Oruveze orusupi komurungu wonḓiro ye, Jesus wa tjivisa kutja: “Indji Ombuze Ombwa yOuhona mai zuvarisiwa mouye auhe i rire omahongononeno koviwaṋa avihe; nomaandero indino otji maye ya.” (Mateus 24:14) Nungwari oviungura vyokuzuvarisa mbi hapo atjavi yenenisiwa vi mouye auhe? Omokuhorera komuano Jesus mbwaa tjiti indu tja ri kombanda yehi.​—Lukas 8:1.

Eṱe tu kondjisa okuhakaena ku novandu pozonganda zawo. Jesus wa honga ovahongewa ve okuzuvarisa ombuze ombwa okuza kondjuwo nondjuwo. (Mateus 10:11-13; Oviungura 5:42; 20:20) Ovazuvarise veserewondo etenga mbo va perwe otuveze ku mave kazuvarisa. (Mateus 10:5, 6; 2 Ovakorinte 10:13) Oviungura vyetu vyokuzuvarisa ndino wina vi kayendisiwa momuano mbwo nu ombongo aihe i pewa oruveze pu mai sokuzuvarisa. Ihi tji tjita kutja tu yenenise erakiza Jesus nde tu pa kutja ngatu “zuvarise Ombuze Ombwa kovandu nu tu hongonone” ouatjiri.​—Oviungura 10:42.

Eṱe tu kondjisa okuvasisa ombuze ndji koṋa akuhe ku ku novandu. Jesus wina we tu pa otjihorera mokuzuvarisa ombuze apehe paa vaza po ovandu tjimuna pomuronga poo pozondjombo ovandu paave teke omeva. (Markus 4:1; Johanes 4:5-15) Eṱe wina tu hungira ku novandu ohunga nOmbeibela apehe pu matu ve vaza tjimuna momivanda vyotjihuro, pozongetjefa, potuveze twomerinaneno poo mongoze. Wina tu zuvarisira ovararanganda na eṱe, ovakwetu mbu tu ungura pamwe poo mbu tu hita pamwe oskole novazamumwe na eṱe tji twa munu oruveze orusemba. Ozongondjero azehe nḓa ze tjita kutja omangete wovandu mouparanga wouye ve zuve ‘ombuze ombwa yondjamo.’​—Epsalme 96:2.

U nomundu ngu mo tjiwa ngotjo vanga okuraera ohunga nombuze ombwa yOuhona waMukuru nokutja owo mau mu etere oruyaveze ndwa sana pi? O ṱizire ombuze ombwa yomaundjiro ndji kove omuini, nungwari raera ku varwe!

• “Ombuze ombwa” ohunga na tjike ndji mai sokuzuvarisiwa?

• Ovahongonone vaJehova ve horera vi komuano Jesus mbwaa zuvarisa?