BUP KUDUS UKAI BUP TEKS SAINS, TANG IYA NGEMBUAN PENERANG TI NGELUI MAYA IYA DITULIS. PERATIKA SEKEDA CHUNTO.

Kati dunya enggau langit luar bisi pun?

Bala saintis ti tebilang kala madahka saut iya enda. Tang diatu sida ngumbai dunya enggau langit luar bisi pun. Bup Kudus udah lama nerangka pasal tu.—Pemungkal 1:1.

Baka ni gamal bumi tu?

Kelia menya, mayuh orang ngumbai bumi tu rata. Ba kurun ti kelima S.M., saintis Gerika madahka bumi tu segala. Tang sebedau nya—ba kurun ti kelapan S.M.—penulis Bup Kudus iya nya Isaiah, nyebut pasal “kumbang dunya,” lalu tu nunjukka dunya tu “segala.”—Isaiah 40:22; nota kaki.

Kati langit luar ulih rusak?

Seiku saintis Gerika, Aristotle, ari kurun ke-4 S.M., ngajar semina bumi ulih rusak tang ukai langit luar. Runding tu diterima mayuh orang bekurun ti udah. Tang ba kurun ke-19, bala saintis ngepunka penemu pasal entropi. Penemu tu madahka semua utai, enda ngira ba langit tauka ba bumi, ulih rusak. Seiku saintis ke nulung ngemansangka penemu tu, Lord Kelvin, setuju enggau utai ke dipadah Bup Kudus pasal langit enggau bumi: “Sida deka luya baka kain.” (Masmur 102:25, 26) Baka ke diajar ba Bup Kudus, Kelvin nemu Petara ulih nagang utai ke ditempa Iya ari rusak.—Pengajar 1:4.

Nama nyukung planet nyengkaum bumi kitai?

Aristotle ngajar semua utai ba langit luar dalam gelung crystalline, lalu tiap iti gelung tu semak enggau pangan diri lalu bumi ba tengah semua gelung nya. Ba kurun ke-18 M., bala saintis nerima penemu pasal bintang sereta planet bukai engka melepung ba langit ti puang. Tang ba bup Jop ke ditulis ba kurun ke-15 S.M., kitai macha Penempa “ngaga dunya melepung ba langit ti puang.”—Jop 26:7, NW.

TAJA PAN BUP KUDUS UKAI BUP TEKS BERUBAT, TANG IYA NGEMBUAN PRINSIP TI MANDANGKA PENEMU PASAL PENGERAI.

Nyerara orang ke sakit.

Adat Moses meri atur orang ke sakit lan diserara ari orang bukai. Tang bala lutur semina ngena prinsip tu pengudah penyakit ti ngerampit balat nyadi ba kurun ke-14 enggau ke-15, lalu chara tu agi mujur dikena nyentukka diatu.—Adat Lewi, bagi 13 enggau 14.

Meresi diri pengudah negu bangkai mensia.

Nyentuk ngagai pengujung kurun ke-19, bala lutur suah ngintu bangkai mensia tang enda nuchi jari sebedau ngintu orang bukai ke benung sakit. Pengawa tu ngujungka mayuh pemati. Tang, Adat Moses madahka barang sapa ke negu bangkai dikumbai enda tuchi. Adat nya mega madahka ai patut dikena lebuh nuchi diri. Atur ba adat tu mega tentu meri mayuh penguntung ba pengerai.—Penyampau 19:11, 19.

Chara muai tai.

Ninting taun, lebih ari setengah juta anak mit mati ketegal penyakit chirit tauka muang ai. Tu nyadi lebuh tai mensia enda dibuai enggau manah. Adat Moses madah tai mensia patut ditumbak, jauh ari endur orang diau.—Ulang Adat 23:13.

Maya betutus.

Adat Petara meri atur anak mit ke lelaki patut ditutus ba hari kelapan. (Adat Lewi 12:3) Tu ketegal, pengudah seminggu anak mit ada, darah ulih meku enggau manah. Ba jeman Bup Kudus, sebedau bisi pemansang ba chara berubat, anak mit lelaki ke betutus pengudah seminggu iya ada, ulih nyaga pengerai iya.

Kaul entara pengerai ba emosi enggau pengerai tubuh.

Bala pemansik chara berubat enggau saintis madahka emosi ti positif baka pengaga ati, pengadang, asai beterima kasih enggau sedia deka ngampun mai penguntung ngagai pengerai. Bup Kudus madahka: “Ati ti selalu lantang ngasuh nuan bepengerai. Ati ti selalu tusah ngasuh pengering lenyau.”—Jaku Dalam 17:22, NW.