Dahaka ese Emu Vaira Nega Ia Gwauraia Diba?
Momo idia abia dae, idia itaia diba lasi gaudia ese edia vaira negana ia biagua. Idia laloa unai ese edia mauri do ia hanamoa.
MOMO IDIA BILIV GAUDIA
HISIU STADILAIA BABALAU TAUDIA: Haida idia laloa beibi ia vara neganai, hisiu ese ena vaira negana ia hahedinaraia. Idia ese horoscopes idia duahia, unai amo edia vaira nega idia dibaia bona idia ia durua disisen idauidau idia karaia.
BABALAU TAUDIA HEREVA HENIA KARANA: Haida idia abia dae edia mauri ai do idia kwalimu totona babalau taudia edia heduru idia tahua be namo. Idia laloa unai bamona idia karaia neganai, gau ibounai do idia namo. Danu, babalau taudia ese idia hamaoroa hegeregerena disisen idia karaia.
SENE TAUDIA TOMADIHO HENIA KARANA: Ma haida idia abia dae edia sene taudia idia matauraia, eiava dirava idauidau idia tomadiho henia karana ese idia do ia gimaia bona hanamoa. Vietnam ai hahine ta ladana, Veni, * ia gwau, “Lau abia dae egu sene taudia lau matauraia neganai, hari bona nega vaira ai lau bona egu natudia emai mauri do ai moalelaia.”
REINKANEISEN: Momo idia abia dae, ta ia mase neganai ia vara lou, bona unai bamona do ia vara loulou. Idia abia dae, guna edia mauri lalonai idia karaia gaudia dainai, hari unai ese namo eiava dika ia havaraia.
Ena be momo idia gwau idia be unai bamona gaudia idia abia dae momokani lasi, to idia ese inai gaudia, hegeregere imana palapala itaia karana, horoscopes, au raurau o ageva abia loaloa karana, kasi gaukaralaia karana, bona unai bamona gaudia ma haida idia gaukaralaia. Idia laloa reana unai gaudia ese idia do ia durua edia vaira negana idia diba totona.
IDIA BILIV GAUDIA ESE IDIA IA DURUA, A?
Momo idia biliv bona badinaia gaudia ese edia mauri ia hanamoa bona vaira nega ia gimaia, a?
Vietnam ai ia noho tauna ladana, Hao, ena sivarai ita laloa. Ia be hisiu stadilaia babalau karadia ia gaukaralaia, ranu bona lai ena siahu ia abidadama henia, bona sene taudia ia tomadiho henia, ia idia gimaia totona. Unai gaudia ese ia idia durua, a? Hao ia gwau, “Moni momo lau haboioa, abitorehai lau karaia, famili lalonai problem momo idia vara, bona lau lalometau bada.”
Taiwan ai ia noho tauna ta ladana, Komen, danu be hisiu stadilaia babalau karadia ia gaukaralaia, ranu bona lai ena siahu ia abidadama henia, reinkaneisen bona siahu ta dekenai ia biliv, bona sene taudia ia tomadiho henia. To unai gaudia ia laloa namonamo murinai, ia gwau: “Lau laloparara unai bamona hahediba herevadia bona kastom karadia ese taunimanima dekenai daradara bada ia havaraia. Lau davaria hisiu stadilaia babalau karadia be kerere. Danu reinkaneisen totona, bema emu mauri gunana ai oi karaia gaudia oi laloatao diba lasi, edena bamona do oi senisi bona mauri ma ta dekenai emu kara oi hanamoa diba?”
“Lau laloparara unai bamona hahediba herevadia bona kastom karadia ese taunimanima dekenai daradara bada ia havaraia.”—KOMEN, TAIWAN
Hao, Komen, bona momo idia laloparara, siahu ta, hisiu, idia mase vadaeni sene taudia, eiava vara lou karana ese iseda vaira negana idia gwauraia diba lasi. Anina be iseda vaira negana ita hanamoa diba lasi, a?
Momo idia laloa edia vaira nega ia namo totona edukeisen badana idia lao bona kohu momo maurina idia noholaia. To unai disisen idia karaia taudia momo dekenai dahaka ia vara?
^ par. 6 Inai atikol bona atikol ma haida ai, ladana haida idia haidaua.
^ par. 16 Unai hereva be Buka Helaga ai Galatia 6:7 dekenai ia noho. Unai lalohadai be momo ese inai bamona idia gwauraia: “Ta dekenai kara dikadia oi karaia, oi dekenai unai bamona do ia karaia danu.”
Reana Inai Danu Oi Ura
GIMA KOHORONA
Hisiu Stadilaia Bona Vaira Nega Gwauraia Babalau Taudia—Edia Heduru amo Vaira Negana Oi Itaia, A?
Unai dala idauidau oi abia dae diba, a?
GIMA KOHORONA
Baibel be Dahaka ia Gwau Mauri Bona Mase Dekenai
Ita mase murinai, ita amo gau ta ia mauri noho, a? Ita be mai iseda mase diba lasi soulina, a? Mase taudia be edeseni?
