Dirava ese Adamu ia hamaoroa, “inai huahua oi ania dina dekenai do oi mase momokani.” (Genese 2:17) Bema Dirava ese Adamu bona Heva ia havaraia do idia buruka bona mase, idia dekenai unai hahegani be anina lasi. Adamu ia diba bema au ena huahua ia ania lasi, do ia mase lasi.

Adamu bona Heva idia mauri totona unai au ena huahua idia ania be anina lasi badina uma ai au huahua be momo herea idia noho. (Genese 2:9) Bema unai au huahua idia ania lasi, reana unai tau bona hahine ginigunana ese mauri ia henia Diravana dekenai edia kamonai karana do idia hahedinaraia. Danu, do idia laloparara Dirava be mai ena maoro idia ia hakaua totona.

Adamu bona Heva idia mase ena badina ita lalopararalaia totona, namona be idia huanai ia vara gauna ese ita dekenai ia havaraia dika ita herevalaia. Satani Diabolo ese gaigai ta ia gaukaralaia hereva koikoi ia gwauraia totona. Baibel ia gwau: “Lohiabada Dirava ia karaia mauri gaudia ibounai edia aonega be gaigai ese ia hanaia. Ia ese hahine dekenai ia henanadaia, ia gwau: ‘Momokani, uma gabu ena au huahua ta ania lasi taravatu Dirava ese ia atoa o lasi?’”​—Genese 3:1.

Heva ia haere, ia gwau: “Uma gabu dekenai idia gini au edia huahua ibounai ai ania be ia namo, to uma gabu ena huana dekenai au ta ia gini, ena huahua dekenai Dirava ia gwau, ‘Unai au ena huahua umui ania lasi, bona dogoatao lasi, umui mase garina.’” Gabeai gaigai ese hahine dekenai ia gwau: “Inai be momokani lasi, dohore umui mase lasi. Dirava be inai bamona ia hereva badina ia diba, umui ania neganai aonega do umui davaria, bona Dirava hegeregere do umui noho, kara namona bona kara dikana do umui diba.” Unai dainai, Satani ia gwau Iehova be koikoi tauna bona ia ura lasi Adamu bona Heva dekenai gau namodia ia henia.​—Genese 3:2-5.

Heva be Satani ena hereva ia abiadae. Bona ia itaia unai au ena toana be namo herea dainai, ena au huahua ia abia, bona ia ania. Bena Baibel ia gwau: “Ma iena tau dekenai ia henia danu, bona ia danu ia ania.”​—Genese 3:6.

Dirava ia itaia ia lalokau henia natudia ese mai ura ida ena taravatu idia badinaia lasi neganai, unai ese ena lalona ia hahisia bada, ani? Dahaka ia karaia? Adamu dekenai, Iehova ia gwau: “Tano dekenai do oi giroa lou, badina be tano dekena amo oi mai. Oi be tano dekena amo karaia gauna, bona  tano dekenai do oi giroa lou.” (Genese 3:17-19) Unai dainai, “Adamu ena mauri lagani ibounai be 930, vadaeni ia mase.” (Genese 5:5) Adamu be gabu ta eiava guba dekenai ia mauri noho lasi. Guna ia noho lasi, to gabeai Dirava ese tano ena kahu amo ia karaia. Unai dainai ia mase neganai, tano ena kahu dekenai ia giroa lou. Anina be ia ore momokani. Unai be dika herea!

Adamu bona Heva be mai ura ida idia gwau-edeede dainai, mauri goevadaena bona noho hanaihanai maurina idia haboioa. Edia mauri ai senisi idia vara; idia be goevadae lasi bona kara dika taudia ai idia lao. To edia gwau-edeede karana ena dika ese idia sibona dekenai dika ia havaraia lasi. Edia natudia ibounai idia vara neganai, idia be goevadae lasi. Roma 5:12 ia gwau: “Tau tamona [Adamu] dekena amo kara dika be tanobada dekenai ia vareai, bona kara dika ese mase ia mailaia. Bona unai dainai mase be taunimanima ibounai dekenai ia hanaia lao, badina idia ibounai be idia kara dika vadaeni.”

Baibel ia gwau, kara dika bona mase be “bese idauidau ibounai ia koua noho, dabua badana bamona.” (Isaia 25:7) Inai dabua badana be taunimanima ibounai ia koua noho kwalahu dikana bamona bona idia be dala lasi idia heau mauri totona. Momokani, “Adamu amo taunimanima ibounai idia mase noho.” (1 Korinto 15:22) Unai dainai Aposetolo Paulo ia henanadai: “Inai tauanina, egu mase do ia havaraia gauna amo daika ese lau ia hamauria diba?” Ta ese Paulo ia hamauria diba, a?​—Roma 7:24.