Berita manah ti madahka mensia deka idup belama-lama ba dunya bisi ditulis ba Bup Kudus. (Masmur 37:29) Bup Kudus digaga ari 66 iti bup mit. Petara ngena urung 40 iku orang ti taluk nulis Bup Kudus. Lima iti bup ti keterubah ditulis Moses urung 3,500 taun kelia. Bup ti penudi ditulis rasul John lebih 1,900 taun kelia. Penemu tauka pikir sapa ditulis sida tu? Petara bejaku enggau sida ngena roh kudus Iya. (2 Samuel 23:2) Sida tu nulis pikir Petara, ukai pikir sida empu. Nya alai, Jehovah nya Pengarang Bup Kudus.​—Bacha 2 Timoti 3:16; 2 Peter 1:​20, 21.

Peda video Sapa Pengarang Bup Kudus?

Kitai nemu Bup Kudus nya ari Petara laban iya bisi madah utai ti deka nyadi dudi hari enggau silik. Nadai mensia ulih ngereja tu. (Josua 23:14) Semina Petara ti Pemadu Bekuasa ulih nemu utai ti deka nyadi ngagai mensia jemah ila.​—Bacha Isaiah 42:9; 46:10.

Bup ari Petara tu lain ari bup bukai. Bejuta-juta Bup Kudus udah disadung dalam beratus-ratus leman bansa jaku. Taja pen Bup Kudus ditulis kelia menya, iya enda nyangkal penemu sains. Pia mega, 40 iku penulis Bup Kudus nadai nyangkal pangan diri. Tambah mega, pengerindu ti disebut dalam Bup Kudus semina datai ari Petara ti bendar, lalu bisi kuasa ngubah pengidup orang nyadi manah agi. Semua tu ulih ngasuh orang arapka Bup Kudus nya amat Jaku Petara.​—Bacha 1 Tesalonika 2:13.

Peda video Baka Ni Kitai Nemu Utai Ba Bup Kudus Nya Amat?

Bup Kudus madahka berita manah pasal tuju Petara ngagai mensia. Iya nerangka baka ni mensia ngelenyauka peluang idup belama-lama ba dunya ti manah, baka Kebun Eden. Iya mega nerang baka ni dunya ti manah tu deka digaga baru.​—Bacha Pemandang 21:​4, 5.

Jaku Petara mega bisi madah pasal adat enggau jaku ajar. Bup Kudus mega bisi nusui utai dikereja Petara ngagai orang ti manah enggau orang ti jai. Ari nya kitai ulih ngelala Petara baka ni Iya nya. Nya alai, Bup Kudus ulih nulung nuan ngelala Petara. Iya nerangka chara kitai ulih nyadi pangan Iya.​—Bacha Masmur 19:​7, 11; James 2:23; 4:8.

Bup mit tu ulih nulung nuan meretika Bup Kudus ngena chara ti udah dikena Jesus. Iya ngena mayuh ayat Bup Kudus kena nulung orang “meretika Bup Kudus.”​—Bacha Luke 24:​27, 45.

Berita manah ari Petara amat ngerinduka ati. Tang sekeda orang enda peduli lalu sekeda agi pedis ati ninga berita tu. Anang ngasuh tu nagang nuan belajar Bup Kudus. Peluang nuan bulih pengidup meruan bepanggai ba peneka nuan nemu Petara.​—Bacha John 17:3.