1. Nama utai ke ulih mai empas ngagai pendiau kitai?

 ENDA ngira kitai baru tauka udah lama dibaptisa, semua kitai deka ngembuan pendiau ti dikerinduka Jehovah. Kena ngereja nya, kitai patut nyaga runding kitai. Nama kebuah? Laban runding kitai ulih mai empas ngagai pendiau kitai. Enti kitai suah berunding pasal chara kitai ulih ngelantangka diri empu, kitai deka nyebut sereta ngereja utai ti jai. (Eps. 4:17-19) Tang enti kitai berunding pasal utai ti manah, kitai deka nyebut sereta ngereja utai ti ngelantangka ati Jehovah.—Gal. 5:16.

2. Nama tanya ke deka dipejuraika kitai ba artikel tu?

² Baka ke disebut ba artikel sebedau tu, kitai enda ulih nyeliahka ari berundingka utai ti salah. Tang kitai ulih milih enda ngereja utai ke diperundingka kitai nya. Sebedau dibaptisa, kitai patut badu nyebut sereta ngereja utai ti dipegedika Jehovah. Tu meh utai ke pemadu beguna enti kitai deka muai pendiau ti lama. Enti kitai deka ngelantangka ati Jehovah, kitai patut ngasika pesan tu: “Nyadi mensia ti baru.” (Kol. 3:10) Dalam artikel tu, kitai deka nyaut sekeda tanya tu: Nama reti “nyadi mensia ti baru”? Baka ni kitai ulih nyadi mensia ti baru lalu terus ngereja nya?

3. “Nitihka Galatia 5:22, 23, nama reti “nyadi mensia ti baru,” lalu baka ni seseiku orang nunjukka diri udah nyadi mensia ti baru?

³ Orang ke “nyadi mensia ti baru” nunda Jehovah. Iya bisi  ngayanka buah roh kudus. Pia mega iya ngelakka roh kudus ngiring runding iya, asai ati sereta pengawa iya. (Bacha Galatia 5:22, 23.) Ambika chunto, iya rinduka Jehovah sereta nembiak Iya. (Mat. 22:36-39) Iya mengkang gaga ati taja pan iya napi penanggul. (Jas. 1:2-4) Iya rindu bebaik enggau orang. (Mat. 5:9) Iya sabar sereta manah ngagai orang bukai. (Kol. 3:13) Iya rinduka utai ti badas sereta terus ngereja nya. (Luk. 6:35) Nengah pengawa iya, iya nunjukka diri bisi pengarap ti tegap ngagai Petara. (Jas. 2:18) Iya mengkang nelap lebuh orang bukai ngasuh iya ringat lalu iya nemu nagang diri lebuh diuji.—1 Kor. 9:25, 27; Tit. 3:2.

4. Kena nyadi mensia ti baru, nama kebuah kitai patut ngayanka semua sifat ba buah roh kudus ke dipadah ba Galatia 5:22, 23 enggau sifat ke bukai ke bisi dipadah Bup Kudus?

⁴ Kena nyadi mensia ti baru, kitai patut ngemansangka buah roh kudus ke dipadah ba Galatia 5:22, 23 enggau sifat ke bukai ke bisi dipadah ba Bup Kudus. * Semua sifat tu bisi kaul enggau pangan diri. Ambika chunto, enti nuan rinduka orang bukai, nuan mega patut liat ati sereta siru ngagai iya. Lalu enti nuan deka nyadi orang ti badas, nuan patut nelap sereta nemu nagang diri.

5. Nama reti “bisi runding Kristus,” lalu nama kebuah kitai patut belajar pasal pengidup Jesus? (1 Korint 2:16)

⁵ Bacha 1 Korint 2:16. Kena nyadi mensia ti baru, kitai patut “bisi runding Kristus.” Reti iya, kitai patut belajar chara Jesus berunding sereta nunda iya. Jesus ngayanka buah roh kudus enggau sempurna. Baka cheremin, Jesus mandangka sifat ti sebaka enggau Jehovah. (Heb. 1:3) Majak kitai berunding baka Jesus, majak agi kitai deka ngembuan sifat sereta pendiau ti sama baka iya.—Plp. 2:5.

