ƐLĀ Ō NWU ƆMƐ 24
Ɔdi Wɛ Ɔkwɛyi Lɛyikwu Aalelekwu Otɛhɔ A?
Ujehofa dɔka ku alɔ jé odee lɛyikwu apɔlɛ ku nu nōo yɔ ɔkpanco a. Apɔlɛ ku nu ɔɔma lɛ ō ya mla aalelekwu otɛhɔ néē gē hi ka “ayí kú Ɔwɔicō ā.” (Ohútu 6:2; Ujóbu 38:7) Ɔdi nɛ Ubáyíbu ka lɛyikwu aalelekwu otɛhɔ a? Ɔwɛ ɛgɛnyá néē gē lɛ abɔ kwu alɛɛcɛ iyē a? Ɛjɛɛji aalelekwu otɛhɔ a wɛ apɔlɛ ku Ɔwɔico a nɛɛ?
1. Anyɛ wɛ aalelekwu otɛhɔ a?
Ujehofa lɛ aalelekwu otɛhɔ a ya gbɔbu ɛɛ nɛ ó ya ɛcɛ a. Bɛɛka Ujehofa a, é lā ɔkpanco alɔ i kē má uwa eyī gla ŋ. (Ācɛ Uhíbru 1:14) Aalelekwu otɛhɔ nyā wɛ uluula okoklo igbingbidi, ɔnyɔɔnyɛ ku uwa lɛ uce ō ya ɛyɛɛyɛyi. (Ɔdā Nēé Mafú Lɛ Ujɔ́ni 5:11) É gē “lɛyítáajɛ lɛ ɔ́da mɛ́mla íne kú [Ujehofa], klla gē lɛyítáajɛ lɛ ɛlā kú nū.” (Aíjē Kú Ɛ̄gbā 103:20) Eko ku ikee a, ekoohi Ujehofa gē tu aalelekwu otɛhɔ ku nu nyā ɛhɔ kéē cɛ olɛhɔ ku nu lɛ ācɛ klla tu uwa abɔ kéē klla hɛ ācɛ ɔlɛ nu ta duu. Icɛ duu, aalelekwu otɛhɔ gē bi Ācɛ O Yɛce Ukraist jé ɔwɛ gā ɛgiyi ācɛ nōo dɔka ō nwu ɛlā lɛyikwu Ɔwɔico a.
2. Usetan mla aalelekwu obɔbi ku nu, anyɛ néē wɛ a?
Aalelekwu otɛhɔ ōhī i hayi kpaakpa lɛ Ujehofa ŋ. Alelekwu aflɛyi nōo yikpɛyi olɔfu a wɛ alelekwu “nēé hī ka ebilíi ámāŋ ka Usétan, nōo plla odúúdú ācɛ kú ipú ɛcɛ á.” (Ɔdā Nēé Mafú Lɛ Ujɔ́ni 12:9) Usetan dɔka ō lé ɔcɛ́ ikpɛyi ācɛ ɔhá, ohigbu ɛnyā, ó lɛ Adam, Iifu mla aalelekwu otɛhɔ ɔhá pla kéē lɛyitaajɛ lɛ Ujehofa ŋ. É gē hi aalelekwu nōo yikpɛyi olɔfu ɔɔma ka aalelekwu obɔbi. Ujehofa lɛ uwa kpo nu ŋma ɔkpanco wa ipu ɛcɛ nyā, ó kē géē je uwa kpo yiifi.—Jé Ɔdā Nēé Mafú Lɛ Ujɔ́ni 12:9, 12.
3. Ɛgɛnyá nɛ Usetan mla aalelekwu obɔbi gē pla ācɛ a?
