Hahelaga gaukara idia karaia lasi Levi taudia be gaukara ma haida idia karaia, hegeregere pulisi edia gaukara bamona. Unai gaukara be dubu ena kapten ese ia henia. Iuda ena toretore tauna Philo ese unai ofesa taudia idia karaia gaukara haida ia herevalaia, ia gwau: “Levi taudia haida be iduara badinaia idia gini bona geiti idia naria, ma haida be dubu ena vairanai idia gini, unai amo idia raka vareai taudia idia itaia eiava ta be taravatu idia atoa gabudiai do ia vareai kava lasi totona. Ma haida be dina bona hanuaboi dubu helaga idia raka hagegea bona idia gimaia.”

Sanhedrin taudia be unai pulisi orea amo heduru idia abia. Roma gavamani ese unai Iuda pulisi orea sibona dekenai gwaumaoro ia henia tuari gaudia idia dogoatao totona.

Diba bada tauna Joachim Jeremias, ia gwau: “Iesu be ia idia dogoatao totona idia mai taudia dekenai ia gwau, dina ta ta ibounai lau be dubu helaga dekenai lau helai bona hadibaia, to lau umui dogoatao lasi (Mat. 26:55), ita laloparara unai negai dubu ena pulisi taudia ese ia idia dogoatao.” Toretore taudia haida idia abia dae, nega ma haida ai Iesu dogoatao totona idia siaia taudia be unai dubu ena pulisi taudia. (Ioa. 7:32, 45, 46) Ofesa taudia mai edia kapten be gabeai oda idia henia Iesu ena hahediba taudia be Sanhedrin taudia edia vairanai do ia abia lao, bona unai negai dubu ena pulisi taudia ese Paulo be dubu helaga amo idia veria raka lasi.​—Kara 4:1-3; 5:17-27; 21:27-30.