6. Nama patut dikingatka kitai lebuh nguji deka ngaga ubah?

⁶ Kati ulih kitai neladan Jesus? Engka kitai berunding: ‘Jesus nya sempurna. Aku enda ulih nunda iya enggau sempurna!’ Enti nuan berasai baka nya, ingatka tiga iti pekara tu. Kesatu, nuan ditempa ngambika ulih neladan Jehovah enggau Jesus. Nya alai, nuan ulih milih deka neladan seduai iya. Lalu nuan ulih mujur taja pan enda ulih ngereja nya enggau seratus peratus. (P-kal. 1:26) Kedua, roh kudus Petara nya kuasa ti pemadu besai  ba dunya raya. Enggau tulung ari roh kudus, nuan ulih ngereja utai ke enda ulih digaga diri empu. Ketiga, Jehovah enda minta nuan ngayanka buah roh kudus enggau sempurna diatu. Kebendar iya, Petara udah nyediaka awak pengelama 1,000 taun ngambika sida ke bisi peluang idup di dunya ulih mansang nyadi sempurna. (Pem. 20:1-3) Tang ke diatu, Jehovah deka kitai bebendar ngaga ubah lalu bepanggai ba Iya kena nulung kitai.

7. Nama deka dipejuraika kitai diatu?

⁷ Baka ni kitai ulih neladan Jesus enggau manah agi? Diatu, aram kitai bejuraika empat begian buah roh kudus Petara. Lalu, kitai deka meda utai ke ulih dipelajar ari chara Jesus nunjukka sifat nya. Udah nya, kitai deka berandauka sekeda tanya ke ulih nulung kitai meresa sekalika kitai ulih ngemansangka agi sifat nya.

8. Baka ni Jesus ngayanka pengerindu?

⁸ Jesus amat rinduka Jehovah. Nya alai, iya sanggup ngena pengidup diri ke penguntung Apai iya sereta ke kitai. (Jhn. 14:31; 15:13) Iya mega sanggup merinsa sereta mati ke kitai, awakka kitai bisi peluang idup belama iya. Jesus nunjukka pengerindu iya ngagai mensia nengah chara iya ngena pengidup iya. Ninting hari, Jesus ngayanka pengerindu sereta penyiru, taja pan bisi orang nyakal iya. Lalu siti chara ti pemadu penting iya nunjukka pengerindu iya ngagai mensia, iya nya enggau ngajar sida pasal Perintah Petara.—Luk. 4:43, 44.

9. Baka ni kitai ulih nunda teladan Jesus ngayanka pengerindu?

⁹ Kitai nyerahka diri ngagai Jehovah sereta dibaptisa laban kitai rinduka Iya. Nya alai, enti kitai manah enggau orang, tu nunjukka kitai rinduka Jehovah. Rasul John nulis: ‘Orang ke enda rinduka menyadi diri ke ulih dipeda iya, enda ulih rinduka Petara ke enda dipeda iya.’ (1 Jhn. 4:20) Kitai ulih nanya diri empu: ‘Kati aku amat rinduka orang bukai? Kati aku siru enggau orang bukai taja pan sida kasar enggau aku? Kati pengerindu meransang aku ngena awak sereta utai ke dikemisi aku ngambika ulih nulung orang belajar pasal Jehovah? Kati aku sanggup ngereja tu taja pan mayuh orang engka enda beterima kasihka pengawa aku tauka sida ngelaban aku? Kati aku ulih ngiga chara ngambika ulih ngena mayuh agi awak ba pengawa ngaga orang nyadi murid?’—Eps. 5:15, 16.

10. Nama utai ke nunjukka Jesus rindu bebaik enggau orang?

¹⁰ Jesus rindu bebaik enggau orang. Lebuh orang ngereja utai ti jai ngagai iya, iya enda malas penyai sida. Tang iya ngereja lebih agi ari nya. Jesus dulu agi mansang bebaik enggau orang lalu meransang orang bukai mutarka laya entara sida. Ambika chunto, iya madahka sida patut bebaik enggau pangan diri enti sida deka sembah sida deka diterima Jehovah. (Mat. 5:9, 23, 24) Lalu iya mayuh kali nulung bala rasul mutarka penanggul lebuh bala rasul belaya pasal sapa ke pemadu besai entara sida.—Luk. 9:46-48; 22:24-27.

