Kala nuan lenyau orang ke dikesayau ketegal pemati? Enti kala, nuan tentu berasai tusah sereta pedis ati. Nuan engka berunding: ‘Nama nyadi ngagai kitai pengudah kitai mati? Ulih kitai betemu baru enggau orang ti dikesayau kitai ke udah mati?’ Ba pelajar tu enggau pelajar ke nangkanka tu, peratika saut ari Bup Kudus ti ngelantangka ati.

1. Nama nyadi lebuh kitai mati?

Jesus nyemaka orang ke udah mati baka orang ke tinduk jenak. Lebuh orang tinduk jenak, iya enda nemu pasal utai ke nyadi ngelingi iya. Pia mega Bup Kudus madah, “Orang ke mati nadai nemu utai.” (Bacha Pengajar 9:5.) Sida enda sunyi tauka ngasaika pemedis.

2. Baka ni pemendar ari Bup Kudus pasal orang ke udah mati ulih nulung nuan?

Mayuh orang takutka pemati enggau orang ke udah mati! Tang Jesus madahka: “Pemendar deka ngelepaska kita.” (John 8:32) Baka ni? Mayuh jalai pengarap ngajar, orang ke udah mati bisi semengat ke enda nemu mati. Tang nitihka Bup Kudus, ajar tu bula. Nya alai, kitai enda ibuh irau pasal orang ke udah mati nya benung merinsa tauka sida nya ulih ngemediska kitai. Kitai enda ibuh besampika sida tauka ngereja pengawa ke ulih ngelantangka ati sida.

Sekeda orang madah, sida ulih bejaku enggau orang ke udah mati. Tang tu tentu enda ulih nyadi. Baka ke udah dipelajarka kitai, orang ke mati “enda nemu utai.” Kebendar iya, melikat ti jai rindu nyaru diri nyadi orang ke udah mati kena nipu kitai. Ketegal nya, Jehovah nagang kitai ari bejaku enggau orang ke udah mati laban Iya nemu melikat ti jai ulih ngemediska kitai. (Bacha Ulang Adat 18:10-12.) Au, pemendar pasal orang ke mati ulih ngelindung kitai ari melikat ti jai sereta pemula sida.

3. Belajarka utai ti bendar pasal gaya orang ke udah mati

Orang ba serata dunya, pechayaka utai ti bebida pasal utai ke nyadi pengudah kitai mati. Tentu ukai semua utai ti dipechaya tu betul.

• Nama utai ke dipechayaka mayuh orang pasal pemati ba kandang endur nuan diau?

 4. Pemendar pasal pemati ulih nulung kitai

Pemendar pasal pemati ngelepaska kitai ari asai takut ngagai orang ke udah mati. Bacha Pengajar 9:10, lalu kerandauka tanya tu:

• Ulih orang ke udah mati ngemediska kitai?

Mayuh orang nyembah orang ke udah mati tauka ngaga pengawa kena ngelantangka semengat orang ke udah mati. Tang pemendar ari Bup Kudus ngelepaska kitai ari pengawa sereta ajar ti pelesu. Bacha Isaiah 8:19 enggau Pemandang 4:11, lalu kerandauka tanya tu:

• Nama asai ati Jehovah ngagai orang ke nyembah tauka minta tulung ari orang ke udah mati?

5. Pemendar pasal pemati ngelantangka ati kitai

Mayuh orang pechaya, orang ke mati deka terus diperinsa ketegal utai jai ke kala dikereja sida. Kitai berasai lantang laban nemu utai tu enda amat. Orang ke udah mati enda agi merinsa taja pan sida kala ngereja penyai. Bacha Rome 6:7, lalu kerandauka tanya tu:

• Ayat nya madah, lebuh orang mati, utang dosa iya deka nadai agi. Enti pia, kati orang ke udah mati deka terus merinsa ketegal penyalah iya ti suba?

Lebuh kitai majak ngelala Jehovah, kitai nyau nemu Jehovah tentu enda merinsa orang ke udah mati. Bacha Ulang Adat 32:4 enggau 1 John 4:8, lalu kerandauka tanya tu:

• Enti Petara bisi kualiti baka ke disebut dalam ayat nya, kati Iya deka merinsa orang ke udah mati?

• Kati pemendar pasal pemati ngelantangka ati nuan? Nama kebuah?

 LANSA

Lebuh orang mati, iya nadai agi. Orang mati enda merinsa lalu enda ulih ngemediska orang ke agi idup.

Ulang Kaji

• Nama nyadi pengudah kitai mati?

• Baka ni pemendar pasal pemati ulih nulung kitai?

• Baka ni pemendar pasal pemati ngelantangka ati kitai?