HEBOUHEBOU negadiai Iehova ena taunimanima be Baibel ena hereva namodia idia kamonai dainai idia moale bada. Unai sibona lasi, to tauanina durua aniani idia abia danu.

September 1919 ai, Bible Student taudia be dina eit hebouhebou Cedar Point, Ohio, U.S.A. ai, idia karaia. Hebouhebou totona idia lao taudia be hotel ai do idia mahuta, to idia be momo herea. Unai dainai, aniani gabunai weita gaukara idia karaia taudia be hutuma idia itaia neganai, edia gaukara idia rakatania. Aniani gabuna ia naria tauna ese tadikaka taihu matamata ia noia idia heduru totona, bona momo be mai ura ida idia durua. Idia ta be Sadie Green, ia gwau: “Unai be egu nega ginigunana weita gaukara lau karaia, bona nega namona ai abia.”

Gabeai, lagani ta ta ena hebouhebou ai momo be mai moale ida aniani naria gaukara idia karaia tadikaka taihu idia durua. Tadikaka taihu idia gaukara hebou dainai, unai ese matamata taudia momo ia durua Iehova hesiai henia gaukarana be edia tahua gauna ai idia halaoa totona. Lagani 1937 ena hebouhebou ai, Gladys Bolton be aniani gabuna ai ia gaukara. Ia gwau: “Gabu idauidau amo idia mai taudia lau hedavari henia, bona hekwakwanai idauidau idia hanaia daladia lau kamonai. Unai nega ai, egu lalona lau hadaia painia gaukara lau karaia totona.”

Beulah Covey ia gwau: “Gaukara taudia be mai lalona ibounai ida gaukara idia karaia namonamo.” To, gaukara haida be auka. Lagani 1969 ai, Angelo Manera be Dodger Steidiam, Los Angeles, California ai, ia ginidae neganai, ia idia abia hidi aniani naria gaukarana ia karaia totona. Ia gwau: “Lau hoa bada!” Unai hebouhebou hegaegaelaia totona, drein ta ai geia unai amo gesi ena paipa ai atoa diba, drein ena lata be mita 400 bamona!

Lagani 1982, Sierra Leone ai, volantia taudia be tano ta idia hagoevaia guna, bena idia mailaia kohu amo kisini ta idia haginia. Lagani 1951, Frankfurt, Germany ai, tadikaka be masini ta idia rentaia, unai  amo ketol 40 ai ranu idia hasiahua diba. Weita taudia be hora tamona lalonai aniani mereki 30,000 idia henia. Mereki huria taudia 576 edia gaukara durua totona, hebouhebou idia mai taudia be sibona edia kaia bona foka idia mailaia. Yangon, Myanmar ai, nanadu taudia be tano idaudia amo idia mai tadikaka taihu idia laloa dainai, aniani ai chili momo idia atoa lasi.

Lagani 1950 ai, United States ena hebouhebou ta ai, dina ia siahu bona aniani abia totona laini ai idia gini, to Annie Poggensee dekenai unai be nega namona. Ia gwau: “Taihu rua ida lau herevahereva, idia be bouti amo Europe idia rakatania bona idia mai.” Idia be hebouhebou dekenai idia mai totona Iehova ese idia ia durua dalana idia herevalaia. Annie ia gwau: “Unai taihu rua idia moale bada. Ena be laini ia lata bona dina ia siahu, to unai idia laloa lasi.”

Hebouhebou momo ai, aniani gabudia edia tent badadia idia karaia, bena bens haida idia karaia, unai amo idia gini bona idia aniani, bona idia ore neganai idia raka-lasi haraga. Edena dala ai dina tubu ai taunimanima tausen idia ubua diba? Witnes lasi tauna ta ia gwau: “Inai dubu taudia be idau momokani. Idia gini bona aniani.”

New York City ai, Yankee Stadium dekenai, ami bona gavamani gaukara taudia be tadikaka taihu edia gaukara namonamo karana idia itaia neganai, idia hoa. Iseda aniani gabuna idia sekea murinai, United States ena ami ofesa ta be Britain ena ami ofesa ta Major Faulkner ia hadibaia hebouhebou ta dekenai do ia lao bona unai do ia itaia. Unai dainai, England, Twickenham ai, Faulkner bona ena adavana be lagani 1955 ena “Triumphant Kingdom” Hebouhebou dekenai idia lao. Ia itaia aniani gabunai idia gaukara taudia be lalokau dainai idia gaukara.

Lagani momo lalodiai, mai ura ida idia volantia taudia be tadikaka taihu totona aniani namodia idia hegaegaelaia. To unai gaukara badana dainai, volantia taudia be hora momo idia gaukara bona program idia reaia. Lagani 1970 bamona ai, tano momo dekenai aniani hegaegaelaia daladia idia haidaua. Bena lagani 1995 ai, hebouhebou idia mai taudia idia hagoadaia edia aniani do idia mailaia totona. Unai amo aniani idia hegaegaelaia taudia ese hebouhebou ena program idia kamonai bona tadikaka taihu idia bamoa diba. *

Unai volantia taudia edia gaukara namona dainai, Iehova ese idia ia laloa bada! Haida idia laloa unai negai aniani gabudiai idia gaukara be namo. To mai anina bada gauna be: Iseda hebouhebou ai lalokau be iseda kara badana.—Ioa. 13:34, 35.