11. Nama ulih digaga kitai ngambika ulih bebaik enggau orang?

¹¹ Ngambika ulih bebaik enggau orang, kitai ukai semina patut nyeliahka kelikuh. Tang ngiga peluang bebaik enggau orang bukai lalu meransang menyadi Kristian kitai mutarka laya entara sida. (Plp. 4:2, 3; Jas. 3:17, 18) Kitai ulih nanya diri empu ngena tanya tu: ‘Nama utai ke sanggup dilengkaka aku ngambika ulih bebaik enggau orang bukai? Lebuh menyadi Kristian bisi ngemediska ati aku, kati aku deka bedendam enggau iya? Kati aku nganti orang bukai bebaik dulu enggau aku, tauka aku ke dulu ngereja nya, taja pan aku  ngasaika iya ke salah? Kati aku meransang orang bukai bebaik enggau pangan diri?’

12. Baka ni Jesus ngayanka penyiru?

¹² Jesus nya orang ke siru. (Mat. 11:28-30) Iya nunjukka penyiru lebuh iya nelap ngagai orang bukai. Lalu taja pan iya napi situasi ke tusah, tang kekadang Jesus sanggup ngubah pemutus iya ketegal iya berundingka asai ati orang bukai. Ambika chunto, lebuh seiku indu orang Kanaan minta Jesus ngeraika anak iya, Jesus nulak peminta indu nya. Tang lebuh indu nya ngayanka pengarap ti besai, Jesus ngayanka penyiru lalu ngeraika anak indu nya. (Mat. 15:22-28) Taja pan Jesus nya siru, tang nya enda nagang iya ari meri orang jaku lalau. Kekadang Jesus nunjukka penyiru nya lebuh iya meri jaku lalau ngagai orang ke dikerinduka iya. Bisi sekali, Peter nguji deka nagang Jesus ari ngereja peneka Jehovah. Jesus lalu ngerara iya ba mua bala murid ke bukai. (Mrk. 8:32, 33) Jesus ngereja tu ukai ketegal deka ngemaruhka Peter. Tang Jesus deka ngelatih iya sereta meri jaku tangkan ngagai bala murid ke bukai ngambika sida enda ngenemuka diri. Peter tentu berasai malu maya nya, tang iya bulih penguntung ari disiplin ke diterima iya.

13. Baka ni kitai ulih nyadi orang ke siru?

¹³ Kena nunjukka penyiru ngagai orang ke dikerinduka kitai, kekadang kitai engka patut bejaku enggau terus terang ngagai sida. Lebuh nuan ngereja nya, tunda meh teladan Jesus lalu tentuka jaku lalau nuan nya bepelasarka prinsip Bup Kudus. Nuan enda tau enda nelap ngagai sida. Pechaya meh sida tentu deka ngereja utai ti betul. Andal meh, ketegal sida rinduka Jehovah sereta rinduka nuan, sida tentu deka nerima jaku lalau ti diberi ketegal pengerindu. Nuan ulih nanya diri empu sekeda tanya tu: ‘Lebuh orang ke dikerinduka aku ngereja utai ti salah, kati aku berani deka madah ngagai iya? Enti aku patut meri jaku lalau, kati aku bejaku enggau chara ti siru tauka kasar? Nama tuju ati aku meri jaku lalau? Kati aku meri jaku lalau nya ketegal aku ringat ngagai iya, tauka ketegal aku deka nulung iya?’