Usetan mla aalelekwu obɔbi a gē bi imabɔ le pla ācɛ alɛwa, ō kɛla mla aalelekwu obɔbi a i kē wɛ uce olɔhi flu flu ŋ. Ocabɔ mafu, ācɛ ōhī gē gā ɛgiyi ācɛ nōo gē bi inyilɔwɔ le jé ɔdā nōo géē ya, acogwɛba, ācɛ nōo gē jé ɔdā nɛ ɛcɔbu gā wɛ a, ācɛ ō gbɔɔkɔ mla oboci nōo gē ya odee ku ɔhɛ. Ācɛ ɔhá klla gē gā ɛgiyi ācɛ nōo gē tu ɛcí ku ōcē nōo lɛ ō ya mla imabɔ. É klla gē pla āce ka é lɔfu kɛla mla ācɛ nōo gekwu ɛ ma. Amáŋ Ujehofa pi alɔ ahɔ̄ kahinii: “Aá híī ga ɛgiyí ācomɛ́ɛbɛ ámāŋ ka ācogwɛ́bā ŋ́.” (Ulīfayi 19:31) Ó pi alɔ ahɔ̄ nyā o ya ɛɛ kóō gba alɔ ŋma ɛgiyi Usetan mla aalelekwu obɔbi ku nu. É wɛ aolɛla ku Ɔwɔico, é kē dɔka ō ya alɔ ɔdobɔbi.
JÉ GƆBU
Jé odee lɛyikwu aɔdā olɔhi nɛ aalelekwu otɛhɔ gē ya a, ukpa nōo yɔ ipu imabɔ ō ya, mla ɛgɛ nɛ alɔ géē gbo iyi alɔ ŋma ɛgiyi Usetan mla aalelekwu obɔbi ku nu a.
4. Aalelekwu otɛhɔ gē ta ācɛ abɔ kéē nwu ɛlā lɛyikwu Ujehofa
Aalelekwu otɛhɔ ku Ɔwɔico i gē tɔɔna lɛ ācɛ abɔyi uwa ŋ. É gē ma ɔwɛ fu lɛ ācɛ ō gba Ujehofa ɛ̄gbā o ya ɛɛ kéē gā ɛgiyi ācɛ nōo dɔka ō nwu ɛlā lɛyikwu ɔ a. Jé Ɔdā Nēé Mafú Lɛ Ujɔ́ni 14:6, 7, cɛɛ ku aa kɔka lɛyikwu aɔka nōo ba nyā:
-
Ɔdiya nɛ alɔ cɛgbá otabɔ ku aalelekwu otɛhɔ ipu uklɔ ku ɔna ō ta a?
-
Ó gē ta uwɔ ɔtu kwu ɔtu ō jé ka aalelekwu otɛhɔ gē ma ɔwɛ fu gā uwɔ gā ɛgiyi ācɛ nōo dɔka ō nwu ɛlā ŋma ipu Ubáyíbu a ŋ? Ɔdiya nɛ a ka lɛ a?
5. Ta imabɔ ō ya
Usetan mla aalelekwu obɔbi ku nu wɛ aolɛla ku Ujehofa. É kē wɛ olɛla ku alɔ duu. Jé Ulúku 9:38-42, cɛɛ ku aa kɔka lɛyikwu ɔka nyā:
-
Ɔdi nɛ aalelekwu obɔbi gē ya ācɛ a?
Alɔ i dɔka ō lɛ ɔdā duuma ō ya mla aalelekwu obɔbi ipu oyeeyi ku alɔ ŋ. Jé Oblatūkíne 18:10-12, cɛɛ ku aa kɔka lɛyikwu aɔka nōo ba nyā:
-
Ɔwɛ ɛgɛnyá nɛ aalelekwu obɔbi a gē lɛ abɔ kwu alɔ iyē klla gē ya ku alɔ kɛla mla uwa a? Ɛdɔ odee nōo tɛɛma kwu imabɔ nyá kpɔ ɔwɛ ɛga nɛ a lā a?
-
A géē ka kóō wɛ ɔdā olɔhi abɔ Ujehofa i dɔka ku alɔ ya imabɔ ŋ ma a? Ɔdiya nɛ a ka lɛ a?
Lɛ UVIDIO nyā mafu, cɛɛ ku aa kɔka lɛyikwu aɔka nōo ba nyā.
-
A gbɛla ka odee nɛ le wu ɔyi nu nɔnya abɔ kóō je ogbotu lɛ ɔ a wɛ ɔdobɔbi? Ɔdiya nɛ a ka lɛ a?
-
Ɔdi nɛ u Peace cɛgbá ō ya o ya ɛɛ kóō lɛ ogbotu ŋma ɛgiyi aalelekwu obɔbi a?
