LAGANI haida gunanai, Cesar bona Rocio be California ai mauri namona idia noholaia. Cesar ena gaukara be daiutu hakerua masini (air-condition) ia karaia, bona Rocio be doketa ta ena ofesi ai pat-taim gaukara ia karaia. Idia be mai edia ruma bona natudia be lasi. To, gau ta ia vara dainai edia mauri idia haidaua. Dahaka ia vara?

October 2009 ai, United State ena brens ofesi ese revareva ta be unai gabu ena kongrigeisen ibounai dekena ia siaia. Unai revareva amo gaukara idia diba namonamo tadikaka taihu idia boiria Wallkill, New York ai, Betele rumana habadaia gaukarana idia durua totona. Ena be haida edia mauri lagani ia bada Betele gaukara totona, to idia boiria danu. Cesar bona Rocio idia gwau: “Ena be emai mauri lagani be bada, to ai diba unai be nega namona Betele dekenai ai gaukara totona. Ai ura lasi unai hahenamo namona do ai reaia!” Idia ruaosi be maoromaoro edia aplikeisen idia henia.

Ena be lagani ta mai kahana idia hanaia, to Cesar bona Rocio be Betele dekenai idia do boiria lasi. Idia naria noho lalonai idia ese edia mauri lalonai gau haida idia haidaua. Ia gwau: “Emai motuka atoa rumana be ruma maragina ta ai ai halaoa, unai amo emai ruma badana be ma haida ese idia rentaia diba. Vadaeni ai ese vanegai sibona ai haginia ruma namona (ena bada be 200 sikoea mita) ai rakatania. Bena ai hanaia lao emai ruma o flet (ena bada be 25 sikoea mita) dekenai. Unai bamona ai karaia dainai, Betele gaukara totona ai idia boiria neganai, do ai hegeregere ai lao.” Gabeai, dahaka ia vara? Rocio ia gwau: “Emai ruma maragina dekenai ai noho, bona hua ta murinai ai idia boiria Wallkill ai volantia gaukara ai karaia totona. Ai itaia kohu momo lasi maurina ai abia hidi dainai, Iehova ese ai ia hanamoa.”

Cesar bona Rocio bamona, tadikaka bona taihu handred momo be edia mauri lalonai gau haida idia haidaua, unai amo New York State ai konstraksen gaukara idia durua diba. Idia haida be  Wallkill ena brens ofesi habadaia gaukarana idia durua, bona ma haida be Warwick ai hedikwota haginia gaukarana idia durua. * Headava taudia momo be edia ruma namona, gaukara namona, bona idia naria animal danu idia rakatania, unai amo Iehova do idia hesiai henia. Unai tadikaka taihu be sibona idia henia dainai, Iehova ese idia ia hanamoa, a? Oibe!

Hegeregere, elektrisen tauna Way bona ena adavana Debra edia mauri lagani be 50 bamona. Idia be Kansas ai edia ruma bona kohu momo idia hoihoilaia bona Wallkill ai pat-taim commuter Bethelites ai idia lao. * Ena be unai idia karaia totona edia noho dalana idia haidaua, to idia diba unai idia karaia amo namo do idia davaria. Debra be ena Betele gaukara ia herevalaia, ia gwau: “Nega haida lau mamia lau be Paradaiso lalonai konstraksen gaukara lau karaia bamona, iseda pablikeisen haida ai idia hahedinaraia laulau hegeregerena!”

Melvin bona Sharon be South Carolina ai edia ruma bona kohu idia hoihoilaia, unai amo Warwik ai idia heduru diba. Ena be unai idia karaia be auka, to idia mamia unai mai anina bada gaukarana idia karaia be hahenamo ta. Idia gwau: “Tanobada hegegemadai Iehova ena orea taudia do ia durua gaukarana ai karaia dainai, ai moale bada.”

Kapenta tauna Kenneth bona ena adavana Maureen edia mauri lagani be 55 bamona. Idia be California amo idia lao Warwick ena gaukara idia durua totona. California idia do rakatania lasi neganai, dala idia karaia kongrigeisen taihu ta ese edia ruma do ia naria, bona edia famili idia noia Ken ena tamana burukana do idia naria. Betele gaukara totona idia karaia abia hidi dainai idia lalometau, a? Lasi! Ken ia gwau: “Ai be hahenamo momo ai davaria bona hekwakwanai ai davaria lasi. Bona ai laloa ma haida ese unai bamona gaukara idia karaia be namo.”

Unai abia hidi idia karaia tadikaka taihu momo be koua gaudia momo idia hanaia. Hegeregere, William bona Sandra, edia mauri lagani be 60 bamona. Idia be Pennsylvania ai mauri namona idia noholaia. Idia be masini kohudia idia karaia kampani ta idia biagua, bona unai kampani ai taunimanima 17 idia gaukara. Idia be guna idia maragi neganai idia noho kongrigeisen dekenai idia do noho, bona edia varavara momo be unai gabu dekenai idia noho. Unai dainai Wallkill ena Betele gaukara totona idia boiria neganai, idia diba edia famili, turadia  bona noho gabu namona do idia reaia. William ia gwau: “Momokani, ai laloa momo gauna be emai mauri namona do ai rakatania.” To idia guriguri murinai, edia lalona idia hadaia edia noho gabuna idia rakatania totona, bona unai idia lalohisihisilaia lasi. William ia gwau: “Betele famili ida ai gaukara hebou dainai, ai abia moalena be gau ta ida ai hahegeregerea diba lasi, lau bona Sandra be ai moale bada!”