14. Baka ni Jesus ngayanka pemadas?

¹⁴ Jesus ukai semina nemu utai ti badas, tang iya mega ngereja nya. Jesus rinduka Apai iya. Nya alai, iya seruran ngereja utai ti badas sejalai enggau tuju ati ti betul. Orang ke badas seruran ngiga chara nulung orang bukai, lalu ngereja utai ti manah ke sida. Semina nemu utai ti badas nya enda chukup. Kitai enda tau enda ngereja utai ti manah lalu bisi tuju ati ti betul. Kitai engka berunding, ‘Kati ulih utai ti badas dikereja enggau tuju ti salah?’ Au, ulih. Ambika chunto, Jesus bejaku pasal orang ke meri pemeri ngagai orang ke seranta. Tang sida ngereja nya ba mua orang mayuh ngambika pengawa ke digaga sida dipeda sereta dipuji orang. Taja pan sida ngereja pengawa ti badas, tang Jehovah enda lantang ati enggau sida.—Mat. 6:1-4.

15. Baka ni kitai ulih nyadi orang ke badas?

¹⁵ Kitai ulih nyadi orang ti badas enti kitai ngereja utai ti betul, ukai ketegal deka ngulihka penguntung ke diri empu. Kitai engka ulih nanya diri empu: ‘Taja pan aku nemu utai ti badas ke patut dikereja aku, tang kati aku amat ngereja nya? Nama tuju ati aku ngereja utai ti badas?’

16. Nama patut digaga kitai ninting hari, lalu nama kebuah?

¹⁶ Pengudah dibaptisa, kitai agi terus ngaga ubah lalu ngemansangka semua sifat ti manah. Kitai patut ngayanka buah roh kudus  ninting hari. Nama kebuah? Laban majak kitai bebendar deka ngayanka buah roh kudus, majak agi roh kudus Petara deka nulung kitai. Lalu Jehovah deka ngena roh kudus Iya nulung kitai mujur ngereja nya. (P-kal. 1:2) Pia mega, tiap iti buah roh kudus ulih meransang kitai ngaga ubah. Rasul James nulis: ‘Pengarap mati enti iya nadai pengawa.’ (Jas. 2:26) Nya alai, ninting kali kitai ngayanka buah roh kudus, kitai nunjukka roh kudus Petara bisi enggau kitai. Kitai andal, Jehovah deka nulung kitai ngayanka buah roh kudus.

17. Nama patut digaga kitai enti sema kitai enda mujur ngayanka buah roh kudus?

¹⁷ Orang Kristian ke udah lama dibaptisa mega kekadang enda mujur ngayanka buah roh kudus. Tang ke penting nya, anang meh putus asa. Peratika sempama tu. Enti sema nuan enda sengaja techarikka gari ti dikerinduka nuan, kati nuan deka muai iya? Enda. Enti gari nya agi ulih dijait, nuan tentu deka ngereja nya. Lalu pengudah nya nuan deka bejimat agi. Sama mega, enti sema nuan enda mujur ngayanka penyiru, penyabar, tauka pengerindu ngagai seseiku orang, anang meh berasai asa ati. Nuan ulih minta ampun ngagai iya ngambika kaul seduai nyadi manah baru. Lalu ila, tentuka nuan keran agi ngayanka buah roh kudus.

18. Nama utai ke ulih dipechayaka kitai?

¹⁸ Kitai amat beterima kasih laban kitai bisi teladan Jesus! Enti kitai bebendar agi deka nunda runding sereta ulah Jesus, kitai senang agi deka nitihka teladan iya. Asil iya, kitai deka nyadi majak landik ngaga ubah nyadi mensia ti baru. Ba artikel tu, kitai semina meresa empat iti sifat ari buah roh kudus. Kati nuan ulih meri awak belajarka sifat bukai ti bisi ba buah roh kudus? Lalu nuan ulih meresa sekalika nuan ulih ngemansangka agi sifat nya? Nuan ulih tetemuka mayuh artikel pasal topik tu ba Bup ke Dikena Saksi-Saksi Jehovah Ngiga Pansik, dibaruh topik “Chara Pengidup Orang Kristian,” lalu giga tajuk “Buah Roh Kudus.” Nuan ulih pechaya, enti nuan terus bebendar ngaga ubah nyadi mensia ti baru, lalu nentuka ubah nya mengkang bisi ba nuan, Jehovah tentu deka terus nulung nuan.