Inai dina gabedia ai, “kahirakahira gabudia bona daudau gabudia amo tuari sivaraidia do [ita] kamonai.” (Mataio 24:6) Ena be iseda tadikaka be inai tuari dainai idia lalohisihisi, to heduru idia abia. Bona 2022 Hakaua Oreana Ena Ripoti #3 ese Eastern Europe ai, Ukraine ai ia vara noho tuari ese ia hahisia taudia durua totona idia karaia relief gaukarana dekenai hagoadaia herevadia haida ia halasia. Edena dala ai iseda tadikaka be ta ta idia durua ena be tuari idia vara noho? Edena dala ai inai relief gaukarana ese Ukraine ai iseda tadikaka taihu ia durua?

 February 24, 2022 ai, Ukraine ai tuari ia matamaia dinana ai, Coordinators’ Committee be releif gaukara totona do idia gaukaralaia moni dekenai gwaumaoro ia henia, Ukraine ai iseda tadikaka taihu durua totona. Ukraine brens be edia gabu ai gau haida idia hoia matamaia, bona idia abia hidi Disasta Relief Komiti 27 idia gaukaralaia unai gaudia idia hariharilaia totona.

 Ukraine brens durua totona, Iehova Ena Witnes Taudia Edia Hedikwota amo tadikaka be karaharaga heduru do idia henia daladia idia laloa. Hakaua Oreana ena Coordinator bona Publishing komiti ese Global Purchasing Department idia noia Ukraine bona Poland brens ofesi ida idia gaukara hebou totona, unai amo do idia abia lao gaudia bona abia lao dalana ena palani idia karaia. Brens ta ta amo, Purchasing, Shipping, bona Legal dipatmen dekenai idia gaukara tadikaka, Ukraine ena Brens Komiti memba ta, bona Global Purchasing Dipatmen taudia be dina ta ta idia hebou, heduru henia daladia idia herevalaia totona.

 Jay Swinney, ia be Global Purchasing Department amo, ia gwau, “Ginigunana, edia dabu gaudia do ai diba guna. Ai ura unuseniai idia noho tadikaka taihu ese idia manadalaia aniani bona hagoevaia gaudia (hygiene items) ai henia. To ia auka sisina edia dabu gaudia ai dibaia totona. Danu, dala ai tahua edena bamona unai gaudia be seif dalanai do ai abia lao haraga.”

 March 9, 2022, tadikaka be Ukraine tadikaka taihu edia dabu gaudia idia dibaia. Hegeregere boksi lalonai tini miti bona gwarume, witi, raisi, bini, bona hagoevaia gaudia hegeregere sopu bona toileti pepa idia henia diba. Unai negai, idia itaia wiki foa lalonai taunimanima tamona totona do idia henia gaudia ena davana be $65 (U.S.) bamona. Tadikaka taihu momo be unai gaudia dekenai do idia dabu dainai, Kodineita Komiti ese gwaumaoro ia henia moni bada sisina do idia gaukaralaia, heduru idia henia totona. To edena dala ai tadikaka ese seif dalanai tadikaka taihu dekenai unai gaudia do idia abia lao?

 March 13 ai, Poland tadikaka rua be test delivery ta idia karaia, Poland brens ofesi amo idia lao Ukraine kahirakahira ia noho warehouse ta Lviv dekenai. Idia do lao lasi neganai, Poland bona Ukraine brens tadikaka ese unai volantia tadikaka idia durua edia laolao totona idia hegaegae. Brens ese boda do idia hanaia bona do idia henia heduru (humanitarian aid) totona legal pepadia idia hegaegaelaia, idia sekea bema tadikaka edia motuka ai (aid) o heduru henia ena saini idia atoa , bona Ukraine ai idia noho tadikaka ida idia gaukara hebou unai amo tadikaka be motuka amo boda idia hanaia neganai, dala haragana bona maorona amo idia heau diba. Unai hegaegae namonamo karana bona Iehova ena hanamoa dainai, Lviv dekenai unai gaudia idia abia lao bona hora 24 lalonai relief gaudia be Disasta Relief Komiti taudia ese idia abia, bona iseda tadikaka be Poland dekenai idia giroa lou namonamo.

