“DAHAKA dainai lau dekenai inai ia vara? Bona dahaka dainai Dirava ese ia koua lasi?” Unai be Brazil ai mauri lagani 24 merona Sidnei ena hereva. Ia be waterslide ta dekenai ia moru bona ia raka diba lasi dainai wilsea dekenai ia helai.

Haida be aksiden idia davaria, idia gorere, o edia lalokau tauna ta ia mase, disasta, eiava tuari idia vara neganai idia lalohisihisi bona Dirava idia badu henia. Guna haida dekenai unai ia vara danu. Baibel negadiai bese kwarana tauna Iobu be hisihisi idauidau ia davaria danu. Iobu ia gwau unai be Dirava ena kerere. Ia gwau: “Dirava e, lau ese oi dekenai lau boiboi, to lau dekenai oi haere lasi, bona oi dekenai lau guriguri neganai, oi kamonai henia lasi. Dirava e, mai dagedage danu lau dekenai oi kara henia. Oiemu siahu dekena amo lau oi hisihisi henia noho.”​—Iobu 30:20, 21.

Iobu be idia vara hekwakwanai ena badina ia diba lasi eiava dahaka dainai Dirava ese ia koudia lasi. To, ita moale badina Baibel ese idia vara gaudia edia badina bona ita hanaia daladia ia herevalaia namonamo.

Baibel ese Dirava ia herevalaia neganai, ia gwau: “Iena gaukara be namo momokani. Iena dala ibounai be maoro, bona iena kota be momokani. Ia be abidadama ena Diravana, ia kara dika lasi. Ia be momokani bona maoromaoro.” (Deuteronomi 32:4) Bema Dirava be unai bamona, vadaeni dahaka dainai “momokani bona maoromaoro” Diravana ia ura taunimanima idia hisihisi? Eiava dahaka dainai dika idauidau amo taunimanima ia panisidia o ia tohodia edia kara idia haidaua totona? Unai ita lalopararalaia be auka, ani?

To, Baibel ia gwau: “Ta ese hahetoho ia davaria neganai, namo lasi ia gwau: “Dirava ese lau ia tohoa.” Badina ta ese dika gaudia amo Dirava ia tohoa diba lasi bona Dirava ese dika gaudia amo tau ta ia tohoa lasi.” (Iamesi 1:13) Momokani, Baibel amo ita diba Dirava ese taunimanima ia karaia neganai, idia be goevadae. Ia ese Adamu bona Heva ia havaraia neganai, idia dekenai gabu hairaina ta, mauri ena durua gaudia ibounai, bona mai anina bada gaukarana ta ia henidia. Dirava ese idia ia hamaoroa: “Emui bese do umui havaraia, do umui momo herea. Tanobada ena gabu ibounai dekenai do umui noho, bona unai tano do umui biagua.” Ita gwau diba, Adamu bona Heva be Dirava dekenai idia badu be anina lasi.​—Genese 1:28.

To, hari mauri be ia dika ia lao. Idaunega amo ema bona hari, taunimanima be hisihisi idauidau idia davaria. Baibel ena hereva be momokani, ia gwau: “Havaraia gaudia ibounai be idia taitai bona idia hisihisi hebou noho ema bona hari.” (Roma 8:22) Dahaka ia vara?

Hisihisi idia vara ena badina ita lalopararalaia totona, mani idaunegai ia vara gauna ita laloa lou. Gwau-edeede aneru ta, gabeai idia gwauraia Satani Diabolo ese Adamu bona Heva ia dibagania Dirava ena kara maoromaoro taravatudia idia dadaraia totona. Dirava ena taravatu be ‘kara namo bona kara dika hadibaia au ena huahua do idia ania lasi.’ Diabolo ese Heva ia hamaoroa, bema Dirava idia kamonai henia lasi, do idia mase lasi. Unai be hegeregere Satani ia gwau Dirava be koikoi tauna. Danu, ia gwau Dirava be maoro lasi dahaka be namo bona dahaka be dika ia gwauraia hidi totona. (Genese 2:17; 3:1-6) Satani ia gwau, Dirava ese taunimanima ia lohiaia be maoro lasi. Unai dainai, inai henanadai badana ia vara​—Dirava ia hegeregere taunimanima ia lohiaia totona, a?

