Kena taun nginjil 2021, a serata dunya agi merinsa ketegal pandemik COVID-19. Baka ke udah dipadahka ba dalam artikel “Bantu Diberi ba Serata Dunya Maya Penyakit Berampit Nyadi,” kitai udah ngena bejuta dolar b kena nulung mansa ke ditinggang pandemik lalu numbuhka lebih ari 950 iti Komiti Tulung Bencana Alam.

 Ukai semina pandemik aja ke mai penusah, tang bisi penusah ke bukai sereta bencana alam ninggang bala menyadi kitai ba serata dunya. Komiti Ngatur ari Raban ti Ngiring meri pemendar ngena 8 juta dolar kena nulung bala menyadi ke ditinggang lebih ari 200 iti penusah ke bukai kelimpah ari pandemik COVID-19. Peratika baka ni duit pemeri nuan dikena kena nulung mansa ke ditinggang dua iti penusah baru-baru tu.

 Kena 22 Mei 2021, Gunung Berapi Nyiragongo, ba Republik Demokratik Congo berengkah meletup. Lava ke pansut ari gunung berapi ngerusak rumah, sekula enggau tekat ai. Ukai nya aja, bisi utai agi ke bahaya. Beberapa hari pengudah letupan nya, gunung berapi mansutka abus ti bahaya datai nyentukka bandar Goma lalu tanah berenyang ti mit nyadi mayuh kali. Lebih ari setengah orang ke diau ba bandar nya diasuh pindah. Beratus-ribu iku ngerarika diri, lalu sekeda ari sida meraka sempadan Rwanda.

 Sida ke ngerarika diri tu nyengkaum kira-kira 5,000 iku Saksi-Saksi Jehovah. Sekeda lenyau rumah ketegal letupan gunung berapi, lalu bisi rumah dirumpak pengudah sida ngerarika diri. Komiti Tulung Bencana Alam ba Rwanda enggau Republik Demokratik Congo bekerejasama ngatur pengawa meri bantu. Pampang opis Congo (Kinshasa) madahka riput ari siti komiti nya: “Taja pan utai ke nyadi ba bandar nya charut, lalu pesan kena ngerarika diri empai agi diberi, komiti udah nyadung pemakai, ai, selap tilam, pua enggau gari. Komiti Tulung Bencana Alam nyadung kemah, meri penutup mulut, sereta nerangka chara kena nyeliahka diri ari COVID-19 enggau penyakit taun ngagai lebih ari 2,000 iku bala menyadi ba siti bandar ke ngerari diri.

 Dalam urung tiga bulan maya penusah tu, bala menyadi kitai udah nyadung lebih ari enam tan berau, enam tan tepung jagung, tiga tan minyak masak enggau tiga tan ai. Kena ngelimat duit, pampang opis ngatur belanja kena meli pemakai ti mayuh ba menua diri empu ari ke meli mayuh pemakai ti mar ari menua bukai.

 Seiku menyadi indu ke lenyau rumah baru iya ketegal letupan gunung berapi madahka: “Kami berasai amat tusah ati sereta pedis.” Tang iya enggau diri sebilik nerima bantu ba fisikal enggau jaku peransang kena ngeringka pengarap. Iya madahka: “Enggau bantu ari Jehovah, kami seruran nerima utai ke diguna kami. Kami udah meda baka ni Jehovah mai ma kami sereta ngelempungka nya.”

 Menua Venezuela ditinggang penanggul ba ekonomi betaun-taun. Bala menyadi kitai ba dia betan napi gaya pengidup ti tusah, lapar pungkang, sereta jenayah ke nambah-menambah. Taja pia, gerempung Jehovah enda kala ngelengkaka sida.

 Sekumbang taun nginjil nyin kemari, lebih ari 1.5 juta dolar udah dikena meli sereta nganjung pemakai enggau sabun ke ruang bilik ke begunaka bantu. Pampang opis Venezuela madah: “Enda senang nganjung 130 tan pemakai ngagai serata menua kami ninting bulan sereta nentuka semua utai nya datai ngagai bala menyadi ke amat begunaka bantu.” Kena nentuka pemakai nya enda jai, bala menyadi kitai seruran nganjung pemakai ke ulih tan lama. Pampang opis madahka: “Kami nguji meli mayuh pemakai maya rega nya murah. Udah nya kami nganjung pemakai nya ngena chara ti ngelimat duit.”

 Leonel, seiku ari Komiti Tulung Bencana Alam ba Venezuela rinduka pengawa iya. Ku iya: “Pengawa nya amat spesial ba aku sereta meri peransang ngagai aku, kelebih agi pengudah bini aku udah nadai ketegal COVID-19. Aku seruran kisuk lalu ngasaika diri beguna ba bala menyadi. Aku udah meda baka ni Jehovah seruran ngamatka semaya iya ke enda ngelengkaka nembiak Iya.”

 Seiku menyadi ke nerima bantu kala gawa ba Komiti Tulung Bencana Alam suba. Ku iya madah: “Diatu aku meh ke begunaka bantu. Kami ukai semina nerima bantu ba fisikal, bala menyadi mega udah nulung aku enggau bini aku ngambika mengkang berasai tenang. Sida ibuhka kami, merindang sereta meransang kami.”

 Sekeda penusah nyadi enggau ngenyit. Taja pia, gerempung Jehovah seruran ulih ngulihka sereta nganjung utai ti diguna enggau jampat. Tu ketegal duit pemeri nuan ngagai pengawa serata dunya. Sekeda chara bukai kena meri duit pemeri nya diterangka ba donate.dan124.com. Kami amat beterima kasih ke pengerah jari nuan.