 Ena be unai test delivery ginigunana idia karaia namonamo, tadikaka ese idia henia heduru gaudia ena bada be 1,000 kilogram (1 U.S. ton) bamona. To danu, heduru gaudia ma haida ena bada be 220,000 kilogram (220 U.S. tons) do idia henia danu be namo! Edena dala ai unai heduru gaudia idia abia lao bona haria haraga diba?

 Ukraine ai ia vara tuari ese iseda tadikaka taihu edia noho dalana ia hadikaia ena ripoti be taunimanima ese jw.org ai idia duahia neganai, tanobada hegegemadai momo idia ura heduru idia henia. Gabu daudau idia noho taudia momo be Iehova ena Witnes taudia edia tanobada ibounai gaukarana durua totona doneisen idia henia, idia diba edia kontribiusen ese heduru bada do ia henia. Boda ai idia noho taudia be edia nega, goada, bona edia kohu idia gaukaralaia heduru idia henia totona. Idia haida edia ekspiriens be inai.

 Poland dekenai, volantia taudia ese heduru gaudia tausen momo idia haboua, bona natudia be kadi maragidia momo idia torea. Bartosz Kościelniak, Poland brens ofesi ena Purchasing Department memba ta ia gwau, “Inai siri Salamo 110:3 be nega momo lau duahia, ia hahedinaraia Iehova ena ‘taunimanima be mai moale ida’ ia ida do idia lao. To hari lau sibona ese tadikaka taihu edia heduru lau itaia, volantia taudia handred momo idia mai haraga bona idia hegaegae gaukara karaia totona. Unai ese lau ia durua bona lau mamia unai siri ena hereva be momokani.”

 Iehova ena Witnes ta be international logistics kampani ena biaguna, ia ese ena motuka bona fuel ia henidia. Ia gwau: “Lau dekenai unai be dala ia kehoa egu tadikaka taihu bona Iehova totona egu lalokau lau hahedinaraia totona. Lau moale bada heduru lau henia.” Fuel ena bada 7,700 lita (2,034 gal) mai kahana idia doneit, bona tadikaka be edia nega bona goada idia gaukaralaia motuka idia taria kilomita 48,000 (30,000 mi) bamona unai gaudia idia abia lao totona!

 Tadikaka taihu be mai ura bada bona lalokau ida idia gaukara dainai, March 28 ai test delivery ginigunana idia karaia, bena dina 15 murinai aniani bona hagoevaia gaudia (hygiene materials), bona medikol heduru gaudia 110,000 kilogram (110 U.S. tons) bamona be Ukraine dekenai idia abia lao! Bona tadikaka taihu bona ma haida (suppliers) ese doneisen gaudia idia henia dainai, tadikaka ese relief gaukara totona moni bada idia gaukaralaia lasi. Ema bona hari, Iehova ena Witnes taudia be Ukraine dekenai relief gaudia 190,000 kilogram (209 U.S. tons) bamona idia siaia lao. Edena dala ai unai gaudia ese iseda tadikaka taihu ia durua?

 Durua gaudia (aid packages) be Lviv dekenai idia ginidae neganai, Ukraine ai idia noho Disasta Relief Komiti taudia ese heduru do idia abia taudia dekenai unai gaudia idia henia. Heduru gaudia be siti idauidau dekenai idia abia lao, gabu haida ena daudau Lviv amo be kilomita 1,300 (800 mi) mai kahana. Gaukara idia karaia namonamo, to nega bada idia gaukaralaia. a

 Ukraine Brens Komiti ta, Markus Reinhardt ia gwau: “Inai tuari lalonai, tadikaka momo be Iehova ena lalokau idia mamia, bona iena orea amo idia mai hadibaia hereva badinaia namonamo karana ena namo idia itaia​—⁠disasta ia do vara lasi negadia ai danu. Haheitalai ta be, ibounai idia hadibaia edia ruma ai wiki ta bamona ena aniani bona ranu idia haboua be namo. Unai hakaua hereva totona, Kyiv ai elda tadikaka ta ladana Anton ia gwau: ‘Iehova ena orea be ita idia durua nega aukadia totona ita hegaegae, bona unai kara dainai ita moale. Aniani bona ranu ai abia bona reidio ta ai dogoatao noho karana ese ai ia hamauria.’ Ita moale bada tadikaka taihu ese mai kudouna ibounai ida unai hakaua herevadia idia badinaia, badina unai ese brens ofesi dekenai nega ia henia relief gaudia idia hegaegaelaia totona.”