To Satani ese hepapahuahu ma ta ia havaraia. Ia gwau, taunimanima be sibona edia namo idia laloa dainai Dirava idia hesiai henia. Diabolo be Dirava dekenai Iobu ia herevalaia neganai, ia gwau: “Oi be nega ibounai oi ese ia bona iena famili oi naria noho. Oi ese ia biagua gaudia ibounai danu oi naria noho. To, bema iena kohu, bona ia biagua gaudia ibounai oi kokia neganai, ia ese oiemu ladana do ia hadikaia momokani!” (Iobu 1:10, 11) Ena be Satani ese Iobu ia herevalaia, to iena hereva ena anina  be, taunimanima ibounai be sibona edia namo idia laloa dainai Dirava idia hesiai henia.

Idia vara hepapahuahu hamaoromaoroa dalana tamona be dahaka? Aonega bada Diravana be dala maorona ai unai hepapahuahu ia hamaoromaoroa​—bona ta ia lalohisihisi lasi. (Roma 11:33) Dirava ese taunimanima ia koua lasi sibona idia lohiaia totona, bona edia lohia dalana ese ia hahedinaraia daika ena lohia dalana ese taunimanima edia ia hereaia.

Hari, tanobada ai idia vara gau dikadia ese ia hamomokania taunimanima be hegeregere lasi sibona idia lohiaia totona. Tanobada gavamanidia ese maino, noho namo, bona moale idia havaraia lasi, to tanobada idia hadikaia sibona. Unai ese Baibel ena hereva ia hamomokania, ia gwau: “Taunimanima ta lasi ese iena mauri ia biagua noho.” (Ieremia 10:23) Dirava ena lohia dalana sibona ese taunimanima dekenai maino, moale, bona noho namo ia havaraia diba, badina unai be Dirava ena ura.​—Isaia 45:18.

Edena dala ai Dirava ese ena ura taunimanima totona do ia hagugurua? Laloatao, Iesu ese ena murinai idia raka taudia ia hadibaia do idia guriguri: “Oiemu Basileia do ia mai. Oiemu ura gauna tanobada dekenai do ia vara, guba dekenai ia vara bamona.” (Mataio 6:10) Oibe, nega korikori ai Dirava ese ena Basileia amo hisihisi ibounai do ia haorea. (Daniela 2:44) Unai nega ai, ogogami, gorere, bona mase be do idia ore. Baibel ia gwau, ogogami taudia be “ia dekenai idia boiboi neganai, ia ese do ia durua.” (Salamo 72:12-14) Gorere taudia dekenai, Baibel ia gwau: “Ta do ia gwau lasi, ‘Lau be gorere.’” (Isaia 33:24) Iesu be idia mase vadaeni taudia, Dirava ese ia laloatao taudia unai, ia herevalaia neganai ia gwau: “Nega ia mai noho, guria gabuna lalonai idia noho taudia ibounai  . . . do idia raka-lasi.” (Ioane 5:28, 29) Unai be gwauhamata namodia, ani?

Atikol matamanai ita herevalaia tauna Sidnei, be aksiden ia davaria bona lagani 17 murinai ia gwau: “Unai aksiden dainai Iehova Dirava lau badu henia lasi, to momokani matamanai ia dekenai lau lalohisihisi. Egu aena ia dika dainai, nega haida lau lalohisihisi bona tai. To, Baibel amo lau laloparara unai aksiden be Dirava ese ia havaraia lasi. Baibel ia gwau, ita ‘ibounai ese nega dika ita davaria noho, bona inai dika ia vara kava noho.’ Iehova lau guriguri henia bona Baibel lau duahia karana ese lau ia hagoadaia bona durua lalohadai maorona lau abia totona.”​—Hadibaia Tauna 9:11; Salamo 145:18; 2 Korinto 4:8, 9, 16.

Namona be ita laloatao, Dirava ese hisihisi ia koua lasi ena badina, bona idia vara dika be kahirakahira do ia ore dalana ese ita ia durua Dirava badu henia karana ita dadaraia totona. Ita diba momokani Dirava ese “mai momokani ida ia idia tahua taudia edia davana do ia henia.” Ia bona Iesu idia abidadama henia taudia be do idia lalohisihisi lasi.​—Heberu 11:6; Roma 10:11.