Hawaii ai, Ricky be konstraksen gaukara ta ia naria, bona ia idia boiria Warwick ena gaukara ia durua totona. Iena adavana Kendra, be ia ura Ricky ese unai ia abia dae. To, edia natuna mero ladana Jacob ena namo idia laloa bada, iena mauri lagani be 11 sibona. Idia laloa New York ai idia noho be namo, unai amo edia natuna ese unai gabu ena mauri dalana do ia manadalaia.

Ricky ia gwau: “Ai ura kongrigeisen namona ta ai bamoa, unuseniai edia abidadama ia goada matamata taudia idia noho. Ai ura Jacob be tura namodia momo do ia bamoa.” Idia lao kongrigeisen dekenai matamata taudia momo idia noho lasi, to Betele taudia haida idia noho. Ricky ia gwau, “Emai hebou ginigunana murinai, Jacob lau nanadaia unai kongrigeisen matamatana be edena bamona ia laloa, bona ia gwau, ‘Oi laloa lasi tamagu. Betele ai idia noho matamata taudia do lau bamoa.’”

Momokani, unai Betele taudia ese Jacob idia tura henia namonamo. Dahaka ia vara? Ricky ia gwau: “Hanuaboi ta egu natuna ena daiutu amo lau raka hanai lalonai, lau itaia iena daiutu be ia diari noho. Lau laloa ia be kompiuta gadara ia gadaralaia noho, to ia be Baibel ia duahia! Lau nanadaia ia be dahaka ia karaia noho neganai, Jacob ia gwau: ‘Lau be Betele tauna matamata ta bona Baibel be lagani ta lalonai do lau duahia.’” Ita gwau diba, Ricky bona Kendra be idia moale New York ai idia noho, badina unai ese edia natuna ena abidadama ia hagoadaia bona dala ia kehoa Ricky be Warwick ena konstraksen gaukara ia durua.—Aon. 22:6.

Wallkill bona Warwick ena gaukara be do ia ore dainai, unuseniai idia heduru taudia idia diba edia gaukara danu do ia ore. Unai tadikaka bona taihu be vaira negana ai edeseni do idia lao o dahaka do idia karaia totona idia lalohekwarahi, a? Lasi! John, konstraksen gaukara naria tauna, bona ena adavana Carmen, be Florida amo bona edia mauri lagani be 50 bamona. Idia be Warwick dekenai volantia gaukara idia karaia, bona idia gwau: “Gaukara ai hamatamaia negana amo ema bona  hari, ai itaia Iehova ese emai dabu gaudia ia henia. Ai diba Iehova ese ai ia boiria mai bona gabeai ai do ia laloaboio lasi.” Volantia taudia momo be unai bamona idia laloa danu. (Sal. 119:116) Ruma lalonai lahi habodoa gaudia (fire sprinkler) ia atoa tauna Luis, bona ena adavana Quenia, be Wallkill ai idia gaukara. Idia gwau: “Ai itaia vadaeni Iehova ena harihari karana dainai tauanina dalanai ai dabu lasi. Ena be ai diba lasi edena dala ai, edena negai, bona edeseniai heduru do ai abia, to ai diba momokani ai do ia durua noho.”—Sal. 34:10; 37:25.

New York ai konstraksen gaukara idia durua taudia momo be reana badina haida dainai unai gaukara idia dadaraia diba. To, idia be Iehova ena hahegani hegeregerena, ia idia tohoa. Iehova ia gwau: “Lau do umui tohoa. . . . Vadaeni lauegu kara namona do umui itaia. Lau ese guba ena uindo do lau kehoa, bona gau namodia momo herea umui dekenai do lau bubua diho.”—Mal. 3:10.

Oi danu Iehova do oi tohoa bona oi ia hanamoa dalana do oi itaia, a? Namona be oi guriguri bona oi tahua dahaka do oi karaia, unai amo New York o konstraksen gaukara ma haida dekenai heduru oi henia diba. Bona Iehova ese oi ia hanamoa dalana oi itaia—Mar. 10:29, 30.

Alabama amo ensinia tauna ta Dale bona adavana Cathy be ma haida idia hagoadaia, Wallkill ai volantia gaukara do idia karaia. Idia gwau: “Bema emu lalona oi hadaia bona noho dalana oi haidaua, Iehova ena lauma ese oi ia durua dalana do oi itaia.” Unai dainai dahaka oi karaia be namo? Dale ia gwau: “Namona be emu mauri dalana oi haidaua momokani. Gabeai do oi lalohisihisi lasi!” Gary be North Carolina amo, bona lagani 30 lalonai konstraksen naria gaukara ia karaia. Ia bona ena adavana Maureen idia gwau, idia moale badina Warwick ai “edia mauri ibounai lalonai Betele ai Iehova idia hesiai henia tadikaka taihu momo idia hedavari henia bona idia gaukara hebou,” unai be hahenamo badana. Gary ma ia gwau: “Betele ai oi gaukara totona, namona be hari inai nega oromana lalonai kohu momo lasi maurina oi manadalaia.” Jason, paua kampani ta ai ia gaukara tauna, bona ena adavana Jennifer, be Illinois amo. Idia gwau Wallkill ai Betele konstraksen gaukara oi durua neganai, “do oi mamia oi be tanobada matamatana lalonai oi noho bamona.” Jennifer ma ia gwau: “Do oi moale bada badina oi karaia gaudia ibounai be Iehova ese ia laloa bada, bona Iehova ese vaira negana totona ia hegaegaelaia gauna dekenai unai be mai anina bada. Iehova ese oi dekenai hahenamo momo do ia henia.”