 Iseda tadikaka taihu ese relief gaudia idia abia neganai, edia hemami be edena bamona? Kharkiv ai idia noho taudia Mykola bona Zinaida be inai bamona idia gwau: “Ai umui laloa bada karana ese emai kudouna ia hamarerea. Tanikiu bada umui ese ai dekenai aniani bona muramura umui henia. Momokani, inai dala amo ai itaia Iehova be ai ia naria noho.” Taihu Valentyna danu ia gwau: “Tuari ia matamaia negana amo, taunimanima momo herea be laini dekenai do idia gini aniani hoia totona. Nega momo ia auka emai dabu gaudia ai hoia. Unai bamona metau negadiai, toana be heduru abia dalana ta be lasi, to Iehova be emai dabu gaudia ia itaia. Tadikaka ia abidia hidi heduru gaudia be ruma ta ta dekenai idia henia. Ta be unai dala amo Iehova bona ena orea ese spesel dalana ai ia idia naria karana ia mamia. . . . Nega korikori ai iena heduru ai abia karana be moale bada gauna.”

 Yevhen, Iryna, bona Mykyta, be Mariupol siti amo idia heau, idia gwau: “Ai tanikiu bada badina emai ruma bese umui naria bona umui durua. Momokani, unai heduru be nega korikorina lalonai ai abia. Inaiboksi lalonai umui siaia heduru gaudia ese ia hahedinaraia ai umui lalokau henia. Unai ai mamia momokani!”

 Momokani oi itaia diba Iehova be ena lauma helaga amo hakaua herevadia ia henia ena taunimanima ese “tuari bona tuari sivaraidia” idia vara lalonai, relief gaudia idia henia totona. Tanobada ibounai gaukarana durua totona umui henia doneisen idauidau, donate.dan124.com amo umui henia gaudia danu, ese relief gaukara ia durua bada. Emui harihari bada karana dainai umui ai tanikiu henia!

Relief Gaudia ai Henia Haraga Bona Seif Dalana Ai

1. February 24, 2022: Coordinators’ Committee ese Ukraine ena relief gaukara dekenai do idia gaukaralaia moni totona gwaumaoro idia henia, unai amo brens ese relief gaukara ia hamatamaia diba

2. February 24–March 8, 2022: Ukraine brens be edia gabu ai gau haida idia hoia bona Disasta Relief Komiti ese idia siaidia. Brens ofesi danu ia hegaegae Poland amo durua gaudia idia abia bona idia haria totona

3. March 9, 2022: Coordinators’ Committee ese gwaumaoro ia henia Ukraine dekenai durua gaudia (humanitarian aid) idia abia lao totona

4. March 10–12, 2022: Palani idia karaia test delivery ta amo aniani bona gau ma haida be Poland amo idia abia lao Lviv, Ukraine dekenai

5. March 13, 2022: Test delivery amo aniani bona gau ma haida be Poland amo idia siaia lao Lviv, Ukraine dekenai

6. March 14–16, 2022: Assembly Hall ta Poznan kahirakahira, Poland ai, Local Design/Construction volantia taudia be idia hegaegae aniani bona hagoevaia gaudia idia haboua totona

7. March 17, 2022: Test run idia karaia bona dina foa murinai, durua gaudia 13 metric tons (14 U.S. tons) be Ukraine ena boda dekenai idia abia lao

8. March 21–27, 2022: Poland ai heduru gaudia oredia idia haboua, bona Ukraine dekenai idia siaia. Unai dala tamona idia badinaia dainai, hora 24 lalonai gau haida dekenai idia dabu taudia ese heduru idia abia

9. March 28, 2022: Gwaumaoro idia henia murinai dina 20 lalonai, aniani, hagoevaia gaudia, bona medikol heduru gaudia 100 metric tons (110 U.S. tons) be Ukraine dekenai idia haria

 Ema bona hari, Iehova ena Witnes Taudia ese heduru gaudia 190 metric tons (209 U.S. tons) bamona Ukraine dekenai idia siaia