Erasmus landik ngena jaku Gerika enggau Latin. Nya kebuah iya ulih mandingka mayuh salin Bup Kudus jaku Latin, baka Vulgata Latin enggau manuskrip Gerika ti lama ari Bup Kudus Jaku Gerika (tauka, Sempekat Baru). Tu ngujungka iya amat andal, penemu Bup Kudus nya utai ti amat beguna. Ketegal tu, iya dekaka Bup Kudus disalin ngagai jaku ke dikena ninting hari.

Erasmus deka gerija Katolik ngaga ubah. Iya pechaya, pengarap Kristian patut nyadika jalai pengidup, ukai semina adat aja. Pengujung iya, maya orang angkat ngelaban Gerija Rome, orang gerija Katolik ngumbai nya bepun ari Erasmus.

Ba utai ke ditulis iya, Erasmus madahka penyai ke digaga tuai gerija, penyumbung enggau pengaya sida, sereta juluk ati pope ke nyukung perang. Iya enda sebaka enggau tuai pengarap gerija. Sida ngambi ulih ari orang ke sama pengarap nengah adat, baka ngaku dosa, nyembah Maria, bepasa, sereta ngansak orang ngagai sesiti endur enti deka nyembah Petara. Iya mega enda setuju enggau orang gerija ke bejualka surat pengampun dosa lalu nagang tuai pengarap kawin.

Kena taun 1516, Erasmus ngeluarka edisyen keterubah Sempekat Baru dalam jaku Gerika. Tu meh keterubah iya Sempekat Baru dichelak. Edisyen tu nyengkaum nota Erasmus empu, lalu bisi salin jaku Latin ke enda sama enggau Vulgata. Nyau kelama, iya ngaduka baru edisyen tu, ngujungka salin tu amat bebida enggau teks Vulgata Latin.

Siti ari bida tu, ba 1 John 5:7. Kena nyukung ajar Triniti, sida nambahka leka jaku comma Johanneum ngagai salin Vulgata. Ayat ke ditambah nya: “Ba serega, Apai, Jaku enggau Roh Kudus; lalu sida tiga nya nyadi seiku.” Tang, Erasmus muai jaku tu ari dua iti edisyen keterubah Sempekat Baru ke disalin iya. Tu ketegal nadai siti pan manuskrip Gerika kelia ke nyebut pasal utai nya. Tang, orang gerija ngansak iya nyimpan jaku nya baru dalam edisyen iya ti ketiga.

Edisyen Erasmus ke udah diaduka baru nya, nulung bala penyalin Bup Kudus nyalin Bup Kudus ngagai bansa jaku Eropah ke bukai. Martin Luther, William Tyndale, Antonio Brucioli, enggau Francisco de Enzinas ngena salin nya nyalin Bup Kudus Jaku Gerika ngagai jaku Jerman, English, Itali sereta Sepanyol.

Erasmus diau ba jeman mayuh ubah nyadi ba pengarap. Salin Sempekat Baru jaku Gerika ke digaga Erasmus amat-amat beguna ba orang ke deka ngubah atur ba gerija Protestan. Keterubah iya, Erasmus mega dikumbai orang ke deka ngelaban gerija. Tang lebuh orang amat-amat angkat ngelaban gerija, Erasmus enda setanah enggau sapa-sapa. Lalu utai ke ngenyitka kitai, lebih ari 100 taun ti udah, seiku pakar pansik ke benama David Schaff madahka: “Erasmus mati enggau enda bepegai ba nama-nama pengarap. Gerija Katolik enggai nerima iya, Gerija Protestan mega enggai ngaku iya seiku ari sida.”