KAHANA 4
Lalomamina ia Dika—“Egu Kerere Dekena amo Lau Do Oi Hagoevaia”
“Egu moni gaukara matamata dainai egu ruma bese ena mauri ia namo, to danu, unai gaukara gabunai kara kerere momo lau karaia. Dina badadia lau moalelaia, politikol karadia lalonai lau vareai, bona dubu idaudia dekenai lau lao. Lau be Iehova ena Witnes hahinena, to lagani 40 lalonai kongrigeisen taudia lau bamoa lasi. Lagani momo idia hanaia dainai, lau laloa Iehova ese egu dika do ia gwauatao lasi. Unai dainai, nega momo lau lalohisihisi. Ena be hereva momokani lau diba, to dala kererena lau badinaia noho.”—Martha.
TA ENA lalomamina ia dika be namo lasi. King Davida ia gwau: “Egu kerere bada ese, egu kwarana idia koua vadaeni, abata ese taunimanima ia koua bamona. Egu kerere ena metau be bada herea, lau huaia diba lasi.” (Salamo 38:4) Keristani taudia haida be edia lalomamina ia dika dainai, idia laloa Iehova be edia dika do ia gwauatao lasi. (2 Korinto 2:7) Unai be momokani, a? Ena be kara dika rohorohodia oi karaia, to Iehova ese emu dika do ia gwauatao, a? Oibe, ia gwauatao diba!
“Harihari Umui Mai, Ita Hereva Hebou”
Iehova be idia helalo-kerehai taudia ia rakatania lasi. Oibe, Ia abidia dae! Boio merona ena parabole lalonai, Iesu ese Iehova be tama lalokauna ta ida ia hahegeregerea—iena natuna ese ruma bese ia rakatania bona ia lao mauri dikana amo ena kohu ibounai ia haorea. Gabeai, unai mero be ena ruma dekenai ia giroa lou. “Gabu daudauna amo [mero] ia mai noho lalonai, ena tamana ese ia itaia bona ia hebogahisi henia bena ia heau lao, ia rosia bona ia kisi henia.” (Luka 15:11-20) Oi ura Iehova kahirakahira oi lao, to oi mamia ia amo oi ‘daudau,’ a? Iesu ese ia herevalaia tamana hegeregerena, Iehova be oi ia hebogahisi henia bada. Ia ura ia dekenai oi giroa lou.
To bema kara dika badadia oi karaia dainai, oi laloa Iehova ese emu dika ia gwauatao diba lasi be edena bamona? Isaia 1:18 ai Iehova ena noinoi be inai: “Harihari umui mai, ita hereva hebou. Momokani, umui emui dika be bada, rara ia kakakaka momokani bamona, to lau ese umui do lau huria, vadaeni do umui goeva, sinou ia kurokuro bamona.” Momokani, Iehova be eda dika ia gwauatao diba, herevana eda kara dika be dabua kurokuro ai ia kamokau peni ena kala kakakakana bamona bona toana be ita kokia be auka.
Iehova ia ura lasi emu lalomamina ia dika noho. Ia ese emu dika ia gwauatao bona emu lalomamina ia goeva neganai, dahaka oi karaia diba? King Davida ena kara rua mani oi laloa. (1) Ia gwau: “Lauegu kerere, be Lohiabada ena vairanai do lau gwauraia hedinarai.” (Salamo 32:5) Laloatao, Iehova be oi ia boiria vadaeni guriguri amo ia ida umui “hereva hebou” totona. Unai boiboi oi abia dae. Emu kerere bona hemami be Iehova dekenai oi gwauraia hedinarai. Davida be unai bamona ia karaia dainai, ia guriguri: “Egu kerere dekena amo lau do oi hagoevaia . . . Dirava e, bema tau ta be iena kara dika dainai ia lalohisihisi momokani, bona ia manau momokani neganai, oi ese ia do oi negea diba lasi.”—Salamo 51:2, 17.
(2) Dirava ese ia abia hidi peroveta tauna Natana ese Davida ia durua. (2 Samuela 12:13) Hari, Iehova be kongrigeisen elda taudia ia abia hidi bona ia hadibadia namonamo, unai amo idia helalo-kerehai taudia do idia durua Iehova ena turana ai idia lao totona. Elda taudia dekenai oi lao neganai, Baibel amo oi do idia durua bona oi ida do idia guriguri, unai amo emu lalomamina do ia goeva bona goada do oi abia lou.—Iamesi 5:14-16.
Iehova ia ura emu lalomamina ia goeva bona oi moale
“Bema Iena Kerere be Dirava ese Ia Gwauatao, Unai Tau be Ia Moale”
Reana oi laloa guriguri amo Iehova Dirava dekenai emu dika oi gwauraia hedinarai bona elda taudia edia heduru oi tahua be ia auka. Davida be unai bamona ia mamia danu. Iena ‘kara dika ia gwauraia hedinarai lasi,’ to nega daudau lalonai ia hunia. (Salamo 32:3) To gabeai, iena dika ia gwauraia hedinarai bona ena kara ia hamaoromaoroa dainai, namo bada ia davaria.
Hegeregere, Davida ia moale bada. Ia gwau: “Bema Dirava ese tau ta ena kara dika ia gwauatao neganai, unai tau be ia namo. Bema iena kerere be Dirava ese ia gwauatao, unai tau be ia moale.” (Salamo 32:1) Ma ia gwau: “Lohiabada e, oi ese lau do oi durua, do lau hereva goada, bona oiemu ladana do lau habadaia momokani.” (Salamo 51:15) Davida ia moale badina Dirava ese ena dika ia gwauatao bona ena lalomamina ia goeva, bona unai dainai, ia ura ma haida dekenai Iehova ena sivarai ia herevalaia.
Iehova ia ura emu lalomamina ia goeva bona oi moale. Bona Ia ura oi be mai emu lalomamina goevana bona moale ida ma haida dekenai Iena sivarai bona gwauhamata oi harorolaia. (Salamo 65:1-4) Laloatao, Iena boiboi be, “emui kara dika do ia kokia bona Iehova sibona ese umui dekenai goada matamata do ia henia.”—Kara 3:19.
Martha dekenai unai ia vara. Ia gwau: “Egu natuna merona be lau dekenai Gima Kohorona bona Awake! magasin ia siaia loulou. Metairametaira, lau be Iehova lau tura henia. To lau mamia ia auka ia lau noia egu dika ia gwauatao totona. To gabeai, Dirava lau guriguri henia egu dika ia gwauatao totona. Lau hoa badina lagani 40 murinai lau be Iehova dekenai lau giroa lou. Egu sivarai ese ia hahedinaraia, ena be ta be lagani momo murinai ia giroa lou, to Dirava ia hesiai henia diba bona ena lalokau lalonai do ia noho.
Reana Inai Danu Oi Ura
GIMA KOHORONA—STADI GAUNA
Iehova Ena Gwauatao Karana amo Namo Oi Abia Dalana
IEHOVA KAHIRAKAHIRA OI LAO
Dirava Ia “Noho Hegaegae Dika Gwauatao Totona”
Bema Dirava ena laloatao karana be goevadae, edena dala ai kara dika ia gwauatao bona laloaboio?
VIDIO
Boio Merona Ia Giroa Lou
Madi, matamata taudia momo be haida ese edia lalona idia veria dainai, edia Keristani maurina idia rakatania. Hari inai negai matamata taudia ese idia davaria hekwakwanai oi dibaia.
