Yo itilize mo “sen” anrapò ak sa ki pwòp e ki san salte. Nan lang ebre a, mo “sen” an vle di “met apa”. Donk, yo itilize “sen” anrapò ak sa yo met apa, ki pa la pou yo itilize l yon fason òdinè, oubyen anrapò ak sa yo konsidere kòm sakre, sitou paske l pwòp e l bon.

 Se Bondye ki sen nan degre ki pi wo a. Bib la di: “Pa gen pèsonn ki sen tankou w, Jewova a.” (1 Samyèl 2:2). Se sa k fè Bondye gen dwa pou l etabli lwa konsènan sentete.

 Nou kapab itilize mo “sen” an pou kèlkeswa bagay ki gen rapò dirèkteman ak Bondye, espesyalman bagay nou itilize sèlman pou n adore Bondye. Pa egzanp, Bib la pale de:

•   Kote ki sakre: Lè Moyiz te kanpe bò pye pikan ki te gen dife ladan l lan, Bondye te di l: “Kote w kanpe a se yon kote ki sakre.” — Egzòd 3:2-5.

•   Fèt ki sen: Izrayelit nan tan lontan yo te konn fè fèt regilyèman pou yo adore Jewova. Yo te di fèt sa yo se fèt Bondye mande “pou nou reyini pou nou adore l”. — Levitik 23:37.

•   Objè ki sakre: Yo te rele objè yo te konn itilize pou adore Bondye nan tanp Jerizalèm tan lontan an “veso sakre”. (1 Wa 8:4.) Yo te konn trete objè sakre sa yo avèk anpil respè, men yo pa t janm konn adore yo. b

 Wi. Men lòd Bondye bay kretyen yo: “Nou dwe sen, paske mwen menm, mwen sen.” (1 Pyè 1:16). Se vre, yon moun enpafè pap ka atenn degre sentete Bondye genyen an ki pafè. Sepandan, Bondye kapab konsidere yon moun ki obeyi lwa l yo kòm yon moun “ki sen, ki fè Bondye plezi”. (Women 12:1.) Yon moun k ap fè efò pou l sen ap montre sa ni nan pawòl li ni nan aksyon l. Pa egzanp, moun sa a suiv konsèy Bib la bay “pou nou vin sen e pou nou evite imoralite seksyèl”, epi “pou nou vin sen nan tout konduit nou”. — 1 Tesalonisyen 4:3; 1 Pyè 1:15.

 Wi. Si yon moun sispann suiv prensip Bondye yo, Bondye pap konsidere l kòm yon moun ki sen ankò. Pa egzanp, nan liv Ebre a, yo te avèti ‘frè yo ki te sen’ pou yo ‘pa vin gen yon kè ki mechan, yon kè ki manke lafwa, poutèt yo kite Bondye vivan an’. — Ebre 3:1, 12.

 Sa ki pa verite: Lè yon moun selibatè, sa fè l pi sen.

 Sa ki verite: Byenke yon kretyen ka chwazi rete san l pa marye, men se pa sa ki fè l sen pou Bondye. Se vre, moun ki selibatè yo gen posiblite sèvi Bondye san yo pa distrè (1 Korentyen 7:32-34). Sepandan, Bib la montre moun ki marye yo kapab sen tou. An reyalite, omwen youn nan apot Jezi yo, Pyè, te marye. — Matye 8:14; 1 Korentyen 9:5.