txhaum thiab kev tuag. Vajtswv tau ua li cas? Nws tau txib Yexus los rau hauv ntiajteb los muab nws txojsia txhiv  noob neej. Tiamsis yuav kom Yexus tus nqe txhiv pab tau noob neej lawv yuav tsum mloog Vajtswv lus. Yog li ntawd, Yexus thiaj qhia tibneeg tias lawv yuav tsum ua li cas thiaj haum Vajtswv siab, thiab Yexus sam hwm kom nws cov thwjtim mus ua tes haujlwm tshaj tawm. Thaum peb mus tshaj tawm thiab pab lwm tus los ua Vajtswv cov phoojywg, ces twb yog peb koom nrog Vajtswv ua tes haujlwm mus cawm tibneeg kom dim ntawm kev txhaum thiab kev tuag.

16. Vim li cas thaum peb mus tshaj tawm txoj xov zoo ho yog peb mloog Vajtswv txoj kevcai uas tseem ceeb dua ntais?

¹⁶ Thaum peb pab lwm tus los taug txojkev uas mus tau txojsia ib txhis ces qhia tias peb hlub lawv thiab hlub Yehauvas. Yehauvas “xav kom ib tsoom neeg sawvdaws tau txais kev dim thiab paub txojkev tseeb.” (1 Timaute 2:4) Thaum muaj ib tug Falixai nug Yexus tias txoj kevcai twg tseem ceeb dua ntais, Yexus teb nws li no: “‘Koj yuav tsum hlub [Yehauvas] uas yog koj tus Vajtswv kawg siab kawg ntsws, thiab kawg koj lub tswvyim.’ Nqe no yog thawj nqes thiab yog nqe uas tseem ceeb dua ntais. Nqe uas ob kuj ib yam nkaus hais tias, ‘Koj yuav tsum hlub kwvtij zej zog ib yam li koj hlub koj tus kheej.’” (Mathai 22:37-39) Thaum peb mus tshaj tawm txoj xov zoo ces twb yog peb ua raws li txoj kevcai no ntag.​—Nyeem Tubtxib Tes Haujlwm 10:42.

17. Koj xav li cas txog qhov koob hmoov mus tshaj tawm txoj xov zoo?

¹⁷ Peb tau txais ib qho koob hmoov zoo tshaj plaws li, puas yog? Yehauvas tau muab ib teg haujlwm uas ua rau peb zoo siab xyiv fab, ua rau peb txav ze rau nws thiab peb cov kwvtij, thiab tseem pab tiv thaiv peb txojkev sib raug zoo nrog nws. Tes haujlwm no kuj qhia tau rau Vajtswv thiab lwm tus tias peb hlub lawv heev. Yehauvas muaj ntau plhom tus tub qhe thoob ntiajteb thiab lawv nyias muaj nyias ib lub neej. Txawm peb laus peb hluas peb muaj peb pluag los, peb txhua tus yeej ua npaum li peb ua tau los qhia txoj xov zoo rau lwm tus. Peb txhua tus yeej xav li Chantel [sa·tes] uas nyob Fab Kis teb tau hais: “Tus Loj duas ntais, tus Tswv Tsim, tus Vajtswv zoo siab, hais rau kuv tias: ‘Cia li mus! Tshaj tawm kuv cov lus, tshaj tawm hauv koj nruab siab tuaj. Kuv mam muab kuv lub zog thiab kuv Txojlus rau koj. Kuv mam muab kuv cov tubtxib saum ntuj thiab kuv cov phoojywg hauv ntiajteb los pab koj. Thiab kuv mam cob qhia koj raws caij raws nyoog.’ Yeej yog ib qho koob hmoov zoo tshaj plaws rau peb ua li Yehauvas tau txib thiab koom nrog nws ua haujlwm!”