Ācɛ O Yɛce Ukraist ɔkwɛyi a gē ta ɛlā ku ebilii. Jé Úklɔ́ kú Ācotɛ̄hɔ̄ 19:19 mla 1 Ācɛ Ukɔ́rīnti 10:21, cɛɛ ku aa kɔka lɛyikwu ɔka nyā:
-
Ɔdiya nōo cɛgba ku a lɛ ɔdā duuma nɛ a lɛ nōo tɛɛma kwu imabɔ a kpo tɔla bonu a?
6. Ceyitikwu ku a lɛ unu nɛ Usetan mla aalelekwu obɔbi ku nu yɔ i nu ta uwɔ a yale
Usetan wɛ otrɛyi ku aalelekwu obɔbi a. Amáŋ Umayikɛlu nɛ iye nu ɔhá lé ka Ujisɔsi a kē wɛ otrɛyi ku aalelekwɛu otɛhɔ nōo gē lɛyitaajɛ lɛ Ɔwɔico a. Ɛgɛnyá nɛ Umayikɛlu lɔfu nɛhi lɛ a? Jé Ɔdā Nēé Mafú Lɛ Ujɔ́ni 12:7-9, cɛɛ ku aa kɔka lɛyikwu aɔka nōo ba nyā:
-
Ɔnyɛ ku uwa lɔfu fiyɛ a? Umayikɛlu mla aalelekwu otɛhɔ ku nu nɛɛ, kɛɛ ka Usetan mla aalelekwu obɔbi ku nu?
-
A gbɛla ka ācɛ nōo gē yɛce Ujisɔsi a cika ō yuufi Usetan mla aalelekwu obɔbi ku nu nɛɛ?
A ya unu nɛ Usetan mla aalelekwu obɔbi ku nu yɔ i nu tu uwɔ a lé gla. Jé Ujɛ́mīsi 4:7, cɛɛ ku aa kɔka lɛyikwu ɔka nyā:
-
Ɛgɛnyá nɛ a géē gbo iyi uwɔ ŋma ɛgiyi Usetan mla aalelekwu obɔbi a?
ĀCƐ ŌHĪ GĒ KA: “Ɔdā duuma i bɔbi ō ta u game amāŋ ō má aufim nōo lɛ ō ya mla imabɔ ŋ. Ɔnyɛ ō jé anca nōó wɛ a.”
-
Ɔdiya nɛ ɛlá ō gbo ɛgɛnyā kē bɔbi a?
ƆDI NƐ A NWU A?
Aalelekwu otɛhɔ nōo hayi kpaakpa a gē ta alɔ abɔ. Usetan mla aalelekwu obɔbi ku nu a wɛ aolɛla ku Ujehofa, é gē bi imabɔ le pla ācɛ.
Aɔka ō tu alɔ ɛlá kwu ɔdā nɛ alɔ nwu
-
Ɛgɛnyá nɛ aalelekwu otɛhɔ ku Ujehofa gē ta ācɛ abɔ kéē nwu ɛlā lɛyikwu Ujehofa a?
-
Ɔnyɛ wɛ Usetan mla aalelekwu obɔbi ku nu a?
-
Ɔdiya nɛ á tine ō lɛ ɔdā duuma ō ya mla imabɔ ŋ ma?
JILA ƐLĀ NYĀ MÁ TŌŌTƆ̄Ɔ̄
Jé odee lɛyikwu aɔdā nōo mafu ka Ujisɔsi wɛ Umayikɛlu nōo wɛ otrɛyi ku aalelekwu otɛhɔ a.
“Ɔnyɛ Wɛ Umayikɛlu Nōo Wɛ Otrɛyi Ku Alelekwu Otɛhɔ A?” (Web article)
Má ɔdā nōo mafu ka Ebilii wɛ alelekwu nōo yɔ abɔyi nu a.
Má ɛgɛ nɛ ɔcɛnya éyi fu iyi nu ŋma imabɔ ō ya.
“She Found a Purpose in Life” (The Watchtower, July 1, 1993)
Nwu ɛgɛ nɛ Usetan gē bi imabɔ le pla ācɛ a.
“The Truth About Magic, Sorcery, and Witchcraft” (The Road to Everlasting Life, part 5)
